Read tsotso YEREMIA 48 Bible Online

YEREMIA 48 - tsotso bible

YEREMIA 48

¹Mwami Nyasaye wi Mikaanda Chiliihe, uli Nyasaye wa Israeli yalomoloma khu shivala shia Moabu, navoola, “Wooyi! Muli khu vutiinyu munyi vandu va Nebo, shichila litaala lienyu liayononyinywa! Litaala lia Kiriatsahimu liaheelwa tsisoni, liavukulwa ni tsingulu; imbinga yalio yaheelwa tsisoni khandi yapomolwa,

²vukhumi vwa Moabu vwamala khukora; vandu valoshitsila mu litaala lia Heshiboni khuli valitivitsa; vavoola, ‘Chendi khutivitsi luhia lwa Moabu.’ Khali munyi Vandu Valalukha muliitsa khuhonjelitswa; mukaanda kwa vasikali valiitsa khumuhitsanyinya.

³“Hulishitsikhu khuli vandu valilanga Horonahimu, tsikhwili tsiu khwononyinywa nu khutivitswa.

⁴Shivala shia Moabu shiativitswa; khulila khwavo khuhulilikhananga Sohari.

⁵Vatikulukhanga mu litaala lia Luhitsu, valilanga tsikhwili nivatsia; lwa vakholomokhanga Horonahimu vahulilanga khulila khukhutivitswa.

⁶Yilukhi! Mwihonyinyi vene! Kwi khuli ipunda yumbulimu mu shiangalangwi!

⁷“Shivala shia Moabu, lwa wasuuvila mu tsimbinga tsiotsio nende mavishilu koko, khali yivi uliitsa khuvukulwa; nyasaye wowo Chemoshi aliitsa khuhilwa mu vuhaambe, halala na vimilili veve nende vasalisi.

⁸Mutivitsi aliitsa khutivitsa shia litaala liosi, litaala livulakhuho liliitsa khwihonolokha; shia shindu shiosi mu luhoongo shiliitsa khutiva, khandi mu lwomera shiliitsa khutivitswa. Inzi Mwami Nyasaye mali khuvoola.

⁹“Nu vulahi shivala shia Moabu khuheelwa tsimbaha, shiakhapulushi ihale wene; mataala kashio kakhavele nikakwa lichiinga, mundu yakhavuli khuvaho unyala khumenya muko.”

¹⁰Shilaamo shive khu mundu wambakhananga khukhola nu mwoyo kwosi muhinzilu ku Mwami Nyasaye yamuha! Shilaamo shive khu mundu wiyikalilanga khwiira ni shivavi shieshie!

¹¹Mwami Nyasaye yavoola, “Shivala shia Moabu shiamenya mu vuyaanzi khurula khale, shili khuli idivai yalekhwa khwetetekha; ishili khutsukhululwakhu khurula mu shindu khutsia mu shindi, inoho khuhilwa mu vuhaambe; mutsanzo kwa Moabu kushiliho khandi shihuunyanga vutswa khuli lwa shiali.

¹²“Khulwa yako, matukhu kali himbi khutukha, lwa niitsa khuruma vandu khwitsa khutsukhulula idivai yavo. Valiitsa khwalaminya tsinyungu tsiavo, nu khutsiaraanyinya mu vikonjio.

¹³Nalwo lwa shivala shia Moabu shilitsa khulolela Chemoshi tsisoni, khuli Vaisraeli valolela tsisoni litaala lia Betseli, liali khuli lisuuvilitsa liavo.

¹⁴“Vandu va Moabu, munyala khuvoola munjila shina, ‘Khutsi ni vasikali, vandu vi tsingulu mu liihe?’

¹⁵Mutivitsi wu khutivitsa Moabu nende mataala keke umali khwitsa; vasatsa veve vavukha vi tsingulu vasinzwa. Inzi Mwami, uli Mwami Nyasaye wi Mikaanda Chiliihe mali khuvoola.

