Read tsotso YEREMIA 42 Bible Online

YEREMIA 42 - tsotso bible

YEREMIA 42

¹Vimilili voosi vi mikaanda chia vasikali, khali Yohanani mwana wa Kareya nende Azaria mwana wa Heshaya, halala na vandu voosi, vakali khu vati, visuunda himbi

²nivavoolela Muprofeti Yeremia, “Nuyaanza khukholele ka khwenyanga! Khusaalilikhu khu Mwami Nyasaye, uli Nyasaye wowo. Saalilakhu vandu voosi varikala mwoyo. Matukhu kandi khwali vanyishi; navutswa nunundi khwarikala isavu indititi ya vandu, khuli lwa mwene ulolanga ni tsimoni tsiotsio.

³Khusaalilikhu khu Mwami Nyasaye, uli Nyasaye wowo akhumanyinyi injila yakhuchendelakhu khandi muhinzilu kwa khutukhananga khuve nu khukholanga.”

⁴Muprofeti Yeremia yavachipa, “Nu vulahi muno. Mbulili; ni kilikali, nzitsanga khusaala khu Mwami Nyasaye, uli Nyasaye wenyu khuli munyi vene mwenyanga. Namuvoolela shia shindu shiosi shiu Mwami Nyasaye avoola. Shindu shivulakhuho shia nzitsanga khumuvisa.”

⁵Nalwo lwa vavoolela Yeremia, “Khwikombanga ndi Mwami Nyasaye ave mushiahidi weru watoto khandi musuuvilwa, niiva khulambakhana khukhola shia shindu shiosi shiu Mwami Nyasaye avooli khukhole khuvirila khu yivi.

⁶Kave ni malahi inoho matamanu, khulahulishitsa makhuva ku Mwami Nyasaye, uli Nyasaye weru, wa khukhurumakhu, khu khumenye limenya lilahi; shichila khutsitsanga khuhulishitsa makhuva ku Mwami Nyasaye, uli Nyasaye weru avoola.”

⁷Matukhu likhomi nikakhavwa, Mwami Nyasaye yalomoloma khu Yeremia.

⁸Nalwo lwa Yeremia yalaanga halala Yohanani mwana wa Kareya nende vimilili voosi vi mikaanda chia vasikali va yali nali navo, khali vandu voosi khuraanjila khu vakali khu vati.

⁹Yavavoolela, “Mwami Nyasaye, uli Nyasaye wa Israeli, wamwandumakhu khutsia khumureevela ka mwenyanga amukholele avoolanga,

¹⁰‘Niiva mulatsililila khumenya mu shivala shinu, niitsa khumumbakha khandi mbuli khumutivitsa. Niitsa khumuraaka, khandi mbuli khumurinyuula; shichila nzitsanga khwikanila vutamanu vwa nachila nu vumukwila.

¹¹Muvuli khuria Mwami wa Babilonia, uchilanga numuria nunundi. Muvuli khumuria, shichila ndi na munyi khumuhonyinya, khandi khumurulitsa khuye. Inzi Mwami Nyasaye mali khuvoola.’

¹²Niitsa khumuvela tsimbavasi, khu khali ye alimuvelela tsimbavasi; khandi alimukhola khutsililila khumenya mu shivala shienyu.

¹³“Navutswa niiva mulatsililila khuvoola, ‘Shiukhunyala khutsililila khumenya mu shivala shinu tawe,’ khwambakhana khuhulishitsa makhuva ku Mwami Nyasaye, uli Nyasaye weru,

¹⁴numuvoola, ‘Khulatsia khumenya mu shivala shia Misri, wa liihe livula, wa shisiliva shivula khukhuvwa inoho inzala yosi ivula;’

¹⁵nalwo lwa Mwami Nyasaye amuvoolela, ‘Munyi vandu varikala mwoyo Yuda, Mwami Nyasaye wi Mikaanda Chiliihe, uli Nyasaye wa Israeli avoolanga ndi niiva muli nu mwoyo ku khutsia khumenya mu shivala shia Misri,

¹⁶liihe lia munyi vene mwaria nalio liliitsa khumukwilayo; khandi inzala yamwaria, nayo iliitsa khumunyola mu shivala shia Misri; khandi mulikhutsilayo.

¹⁷Vandu voosi valiitsa khwenya khutsia khumenya mu shivala shia Misri valiitsa khwiirwa ni shivavi, inzala nende lukhutsu. Khali mulala khuvo shialiitsa khwihonolokha tawe; khali mulala avulakhuho uliitsa khurikala nashili mwoyo, inoho khwihonolokha khurula khu matiinyu katsitsanga khuvakwila.’

¹⁸“Mwami Nyasaye wi Mikaanda Chiliihe, uli Nyasaye wa Israeli avoolanga, ‘Khuli lwa navukulila vurima khandi nimba mululu khu vandu va Yerusalemi, nindio khandi niitsa khumuvukulila vurima lwa mutsia mu shivala shia Misri. Muliitsa khuva shindu shiu khunyekwa, khurishitswa, khulaamwa nu khukholelwa tsisoni. Shiumuliitsa khulolakhu havundu hanu khandi tawe.’ ”

¹⁹Yeremia yavoolela vandu, “Munyi vandu vamwarikala mu shivala shia Yuda, Mwami Nyasaye yamuvoolela, ‘Mukhatsiakhu mu shivala shia Misri tawe.’ Toto muchelihi mumanye havulavu ndi nunundi muchelihitsi

²⁰ndi mulava numukholi shindu shitamanu shinyala khumulerela likhutsa; lwa mwanduma khutsia khumureevela khu Mwami Nyasaye, uli Nyasaye wenyu; khandi numuvoola, ‘Khusaalilikhu khu Mwami Nyasaye, uli Nyasaye weru; ukhuvoolele shia shindu shiosi shia khuvoolela khukhole.’

²¹Mali khumuvoolela nunundi, navutswa mwambakhane khuhulishitsa makhuva ku Mwami Nyasaye mu shia shindu shiosi, shia yanduma khwitsa khumuvoolela.

²²Khulwa yako, khutukha mumanye ndi muliitsa khwiirwa ni shivavi, inzala, nende lukhutsu havundu ha mwikombanga khutsia khumenya.”