Read tsotso YEREMIA 35 Bible Online

YEREMIA 35 - tsotso bible

YEREMIA 35

¹Mwami Nyasaye yalomoloma khu Yeremia, mumatukhu kiliamiha liu Mwami Yehoyakimu mwana wa Yosia yali nali Mwami wa Yuda. Yavoola,

²“Simukha utsi khu vandu vu lwivulu lwa Rekabu ulomolome navo, khandi uvalaanje mu Litempeli lianje inzi Mwami Nyasaye, havundu handi; nu khuvaha idivai yu khung'wa.”

³Khulwa yako, navukula Yazania mwana wa Yeremia, mwana wa Habazinia, vamwavo veve voosi, vaana vi shiyayi veve voosi, nende vandu vu lwivulu lwa Rekabu voosi.

⁴Navahila mukari havundu handi mu Litempeli liu Mwami Nyasaye, hali ha vaana va Hanani mwana wa Igadalia, wali mundu wa Nyasaye. Havundu henaho hali himbi havundu handi ha vimilili vamenyanga khuluveka lundi lwa havundu ha Maseya mwana wa Shalumu, wasinjililanga havundu ha vilulilanga imu yamenyanga.

⁵Navukula idivai ninda mu vikombe nende tsibakuli khandi nimbikha imbeli wa vandu vu lwivulu lwa Rekabu. Navavoolela, “Ng'wikhu idivai.”

⁶Navutswa vachipa, “Shiukhunyala khung'wa idivai yosi tawe; shichila kuuka weru Yonadabu mwana wa Rekabu yakhuvoolela, ‘Muvuli khung'wakhu idivai yosi, kave nu munyi inoho vitsukhulu venyu mihika ni mihika;

⁷muvuli khumbakhakhu inzu yosi inoho khuraakakhu shindu shiosi, inoho khuva nu mulimi kwi misabibu; navutswa mulatsililila khumenya mu maheemo khumatukhu koosi, khu mu limenya mu shivala shia mulimu khuli vandu vacheni khumatukhu manyishi.’

⁸Khumali khulonda shia shindu shiosi shia kuuka weru Yonadabu mwana wa Rekabu yakhuvoolela. Khutsi vene khushili khung'wakhu idivai; khali vakhali veru inoho vaana veru vi shiyayi inoho vi shikhana vashili khung'wakhu;

⁹khali khushili khumbakhakhu tsinzu tsiu khumenyamu, inoho khuvakhu ni milimi chi misabibu inoho khuraakakhu viraakwa;

¹⁰navutswa khwamenya mu maheemo, khandi khwalonda shia shindu shiosi shia kuuka weru Yonadabu yakhuvoolela.

¹¹Navutswa lwa Mwami Nebukadineza wa Babilonia yaseera shivala shinu, khwavoola, ‘Hambi khwilushi mukaanda kwa vasikali va Vababilonia nende Vasiria khutsi Yerusalemi.’ Nako kachilanga nu khumenya nunundi mu Yerusalemi.”

¹²Nalwo lwa Mwami Nyasaye yavoolela Yeremia,

¹³“Inzi Mwami Nyasaye wi Mikaanda Chiliihe, uli Nyasaye wa Israeli mbolanga: Simukha utsi khuvoolela vandu va Yuda nende va Yerusalemi, Toto, munyala khuvula khulonda mivaalo kaanje inoho khuhulishitsa makhuva kaanje?

¹⁴Yonadabu mwana wa Rekabu yahaana lilako khu vaana veve khuvula khung'wa idivai; lilako lia yahaana lienelo limali khurweshitswa. Khali shivang'wetsakhu idivai yosi khumatukhu kanu tawe, shichila valondanga malako ka kuuka wavo. Menyi ninomolomanga khu munyi, navutswa mwambakhane khumbulishitsa.

¹⁵Shia khase khosi namurumilanga varumishi vaanje vaprofeti khwitsa khu munyi. Vamuvoolela, ‘Leshi vutamanu, mukalukhane mu vikholwa vienyu; muvuli khulondelela vanyasaye vandi nu khuvarumishila. Numukhola ndio, nalwo lwa mu limenya mu shivala shia namuha munyi na vakuuka venyu.’ Navutswa mwambakhana khuhulila, inoho khumbulishitsa.

¹⁶Vitsukhulu va Yonadabu mwana wa Rekabu valonda malako ka vakuuka vavo vavaha, navutswa vandu yava mwambakhane khulonda malako kaanje.

¹⁷Khulwa yako, Inzi Mwami Nyasaye wi Mikaanda Chiliihe, uli Nyasaye wa Israeli mbolanga, ‘Muhulishitsi! Nzitsanga khuchila matiinyu kalikwila vandu va Yuda nende vandu voosi va Yerusalemi, matiinyu koosi ka nali ninavoola kalivakwila. Nalomoloma khuvo, navutswa vayambakhana khumbulishitsa; navalaanga, navutswa shivanjipa tawe.’ ”

¹⁸Navutswa Yeremia yavoolela vandu vu lwivulu lwa Rekabu, “Mwami Nyasaye wi Mikaanda Chiliihe avoolanga, ‘Munyi mwalonda malako ka kuuka wenyu Yonadabu, halala na mivaalo keke khandi numukhola shia shindu shiosi, shia yali niyavoola.’

¹⁹Khulwa yako, Inzi Mwami Nyasaye wi Mikaanda Chiliihe mbolanga, ‘Yonadabu mwana wa Rekabu, shialiitsa khuvula khuva nu mwitsukhulu uliitsa khundumishila tawe.’ ”