Read tsotso YEREMIA 38 Bible Online

YEREMIA 38 - tsotso bible

YEREMIA 38

¹Shefatia mwana wa Matani, Gedalia mwana wa Pashuhuri, Yehukali mwana wa Shelemia, nende Pashuhuri mwana wa Malikia vahulila makhuva ka Yeremia yali navoolelanga vandu voosi; lwa yavoola,

²“Mwami Nyasaye avoolanga, ‘Mundu wanarikale mu litaala likali yili aliitsa khwiirwa ni shivavi, inzala inoho lukhutsu; navutswa mundu uliitsa khutsia khwiyunga na Vababilonia alatsililila khuva mwoyo. Aliitsa khwihonolokha khwiirwa; khandi atsililile khuva mwoyo.’

³Nali vavoolele khandi ndi Mwami Nyasaye yali uvooli, ‘Toto, niitsa khuchila vasikali va Vababilonia valivukula litaala likali yili, nu khulikumila ni tsingulu.’ ”

⁴Khulwa yako, vimilili vavoolela Mwami Zedekia, “Mundu uyu utukhane khwiirwa; shichila ukholi vasikali varikala mu litaala likali khukhutsa mwoyo, khali vandu vandi voosi, khurulana khu vindu via alomolomanga yivi. Mundu uyu shikali ali ni lienya liu khukhonya vandu vamenye vulahi tawe; navutswa avenyelanga vindu vitamanu khuvakwila.”

⁵Mwami Zedekia yavoola, “Loli! Neye uyu! Mukholi ka mulolanga ni malahi! Mbulakhu vunyali vukhumwikalila kamwenyi khumukhola.”

⁶Khulwa yako, vavukula Yeremia manivamusiuva mu shisima shia Malikia mwana wu Mwami Zedekia; shisima shienesho shiali mu lwanyi lwa valindi. Vishitsila Yeremia khu mikoye khutukha mu shisima. Matsi kali kakhaama mu shisima shienesho; matohi konyene nako kalimu; Yeremia yakhaamila mu matohi kenako.

⁷Navutswa mundu walaangwangwa Ebedimeleki, wali nali shitsili mu inzu yu vwami yahulila likhuva vamali khuvikha Muprofeti Yeremia mu shisima. Khulitukhu lienelo, Mwami Zedekia yali wikhale ha Shilivwa shia Benyamini.

⁸Ebedimeleki yarula mu inzu yu vwami; natsia khumuvoolela,

⁹“Yivi Mwami Zedekia, vandu yava vakholi shikholwa shitamanu khu Muprofeti Yeremia. Vamusiuvi mu shisima, havundu ha inzala imwiirila lwa mikati chivula mu litaala likali.”

¹⁰Nalwo lwa Mwami Zedekia yavoolela Ebedimeleki Muetsopia, “Vukula vandu vavaka khurula hanu mutsi khukhwesa Yeremia khurula mu shisima nashili khukhutsa.”

¹¹Khulwa yako, Ebedimeleki yavukula vandu venavo natsia navo havundu handi havundu hi livishilu li tsinguvu liavetsanga mu inzu yu vwami. Yavukula tsinguvu tsindala tsia mataasi nende tsiarandukha khurulayo maniyelelitsila khu mikoye khutukha khu Yeremia mu shisima shienesho.

¹²Nalwo lwa Ebedimeleki Muetsopia yavoolela Yeremia, “Yivohe mukwaho mwi mikhono chiochio tsinguvu tsia mataasi yitsi; khwenya mikoye khuvula khukhusalilitsa.” Yeremia yakhola khuli yavoolelwa.

¹³Vamukhwesa ni mikoye nivamurulitsa mu shisima shienesho. Khulwa yako, Yeremia yatsililila khumenya mu lwanyi lwa valindi.

¹⁴Mumatukhu kandi, Mwami Zedekia yarumana Muprofeti Yeremia. Muprofeti Yeremia yalerwa mu vwinjililu vwa khavaka vwi Litempeli liu Mwami Nyasaye. Mwami Zedekia yareeva Yeremia, “Ndi ni shindu shia nyenyanga khukhureeva; lekha khumbisakhu shindu.”

