Read tsotso YEREMIA 51 Bible Online

YEREMIA 51 - tsotso bible

YEREMIA 51

¹Mwami Nyasaye avoolanga, “Niitsa khuvwanyinya mulilu mu mutivitsi uliitsa khutivitsa Babilonia, halala na Vababilonia.

²Niitsa khuruma vacheni mu Babilonia khwitsa khumwilula nu khutivitsa shivala shienesho; valiitsa khukwana litaala lia Babilonia mu tsimbeka tsiosi khulitukhu lia liliitsa khutivitswa.

³Lekha khuhaakhu vasikali valio vwiyangu vu khulesa mivanu inoho khwifwala tsinguvu tsiu khukwanila. Uvuli khuvelakhu tsimbavasi vasatsa valio vavukha; tivitsa vasikali valio khutukha lwa voosi vavwa.

⁴Valiitsa khwiirwa mu shivala shia Vababilonia, nivasalilitswa vululu muno mu tsinjila tsi litaala liavo;

⁵shichila Mwami Nyasaye wi Mikaanda Chiliihe, uli Nyasaye wavo, ashili khwivililakhu Israeli nende Yuda. Khali niiva vakhola vwoni imbeli wanje Inzi Nyasaye Mutakatifu wa Israeli.

⁶Yilushi muruli mu shivala shia Babilonia! Shia mundu wosi ahonyinyi vulamu vwevwe! Muvuli khutivitswa shichila vwoni vwa Babilonia. Nzitsanga khuvanzila, khandi vasalilitse khurulana khu vikholwa viavo vene.

⁷Litaala lia Babilonia liali khuli shikombe shialombwa khu itsahabu khwinzi, shikombe shiachila vandu voosi khulilova nivatanda. Vandu vi tsimbia tsiosi vang'wa idivai yalio khali nivalalukha.

⁸Navutswa nonoho litaala likali lia Babilonia liativitswa niliyongovela! Mwikhule litaala likali lienelo! Muliitsa khulikhavila lunyasi shichila likuule lialio; haundi liliitsa khuhona.

⁹Khwachelitsa khuhonyinya litaala lia Babilonia, navutswa shiliali liahonyinywa tawe. Leshi khulivale, khutsi mu shivala shieru, shichila liliitsa khukhalachilwa vululu muno khali khutukha mwikulu.”

¹⁰Mwami Nyasaye avoolanga, “Vandu vaanje valaanjililanga, nivavoola, ‘Mwami Nyasaye umali khumanyinya ndi khuvula vutamanu vwosi. Hambi khutsi khulanditsa makhuva kenako mu Sayoni muhinzilu ku Mwami Nyasaye, uli Nyasaye weru.’ ”

¹¹Yuchihitsi mivanu, mwiyavaale tsingavo! Mwami Nyasaye umali khuvwanyinya mulilu mu vami vamihanga Media, shichila yenyanga khutivitsa Babilonia. Mwami Nyasaye yenyanga khuvanzila, khuvanzila lwa vativitsa Litempeli lielie.

¹²Chinguli ipendera khuva khuli shimanyilu shiu khukwana lisisi lia Babilonia. Tinyilitsi valindi, vishiho valindi; mwirecheshe khuli mukwana! Mwami Nyasaye umali khurweshitsa ka yali niyavoola aliitsa khukhola Vababilonia.

¹³Munyi litaala litsula matsi khandi lili ni livishilu linyishi, umali khutukha khushihakaamo, litukhu liu khutivitswa limali khukhutushila.

¹⁴Mwami Nyasaye wi Mikaanda Chiliihe yisuuha mwene, navoola: “Ni kilikali, niitsa khwitsulitsa mu mataala kenyu vatsiku, khuli tsisichi tsishilanga mu milimi, navo valiitsa khukhuva liyooko liu khukhukuura yivi.”

¹⁵Mwami Nyasaye neye waloonga lilova khuvirila mu tsingulu tsietsie, neye walomba shivala khuvirila mu vusitsa vwevwe, nu khuvambalitsa likulu khuvirila mu limanya lielie.

¹⁶Lwa Nyasaye akondekhangakhu vutswa, matsi kakulukhanga nikarula mwikulu, khandi alombaga liime liama shia havundu hosi khulilova. Neye uchilanga luheni nuluhemukha ma lulera imbula; alombanga vushindu vuhuutsa khurula mu livishilu lielie.

¹⁷Shia mundu wosi nu muyiingwa khandi avula vucheli, shia mwiraanyi wosi anyolanga tsisoni shichila misambwa chiechie; shichila vifwanani vievie ni viu vuvehi, khandi vivula miuya chiu khwesesa muvio.

¹⁸Viosi ni vikhaya vutswa, ni mihinzilu chiu vuvehi; viliitsa khutivitswa lwa matukhu kaviritswa kaliitsa khuva nikakhatukha.

