Read tsotso YEREMIA 31 Bible Online

YEREMIA 31 - tsotso bible

YEREMIA 31

¹Mwami Nyasaye avoolanga, “Mumatukhu kenako, niitsa khuva Nyasaye wa vandu vi tsimbia tsia Israeli tsiosi, navo valiitsa khuva vandu vaanje.”

²Inzi Mwami Nyasaye mbolanga, “Vandu vihonolokha khwiirwa nachila nivalolelwa tsimbavasi mu shiangalangwi. Lwa Israeli yakhava khuli anyala khuhulukha,

³inzi Mwami Nyasaye nalolekha khuye ihale wene. Nakhuyaanza nu vuyaanzi vwi mihika ni mihika; khulwa yako, nzilililanga khuva musuuvilwa khuye.

⁴Yivi Israeli wayaanzwa, Niitsa khukhumbakha vuyia, nivi uliitsa khumbakhwa, khandi uraanje khwimba tsinyimbo nurumishilanga manyanga nusieva nu vuyaanzi vunyishi muno.

⁵Uliitsa khuraaka khandi misabibu khu vikulu via Samaria; varaachi valiitsa khuraaka, nu khulia via vachesa;

⁶shichila litukhu liliitsa khutukha lwa mulindi aliitsa khulaanjilila mu shivala shi vikulu shia Efurahimu, navoola, ‘Vukhi, chendi khutikulushi Sayoni, khutsia khu Mwami Nyasaye, uli Nyasaye weru.’ ”

⁷Mwami Nyasaye avoolanga, “Mwimbile Yakobo nu mwoyo mukali numusangala, mulaanjilile shichila luhia lwimililanga vandu vi tsimbia tsindi; landitsi, numwitsominya, numuvoola, ‘Mwami Nyasaye, honyinya vandu vovo, vandu varikala va Israeli.’

⁸Loli! Niitsa khuvarulitsa mu shivala shili ivuluka, nu khuvalera halala khurula shia havundu hosi khulilova, khali vavekhu nende vafwokoya valiitsa khuva muvo, mukhali waheelitsa nende mukhali wivulanga mwana; valiitsa khukalukha, nivali shituma shikali shiene.

⁹Valiitsa khwitsa nivalilanga, nivasaala lwa vakalushitsanga. Niitsa khuvakalushitsa nivaleminya mwoyo; nu khuvaviritsila himbi ha virula via matsi havundu halunjikha ha valiitsa khuvula khwisikarila; shichila ninzi uli tata wa Israeli, Efurahimu neye mwana mukhulundu wanje.

¹⁰Munyi vandu vi tsimbia tsiosi, muhulishitsi ka inzi Mwami Nyasaye mbolanga, landitsi mu vivala vili ihale wene; numuvoola, ‘Woyo wasalanyinya Israeli, aliitsa khukhulera halala, aliitsa khumulinda khuli mwayi alindanga makondi keke.’

¹¹Inzi Mwami Nyasaye navoholola Yakobo, ninzi wamuhonyinya khurula khu vandu vuluhia lwi tsingulu khumuvira.

¹²Valiitsa khwitsa nivimba nu mwoyo mukali ikulu wi shikulu shia Sayoni, valiitsa khuva nu vuyaanzi shichila vulahi vwanje inzi Mwami Nyasaye, shichila navaha imu, idivai nende makura ku musayituni, vihanwa via makondi nende tsing'ombe. Valiitsa khuva khuli mulimi kwasamwa matsi, khandi valiitsa khuvula khuva nu vuveleli mu limenya liavo khali hati hene.

¹³Vaana vi shikhana valiitsa khusieva nivasangala, khali vayayi vavukha nende vasakhulu valiitsa khuva nu vuyaanzi. Niitsa khukalukhanyinya khwikhula khwavo khukwa khusangala, niitsa khuvaleminya mwoyo, vave nu vuyaanzi khuvira khuva nu vuveleli mu mwoyo.

¹⁴Niitsa khuchila vasalisi valilia mu vunyishi, khandi vandu vaanje valiitsa khuyaanzilila vulahi vwanje. Inzi Mwami Nyasaye mali khuvoola.”

¹⁵Mwami Nyasaye avoolanga, “Mwoyo kuhulilikhana khurula mu litaala lia Raama, khwikhula nu khulila nu vululu. Raheli alilanga shichila vaana veve; wambakhane khuleminywa mwoyo shichila vaana veve, lwa vamali khukhutsa.

¹⁶Lekha khulila nunundi, yeeya miliika chiochio, shichila uliitsa khurungwa khurulana khu muhinzilu kwokwo; khandi valiitsa khukalukha nivarula mu shivala shiu mutsiku. Inzi Mwami Nyasaye mali khuvoola.

¹⁷Khuli ni lisuuvilitswa khumatukhu kenyu kitsanga, shichila vaana venyu valiitsa khukalukha mu shivala shiavo vene. Inzi Mwami Nyasaye mali khuvoola.

¹⁸“Ni kilikali, mali khuhulila Efurahimu niyilililanga, navoola, ‘Nivi wasalilitsa nunjelihitsa, ninjeliha, nali khuli shimoli shiakhechitswa; ngalushitsa, khu ngalushi, shichila nivi Mwami Nyasaye, uli Nyasaye wanje.

¹⁹Lwa nali nikhwambakhane, nalwo lwa nikanila; lwa nechitswa, naraanga khwitula mwene; nanyola tsisoni, nimbelelitswa, shichila nakhola vwoni khuraanjila nishili muvukha.’

