Read tsotso YEREMIA 34 Bible Online

YEREMIA 34 - tsotso bible

YEREMIA 34

¹Lwa Mwami Nebukadineza wa Babilonia nende vasikali veve voosi nende vivala via yamihanga viosi khulilova halala na vandu voosi va yamihanga vali nivakwananga litaala likali lia Yerusalemi nende mataala koosi kali himbi khulio, nalwo lwa Mwami Nyasaye yalomoloma khu Yeremia.

²Mwami Nyasaye, uli Nyasaye wa Israeli yamuvoolela, “Simukha utsi khuvoolela Mwami Zedekia wa Yuda, ‘Nzitsanga khukhola Mwami wa Babilonia khuvukula ni tsingulu litaala likali yili; naye aliitsa khulisamba nu mulilu.

³Uliitsa khuvula khwihonolokha khurula khuye; navutswa ni kilikali uliitsa khukumilwa ni tsingulu nuhilwa khuye. Uliitsa khulola Mwami wa Babilonia moni na moni nu khulomoloma naye. Uliitsa khutsia Babilonia.’

⁴Khali ndio, Mwami Zedekia wa Yuda, nuyaanza hulishitsa makhuva kaanje inzi Mwami Nyasaye mbolanga khulondokhana khu yivi: Uliitsa khuvula khwiirwa mu liihe.

⁵Uliitsa khukhutsila mu milembe. Khuli lwa vandu vasambanga vubani mumatukhu ka vakuuka vovo, nivali vami vamihanga khale nushili khuraanga khwamiha, nindio khandi valiitsa khusamba vubani nivakhwikhula, nivavoola, ‘Wooyi! Khuli khu vutiinyu, shichila muruchi weru umali khukhutsa.’ Inzi Mwami Nyasaye mali khuvoola.”

⁶Nalwo lwa Muprofeti Yeremia yavoolela Mwami Zedekia wa Yuda makhuva kenako koosi nivali mu Yerusalemi,

⁷lwa vasikali vu Mwami wa Babilonia vali nivakwananga Yerusalemi nende mataala kandi kali nikarikala Yuda, nikali Lakishi nende Azeka; shichila nako mataala konyene kali ni tsimbinga.

⁸Mwami Nyasaye yalomoloma khu Yeremia, lwa Mwami Zedekia yali niyakhola lilakano na vandu voosi mu Yerusalemi khukhola vavohe khuva vavoholole.

⁹Shia mundu wosi yavoolelwa avoholole murukwa Muhebrania weshie, ave musatsa inoho mukhali; khu mundu alivula khukhola Muyahudi weshie khuva murukwa.

¹⁰Vandu voosi nende vimilili vavo vali nivakholi lilakano, vahuchilila khuvoholola varukwa vavo, vave vasatsa inoho vakhali, nu khulekha khuvakhola varukwa. Vahuchilila, khandi nivavakhola khuva vavoholole.

¹¹Navutswa matukhu mati nikakhavira, vakalukhana inganakani yavo; vavukula varukwa va vali nivavoholole nivavakhola khuva varukwa khandi.

¹²Nalwo lwa Mwami Nyasaye yavoolela Yeremia,

¹³“Inzi Mwami Nyasaye, uli Nyasaye wa Israeli mbolanga: Inzi mwene nakhola lilakano na vakuuka venyu lwa navarulitsa mu shivala shia Misri, khurula mu vurukwa. Navavoolela,

¹⁴‘Shia khumuhika kwa saba, shia mulala khu munyi aliitsa khuvoholola murukwa Muhebrania weshie wakuulitswa khuye, khandi nava murumishi wewe khumihika sita. Aliitsa khumukhola khuva muvoholole khurula mu vurukwa.’

¹⁵Munyi vene mwikanila mumatukhu kavele yako; khandi numukhola likhola liu vulunji imbeli wanje. Shia mulala khu munyi yakhola Muisraeli weshie khuva muvoholole. Khali mwakhola lilakano ninzi mu Litempeli lianje.

¹⁶Navutswa mwakalukhana inganakani yenyu, numwononyinya lira lianje. Munyi voosi mwavukula khandi varukwa venyu, vasatsa nende vakhali nu muvakhola khuva vavoholole khulondokhana khuli vene vikombanga. Mwavakhola khuva varukwa khandi.

¹⁷Inzi Mwami Nyasaye mbolanga: Mwayambakhana khulonda malako kaanje, lwa mwambakhana khukhola vamwavo venyu nende vareende venyu khuva vavoholole. Khulwa yako, nzitsanga khumukhola khuva vavoholole vu khwiirwa ni shivavi, lukhutsu nende inzala. Niitsa khuchila vandu vi tsimbia tsindi khuria khulondokhana khu ka valolanga nimukhola. Inzi Mwami Nyasaye mali khuvoola.

¹⁸Vandu vambakhana khulonda lilakano lianje khandi nivavula khurweshitsa ka lilakano lia vakhola lienyanga, niitsa khuvakhola valikwa khuli shimoli shia vareemi mu vitonye nivachenda hakari hene --

¹⁹Vimilili va Yuda khandi va Yerusalemi, vitsili viu mu inzu yu vwami, vasalisi nende vandu voosi vamenyanga mu shivala shinu vachenda nivavirila hakari hi vitonye vivili vi shimoli shiasinzwa.

²⁰Niitsa khukhola vatsiku vavo nende vandu vakhavanga khuli vanyala khuviira nu khuvakumila ni tsingulu. Mivili chiavo chiliitsa khuva shiukhulia shia manyonyi nende tsinyama tsiumbulimu.

²¹Niitsa khuchila vatsiku nende vandu vakhavanga khuli viira Mwami Zedekia wa Yuda nende vandu vamukhonyanga khwamiha khukumilwa ni tsingulu. Niitsa khukhola vasikali vu Mwami wa Babilonia, valekha khumukwana, nu khumukumila ni tsingulu.

²²Inzi Mwami Nyasaye niitsa khuhaana lilako, navo valiitsa khukalukha mu litaala likali yili. Valiitsa khulikwana, khulivukula ni tsingulu nu khulisamba nu mulilu. Niitsa khukhola mataala ka Yuda khuva khuli shiangalangwi, ha mundu anyala khuvula khumenya.”