¹⁹Navutswa Nyasaye wa Yakobo shianyala khusasanywa khuchio tawe; shichila neye waloonga vindu viosi, Vaisraeli ni vandu veve va mwene yarovola; Lira lielie ni Mwami Nyasaye wi Mikaanda Chiliihe.

²⁰Mwami Nyasaye avoolanga, “Litaala lia Babilonia, nivi inyundu yanje, shiuchi shianje shiu khukwanila; nivi wa narumishila khutivitsa vandu vi tsimbia tsindi nivi wa narumishila khumulula vwami;

²¹Nivi wa narumishila khusionolanyinya tsifarasi nende vahili vatsio, Nivi wa narumishila khusionolanyinya makaare ki liihe nende vahili vako.

²²Nivi wa narumishila khusionolanyinya musatsa nende mukhali; Nivi wa narumishila khwiira musakhulu nende muyayi muvukha, Nivi wa narumishila khwiira mwana wi shiyayi nende wi shikhana.

²³Nivi wa narumishila khwiira mwayi nende shiayo shi miruku chiechie, Nivi wa narumishila khwiira mwami nende mwimilili wa vasikali.”

²⁴Mwami Nyasaye avoolanga, “Niitsa khusalilitsa Babilonia nende Vababilonia nurelekhu tsimoni; shichila vindu vitamanu viosi via vakhola mu Sayoni.”

²⁵Mwami Nyasaye avoolanga, “Yivi Babilonia, uli khuli shikulu shitivitsanga, yivi utivitsanga vandu voosi khulilova; niitsa khunyiila mukhono kwanje khukhusalilitsa, khandi khukalaakalitse mu lwanda, nilikhurika khuli shikulu shiasambwa nu mulilu.

²⁶Khali lichina liosi livulakhuho liliitsa khurulitswa mu munyi khumbashilwa, inoho khuraanjitsa musinji, shichila uliitsa khuva khuli shiangalangwi mihika ni mihika. Inzi Mwami Nyasaye mali khuvoola.”

²⁷Chingula ipendera yu khukwana mu shivala, khuva shisiliva mu vandu vi tsimbia tsiosi; recheshitsa vandu vi tsimbia tsiosi vakwane Babilonia, voolela vwami vwa Ararati, Mini, nende Ashikenatsi vumukwane; rovoli mwimilili wi mikaanda chia vasikali khuvasinjilila; nu mulera tsifarasi khuli shituma shi tsisichi tsipulukhanga.

²⁸Recheshitsa vandu vi tsimbia vamukwane, vami va Medesi, halala na vagavana nende vakhonyani va vagavana, shia shivala shiosi mu lusomo lwavo.

²⁹Shivala shitechelanga nishireenga, shichila lienya liu Mwami Nyasaye liu khutivitsa litaala lia Babilonia ni liatoto, khukhola litaala lia Babilonia shiangalangwi mundu alivula khumenyayo.

³⁰Vasikali va Vababilonia vakhayilwi khukwana; varikale mu tsimbinga tsiavo. Tsingulu tsiavo tsivwele; vamali khukwa khuli vakhali. Tsinzu tsia vamenyamu tsimali khusambwa nu mulilu; milondi chi vilivwa chimali khumunakwa.

³¹Shia mwilukhachi wosi yilukhakanga khwakanila wundi, khandi shia murumwa wosi khutsia khwakanila wundi, khutsia khuvoolela Mwami wa Babilonia ndi litaala lielie limali khuseerwa mu tsimbeka tsiosi.

³²Mutsiku wavukula ni tsingulu wa muchela kwambushilwangwa, tsimbinga tsiasambwa nu mulilu, vasikali vatechelanga.

³³Mwami Nyasaye wi Mikaanda Chiliihe, uli Nyasaye wa Israeli avoolanga, “Litaala lia Babilonia lili khuli havundu ha vilulilanga imu mumatukhu ka ivetsanga niyakhahulakwa; nikhali litukhu liu khucheswa liliitsa khutukha vwangu yuvu.”

³⁴Vandu va Yerusalemi vavoolanga, “Mwami Nebukadineza wa Babilonia wa khumulula, wa khutechelitsa, wa khurika vutswa khuli shivuyi shiele, wa khumiila khuli inzukha imiilanga shindu khandi wa khwikura; nu khukhusuutsulula.

³⁵Leshi vandu va Sayoni vavoole: ‘Vutamanu vwa khutsi nende viikho veru khwakhola vukwili Babilonia.’ Vandu va Yerusalemi vavoole, ‘Shisahi shieru shikwili Vababilonia.’ ”

³⁶Khulwa yako, Mwami Nyasaye yavoolela vandu va Yerusalemi, “Loli! Niitsa khumukholela ka mwenyanga nu khuvanzila shichila munyi; niitsa khukhaaminya inyanza yavo, nu khuminya virula viavo via matsi.