¹⁶Matiinyu kali himbi khukwila shivala shia Moabu; shilitsa khutivitswa vwangu yuvu.

¹⁷Munyi voosi vareende va Moabu, mumwikhule, munyi voosi vamwamanya luyali lwelwe; muvoole, ‘Indovoshi yeye yu vunyali yamenekha, nulili lusala lu vukhumi.’

¹⁸Munyi vandu va Diboni, yikhi khurula havundu henyu ha mwaheelwa vukhumi mwikhale hasi mu lukuushi; shichila mutivitsi utivitsanga Moabu yitsanga khumutivitsa; wativitsa tsimbinga tsienyu.

¹⁹Munyi vandu va Aroheri, musinjile khundulu khu muhaanda numuheenza. Reevi mundu wilukhakanga khandi wilukhanga, ‘Ni shina shikholeshe?’

²⁰‘Shivala shia Moabu shiaheelwa tsisoni, shichila shiativitswa. Mwikhule numulila tsikhwili! Landitsili ha Muchela kwa Arunoni ndi shivala shia Moabu shiativitswa!’

²¹“Mataala kali havundu hichinguukha kamali khukhalachilwa; mataala ka Holoni, Yahaza, Mefatsi,

²²Diboni, Nebo, Betsi-dibulatsahimu,

²³Kiriatsahimu, Betsi-gamali, Betsi-mehoni,

²⁴Keriotsi nende Bozira. Mataala koosi mu shivala shia Moabu kali himbi khandi ihale wene, kamali khukhalachilwa.

²⁵Vunyali vwa Moabu vumali khuvwa; tsingulu tsia Moabu tsimali khutivitswa. Inzi Mwami Nyasaye mali khuvoola.”

²⁶Mwami Nyasaye yavoola, “Tanditsi shivala shia Moabu, shichila shichinjilila imbeli wanje inzi Mwami Nyasaye. Shivala shia Moabu shiliitsa khukalaakala mu masali kashio, khandi vandu valiitsa khushikholela shihenye henye.

²⁷Shivala shia Moabu shiakholela Vaisraeli shihenye henye, khali niiva shishiakumilwa mu vihuuvi tawe; navutswa shianuyanyinya murwi, lwa walomoloma khu shivala shienesho.

²⁸“Munyi vandu vi shivala shia Moabu, ruli mu mataala kenyu mutsi khumenya mu lwanda. Muve khuli shituti shiumbakhanga shitsu mu vwinjililu vu luhangaywa.

²⁹Khumali khuhulila makhuva khuli shivala shia Moabu shili nu vwiloli; Shivala shia Moabu shia yichinjilila muno. Khuvoolelwi makhuva khulondokhana khu vwiloli vwashio; khuli shilolanga nu khwihulila mu mwoyo vulahi.

³⁰“Inzi Mwami Nyasaye namanya khuli shili ni shileeche, vwichinjililu vwashio nu vuvehi, vikholwa viashio ni viu vuvehi.

³¹Khulwa yako, nzikhulanga Moabu, ndilanga tsikhwili shichila Vamoabu voosi. Nzikhulanga shichila vandu vi litaala lia Kiru-heresi.

³²Munyi vandu va Sibuma, ndilanga tsikhwili shichila munyi, khuvira khuli nalilila vandu vi litaala lia Yazeri. Munyi vandu vi litaala lia Sibuma, muli khuli musabibu kuli nu lusia lutukhanga khu Inyanza yi Ichumbi nu lutsia khutukha Yazeri. Navutswa matunda kenyu ku mumatukhu ki shimiyu nende matunda ki misabibu kamali khutivitswa.

³³Lisangala nende vuyaanzi viamali khurulitswaho, mu shivala shia Moabu shi lilova linuulu; Namala khusinjilitsa idivai havundu ha vaminilanga idivai; mundu avulakhuho ulombanga idivai nalaanjilila nu vuyaanzi; khali niiva valaanjililanga, khulaanjilila khu vuyaanzi khuvulaho.