²⁰“Toto, Efurahimu anyala khuva mwana wanje wa nayaanza? Anyala khuva neye mwana unyanzitsanga? Shia khase khosi lwa namukondeshelanga, nalwo lwa mwitsushitsanga. Khali mukanakanilanga malahi; ni kilikali, niitsa khumuvela tsimbavasi. Inzi Mwami Nyasaye mali khuvoola.

²¹“Vikha vimanyilu khu muhaanda kwokwo, simiikha visala vinyala khukhwimilila. Witsushitse vulahi vwene muhaanda mukali kwene, nu kuli muhaanda kwa wachendelakhu nutsia. Yivi Israeli, kalukha, kalukha mu mataala koko.

²²Yivi mundu wambakhana khuva musuuvilwa, Nuluhono shina lwa uliitsa khuvukula nuhuya huyanga, Shichila, inzi Mwami Nyasaye mali khukhola shindu shiyia khulilova, mukhali aliitsa khukhava musatsa.”

²³Mwami Nyasaye wi Mikaanda Chiliihe avoolanga, “Lwa nilikalushitsa vuhinda khu Vaisraeli, valiitsa khulanditsa makhuva mu shivala shia Yuda nende mataala kalimu, nivavoola, ‘Yivi shivala shi likhola liu vulunji, Mwami Nyasaye akhukasitse, akhukasitse yivi shikulu shitakatifu!’ ”

²⁴“Nalwo lwa vandu va Yuda nende yavo vamenyanga mu mataala; valimi nende yavo vahuya huyanga ni miruku chiavo, valiitsa khumenyayo.

²⁵Niitsa khuhulushitsa vandu vavwele tsingulu; nu khutinyilitsa vateteshele.

²⁶Khulwa yako, vandu valiitsa khuvoola, ‘Mbushi ninzihulila ngoni tsindolo tsindahi.’”

²⁷Mwami Nyasaye avoolanga, “Loli, matukhu kali himbi khutukha, lwa niitsa khuchila Vaisraeli khwivulana mu vunyishi; khandi tsinyama tsiumbulimu tsiliva tsinyishi mu shivala shia Israeli nende Yuda.

²⁸Khali lwa mba nivarinyuulanga, nivativitsa, nivononyinya khandi nivasambula, naheenza ndole khuli nyala khuvumbakha.

²⁹Mumatukhu kenako, vandu valiitsa khuvula khuvoolakhu, ‘Vivuli valia matunda ki misabibu miviisi, miino ka vaana vavo nikahulila vululu.’

³⁰Navutswa shia mundu aliitsa khukhutsa khurulana khu vwoni vwevwe mwene; mundu uliliakhu matunda ki misabibu kalula, miino keke nikamulume vululu.”

³¹Mwami Nyasaye avoolanga, “Ni kilikali, matukhu kali himbi khutukha, lwa niitsa khukhola lilakano liyia na Vaisraeli nende vandu va Yuda.

³²Shikali liliitsa khuva khuli lia nakhola na vakuuka vavo, va inzi mwene narulitsa mu shivala shia Misri, lwa vameneka lilakano lianje, khali niiva nali khuvo khuli musatsa wavo tawe. Inzi Mwami Nyasaye mali khuvoola.

³³Navutswa yili nalio lilakano lia inzi Mwami Nyasaye niitsa khukhola na Vaisraeli matukhu kenako nikamali khuvwa: Niitsa khuvakhola vamanye malako kaanje, khandi nilikahandika mu mioyo chiavo. Niitsa khuva Nyasaye wavo, navo valiitsa khuva vandu vaanje.

³⁴Khuliitsa khuvula khuvakhuho nu mundu uliitsa khwechitsa mureende wewe, navoola, ‘Nuyaanza umanye Mwami Nyasaye;’ shichila shia mundu wosi aliitsa khumanya, khuraanjila khu mukali khutukha khu muti. Niitsa khuvasemeha vutamanu vwavo; khandi mbuli khwitsushitsakhu khandi vwoni vwavo.

³⁵Mwami Nyasaye neye uchilanga liuva niliakha vulavu mbasu, mweli nende tsinyining'ini niviloleshitsa vulavu mu vutukhu. Neye uchilanga maruundu nikahilikana mu inyanza; Lira lielie ni Mwami Nyasaye wi Mikaanda Chiliihe.”

³⁶Mwami Nyasaye avoolanga, “Niiva likhuva lia naviritsa liveho linyala khukora khwinzi, nalwo lwa vitsukhulu va Israeli valiitsa khuvula khuva luhia khwinzi mihika ni mihika.

³⁷Niiva likulu linyala khupimwa vutswa, khandi vakhavilitsi kali mukari mwi misinji chi lilova, nalwo lwa niitsa khwambakhana vitsukhulu va Israeli shichila vindu viosi via vakhola. Inzi Mwami Nyasaye mali khuvoola.”

³⁸Mwami Nyasaye avoolanga, “Loli! Matukhu kali himbi khutukha lwa litaala likali lia Yerusalemi liliitsa khumbakhwa vuyia shichila inzi Mwami Nyasaye, khuraanjila khu Munaara kwa Hananeli khutukha khu Shilivwa shiu Mumbeka.

³⁹Mupaka kwalio kulatsililila khuraanjila hawenaho nu kutsia imbo khutukha khu Shikulu shia Garebu, khandi kushiamiliho khumalilishila havundu halaangwangwa Goha.

⁴⁰Luhoongo lwosi, nali havundu ha mivili chia vandu vakhutsa chiayeveelwamu khandi likooshe lisiuvwamu, milimi chiosi khutsia khutukha khu Muchela kwa Kidironi, khali mumbeka yi Shilivwa shi Tsifarasi khuluveka luli ivukwi, shilitsa khukholwa shitakatifu khwinzi. Litaala likali liliitsa khuvula khurinyuulwa inoho khutivitswa.”