Read tsotso YEREMIA 37 Bible Online

YEREMIA 37 - tsotso bible

YEREMIA 37

¹Mwami Nebukadineza wa Babilonia yamihitsa Zedekia mwana wu Mwami Yosia wa Yuda havukono ha Yehoyakini mwana wa Yehoyakimu.

²Navutswa Zedekia inoho varumishi veve inoho vandu vi shivala shienesho vambakhana khuhulishitsakhu likhuva liu Mwami Nyasaye yali niyavoola khuvirila khu Yeremia.

³Mwami Zedekia yaruma Yehukali mwana wa Shelemia, musalisi Zefania mwana wa Maseya khureeva Muprofeti Yeremia, “Nuyaanza khakhusaalili khu Mwami Nyasaye, uli Nyasaye weru.”

⁴Khali Yeremia yali nashili mulakhule khuchenda shia havundu hosi ha yenyanga mu vandu, shichila yali nashili khuvohwa mucheela.

⁵Navutswa mukaanda kwa vasikali vu Mwami wa Misri, vali varuli mu shivala shia Misri. Lwa mukaanda kwa vasikali va Vababilonia vali nivavotokhananga litaala likali lia Yerusalemi vahulila makhuva khulondokhana khuvo; vilukha khurula mu Yerusalemi.

⁶Khulwa yako, Mwami Nyasaye yavoolela Yeremia,

⁷“Inzi Mwami Nyasaye, uli Nyasaye wa Israeli, mbolanga, ‘Simukha utsi khuvoolela Mwami wa Yuda wakhuruma khwitsa khundeva katsitsanga khwikholekha, ndi mukaanda kwa vasikali vu Mwami wa Misri vali nivitsa khukhukhonya vali himbi khukalukha mu shivala shiavo shia Misri.

⁸Vababilonia valiitsa khukalukha khukwana litaala likali yili; valiitsa khulivukula ni tsingulu, khulisamba nu khulilaalitsa nu mulilu.’

⁹Inzi Mwami Nyasaye mbolanga ndi muvuli khwikaata vene, numuvoola, ‘Toto, Vababilonia valiitsa khurulaho.’ Shivaliitsa khurulaho tawe!

¹⁰Khali niiva mulakuura mukaanda kwa vasikali va Vababilonia voosi vamukwananga, vandu vasalilitswa ni tsinguma vonyene varikale nivali mu maheemo kavo, vandu venavo navo valiitsa khusinjila nu khusamba khandi khulaalitsa litaala likali yili.”

¹¹Lwa vasikali va Vababilonia vali nivilukha mu Yerusalemi shichila mukaanda kwa vasikali vu Mwami wa Misri vali nivaroonjele vitsanga,

¹²Yeremia yarula mu litaala likali natsia mu lusomo lwa Benyamini, khutsia khuheelwakhu shitonye shieshie khurula khu miandu chia vandu vi inzu yeye.

¹³Navutswa lwa yali niyakhatukha ha Shilivwa shia Benyamini, mwimilili wimililanga valindi, walaangwangwa Iriya mwana wa Shelemia, mwana wa Hanania yavoha mucheela Muprofeti Yeremia; navoola, “Wilukhanga khutsia khwiyunga na Vababilonia!”

¹⁴Khulwa yako, Yeremia yamuvoolela, “Uvooli vuvehi! Shinyala khuva nzilukhanga khutsia khwiyunga na Vababilonia tawe.” Navutswa Iriya yambakhana khumuhulishitsa. Nikhali, yakumila Yeremia, namuhila khu vimilili.

¹⁵Vavukulila vurima Yeremia, nivahaana lilako ashiutwi nukhuvohwa mu inzu yu mukarani Yonatsani, ya vali nivakholi khuva icheela.

¹⁶Yeremia yali yavohwa hasi hi icheela khumatukhu manyishi.

¹⁷Mwami Zedekia yaruma mundu khutsia khumulaanga namwinjilitsa vulahi. Mwami Zedekia yamureeva mareevo muvwivisi mu inzu yeye; navoola, “Toto, unyala khuva unyolikhu likhuva liosi khurula khu Mwami Nyasaye?” Yeremia yamuchipa, “Ndi nalio.” Nalwo lwa Yeremia yavoola, “Mwami wa Babilonia aliitsa khukhukumila ni tsingulu.”

¹⁸Nalwo lwa Yeremia yareeva Mwami Zedekia, “Nu vutamanu shina vwakholi khu yivi, inoho khu varumishi vovo inoho khu vandu yava kakhukholi numboha mucheela?

¹⁹Ni hena ha vaprofeti vovo vali vakhuprofetela, ‘Mwami wa Babilonia shialiitsa khwitsa khukhukwana inoho khukwana shivala yishi tawe?’

²⁰Navutswa yivi Mwami Zedekia, nuyaanza umbulishitsi. Lekha khuvoolele ka nyenyanga ukholele; lekha khungalushitsa mu inzu yu mukarani Yonatsani khutsia khukhutsilayo.”

²¹Khulwa yako, Mwami Zedekia yahaana lilako Yeremia avishwi mu lwanyi lwa valindi; khandi shia litukhu yaheelwa mukati kwa vakandanga mu tsinjila tsi litaala likali, khutukha lwi mikati chiosi mu litaala likali lienelo chiamala nichivwa. Yeremia yatsililila khumenya mu lwanyi lwa valindi.