¹⁵Yeremia yavoolela Mwami Zedekia, “Niiva nakhuvoolela katoto, unyala khunziira? Ni kilikali, unyala khulekha khunziira? Khali nikhukhonya inganakani, shisuuvilanga unyala khumbulishitsa tawe.”

¹⁶Navutswa Mwami Zedekia yisuuhila Muprofeti Yeremia muvwivisi, navoola, “Mali khwisuuha khuvirila mu lira liu Mwami Nyasaye uli mwoyo, uchilanga nu khwesesa ndi shinzitsanga khukhwiira inoho khukhola vandu vakhavanga khuli vanyala khukhwiira, vakhwiire tawe.”

¹⁷Nalwo lwa Yeremia yavoolela Mwami Zedekia, “Mwami Nyasaye avoolanga, ‘Niiva unyala khwilakhula mwene khu vimilili vu Mwami wa Babilonia, shiuliitsa khwiirwa inoho litaala likali yili khusambwa nu mulilu tawe. Yivi nende vandu vi inzu yoyo muliitsa khutsililila khuva mwoyo.

¹⁸Navutswa niiva uliitsa khwambakhana khwilakhula mwene khu vimilili vu Mwami wa Babilonia, Mwami wa Babilonia mwenoyo aliitsa khuvukula ni tsingulu litaala likali yili, nu khulisamba nu mulilu. Shiuliitsa khwihonolokha khurula khuvo tawe.’ ”

¹⁹Mwami Zedekia yavoolela Yeremia, “Naria Vayahudi vilukha nivatsia khwiyunga na Vababilonia, shichila haundi Vababilonia valiitsa khumbila khuvo, navo valiitsa khunyashitsa.”

²⁰Yeremia yachipa, “Shikanyala khwikholekha kario tawe. Uhulishitsi vutswa ku Mwami Nyasaye avooli khandi ukhole kambolanga. Nalwo lwa uliitsa khumenya vulahi, nu khuvula khwiirwa.

²¹Navutswa niiva ulava nu mwoyo ku khwambakhana khwihaana mwene, Mwami Nyasaye umali khumanyinya malolo.

²²Mu malolo kenako, nalola vandu vakhali voosi vali nivarikala mu inzu yu Mwami wa Yuda nivahilwangwa khu vimilili vu Mwami wa Babilonia, nivavoola, ‘Valina vovo va wali nu wasuuvilila vakhukaati, vamali khukhukuura; lwa wiyinikha mu matohi, voosi va khwilukha.’

²³“Vakhali vovo voosi nende vaana vovo valiitsa khuhilwa khu Vababilonia. Khali yivi mwene, shiuliitsa khwihonolokha khurula khuvo tawe; navutswa Mwami wa Babilonia aliitsa khukhukumila ni tsingulu; khandi nivi uliitsa khuchila litaala likali yili khusambwa nu mulilu.”

²⁴Zedekia yavoolela Yeremia, “Ukhavoolelakhu mundu wundi wosi makhuva kakhulomolome nivi yaka tawe. Niiva uliitsa khwambakhana khukhola ndio, ulatsililila khuva mwoyo.

²⁵Niiva vimilili vanyala khuhulila ndi nomolome khu yivi, nu khwitsa khukhuvoolela, ‘Khakhuvoolele makhuva ka uvoolele Mwami Zedekia, khandi ku Mwami Zedekia akhuvoolele; uvuli khukhuvisakhu shindu. Niiva uliitsa khukhuvisa, khulakhwiira.’

²⁶Nalwo lwa uvavoolela, ‘Mbolele Mwami Zedekia, nayaanza avuli khungalushitsa mu inzu ya Yonatsani, khutsia khukhutsilayo.’ ”

²⁷Vimilili voosi vasimukha nivatsia khulola Yeremia, nivamureeva mareevo. Yavachipa shia shindu shiosi shiu Mwami Zedekia yali namuvoolele avoole. Shivavoolakhu likhuva lindi liosi tawe, shichila mundu avulakhuho wahulila khuli vali nivalomolome nu Mwami Zedekia.

²⁸Yeremia yatsililila khumenya mu lwanyi lwa valindi khutukha khulitukhu, lia litaala likali lia Yerusalemi liakumilwa ni tsingulu.