³⁴“Mwoyo kwa valilanga kuhulilikhananga mu litaala lia Heshiboni khutukha Elehale nende Yahazi; kutsilililanga khurula mu litaala lia Zohari khutukha Horonahimu nende Egilatsi-shelishiya; khali matsi kali mu Muchela kwa Nimurimu kakhaamila hasi.

³⁵Niitsa khukaya Vamoabu khuvula khukhola musango kwi vihanwa viu khusambwa havundu ha vasaalilanga khu vanyasaye vavo. Inzi Mwami Nyasaye mali khuvoola.

³⁶“Khulwa yako, nzikhulanga mu mwoyo kwanje, khuli mundu ukhuvanga indulelo shichila Moabu; khandi shichila vandu vamenyanga Kiru-heresi; shichila miandu chia vanyola chiosi chiakora.

³⁷Vaveeka mirwi chiavo nende mateelu kavo khwikhula. Vayisalaka mikhono chiavo; khandi vifwalanga tsinguvu tsialombwa khu makunia.

³⁸Khulila nu khwikhula mu vuveleli khuliitsa khuhulilikhana shia havundu hosi mu tsingo tsia Vamoabu khandi khu tsinjila; shichila mali khutivitsa shivala shia Moabu, khuli mundu yaraanyinyanga ichupa ikhulu, yalolanga ni indamanu.

³⁹Lolikhu khuli shivala shia Moabu shiaraanyinywa! Lolikhu khuli vandu vikhulanga. Khuli shivala shia Moabu shiaheelelwa tsisoni! Shiakwa khuli shindu shiu khukholelwa shihenye henye, shimanyilu shiu khutivitswa khu vareende vavo voosi.”

⁴⁰Mwami Nyasaye avoolanga, “Luhia luliitsa khwikha hasi khukwana Moabu, khuli shilitsa nishipulukhanga nishivambule tsimbaha tsiashio.

⁴¹Mataala keke kaliitsa khuvukulwa khandi tsimbinga tsietsie tsivukulwi. Khulitukhu lienelo, musikali wa Moabu aliitsa khuria khuli mukhali uhulilanga isalila niyivula.

⁴²Shivala shia Moabu shiliitsa khutivitswa nu khuvula khuva luhia, shichila shichinjilila shiene imbeli wanje inzi Mwami Nyasaye.

⁴³Vamoabu valiitsa khurishitswa, vakwi mu vwina, nende mu ineti. Inzi Mwami Nyasaye mali khuvoola.

⁴⁴Yavo valiitsa khuva nivilukhanga khurishitswa valiitsa khukwa mu mureeko, khandi yavo valiitsa khuva nivilukhanga mureeko, valiitsa khukwa muvuuko. Niitsa khulola ndi kakholeshe munjila yeneyo, shichila litukhu liu khukhalachila limali khutukha. Inzi Mwami Nyasaye mali khuvoola.

⁴⁵Vandu valiitsa khwilukha khutsia khutukha Heshiboni, navutswa valiitsa khuvwa tsingulu tsiu khutsililila; shichila mulilu kuliitsa khurula Heshiboni, wu Mwami Heshiboni yivulwa, makusambe shivala shiosi, halala na vandu vahingani vali mushio.

⁴⁶Munyi Vamoabu, muli khu vutiinyu! Vandu vasaalanga khu Chemoshi vamali khutivitswa, vaana venyu vi shiyayi vahilwa mu vuhaambe, vaana venyu vi shikhana muvuvohe.

⁴⁷Navutswa niitsa khukalushitsila Vamoabu miandu chiavo mumatukhu ku khumalilikha. Inzi Mwami Nyasaye mali khuvoola.” Nalio limalila li likhalachilwa lia Moabu.