³⁷Litaala likali lia Babilonia liliitsa khukwa shituma shia mashindi kapomolwa, havundu ha vivwe vimenyanga, shindu shiu khurishitswa nu khuchaywa, havundu ha vandu valiitsa khuvula khumenya.

³⁸“Vababilonia valiitsa khuhuma huma khuli tsisimba, valiitsa khuhoola khuli vaana vi isimba.

³⁹Lwa inzala ivalekanga, niitsa khuvakholela mulukha kwi lilia khutukha vatande, varaanje khulaanjilila nu vuyaanzi; valiitsa khutsililila khukona, vakhaywi khuvukha. Inzi Mwami Nyasaye mali khuvoola.

⁴⁰Niitsa khuvakholomoshitsa khuli makondi ku khutsia khusinzwa, khuli mamiiko nende tsimbuli tsisatsa.”

⁴¹Mwami Nyasaye avoolelanga Babilonia, “Litaala lia vandu voosi vitsominyanga mu shivala limali khukumilwa ni tsingulu; Babilonia ni shindu shiu khurishitswa khu vandu vi tsimbia tsiosi!

⁴²Inyanza yakhaaminya Babilonia; maruundu kayo kahililikananga nikalikhunikha.

⁴³Mataala kavo karishitsanga, shivala shiahangalala khandi ni shiangalangwi, mundu avulakhuho wumenyanga mushio, inoho khuchendamu.

⁴⁴Niitsa khusalilitsa Beli mu Babilonia, nu khurulitsa mu munwa kwekwe shindu shia yamiila. Vandu vi tsimbia tsindi shivaliitsa khwitsa khuye tawe. Lisisi lia Babilonia limali khukwa.

⁴⁵“Munyi vandu vaanje, ruliyo! Shia mundu wosi ahonyinyi vulamu vwevwe! Yilushi vurima vwanje vululu!

⁴⁶Muvuli khurimukha ikholo inoho khuria, lwa vandu vavooli makhuva mu shivala; lwa makhuva ka vavooli khumuhika kunu, kandi khumuhika kundi, khandi vutamanu vukholekhanga mu shivala, lwa vami vakwananga vene khuvene.

⁴⁷Khulwa yako, litukhu lili himbi khutukha lwa niitsa khusalilitsa misambwa chia Babilonia; shivala shiavo shiosi shilitsa khuheelwa tsisoni, khandi vandu vamenyanga mulio valiitsa khwiirwa.

⁴⁸Nalwo lwa shia shindu shiosi khulilova nende mwikulu, viliitsa khulaanjilila nu vuyaanzi shichila Babilonia, shichila vativitsi valiitsa khuvakwana khurula ivuluka. Inzi Mwami Nyasaye mali khuvoola.”

⁴⁹Vababilonia valiitsa khwiirwa shichila viira Vaisraeli; valiitsa khwiirwa shichila viira vandu vandi khulilova.

⁵⁰Mwami Nyasaye avoolelanga vandu veve mu litaala lia Babilonia, “Munyi va mwihonolokha likhutsa, ruli hanu, muvuli khulindilila! Munzitsushitse inzi Mwami Nyasaye, khali niiva mumenyanga ihale wene, mukanakane makhuva khulondokhana khu Yerusalemi.

⁵¹Vandu vavoolanga, ‘Khwaheelwa tsisoni; tsisoni tsiakhuleka, shichila vacheni vayinjila Havundu Hatakatifu mu Litempeli liu Mwami Nyasaye.’

⁵²“Navutswa matukhu kali himbi khutukha lwa niitsa khutivitsa misambwa chia Babilonia, ma vandu vasalilitswa valilila tsikhwili shia havundu hosi mu shivala. Inzi Mwami Nyasaye mali khuvoola.

⁵³Khali niiva Babilonia anyala khunina khutukha mwikulu, khali niiva anyala khutinyinya tsimbinga tsietsie tsindambi, naruma vativitsi khwitsa khumukwana. Inzi Mwami Nyasaye mali khuvoola.”

⁵⁴Mwami Nyasaye avoolanga, “Hulishitsikhu khuli tsikhwili tsihulilikhanilanga mu Babilonia, liyooko li tsingulu khuli shivala shia Vababilonia shitivitswa,

⁵⁵lwa inzi Mwami Nyasaye ndivitsanga litaala lia Babilonia; nu khuhonjelitsa liyooko likali lia liyookananga. Mutsiku ayookananga khuli matsi kahilikananga; alaanjililanga liyooko ikulu muno;

⁵⁶shichila mutivitsi witsi khulitivitsa, khutivitsa litaala lia Babilonia; vasikali veve vamali khukumilwa ni tsingulu, vura vwevwe vumali khutong'olwa mu vitonye; shichila inzi Mwami Nyasaye ndi Nyasaye wu salilitsanga; ni kilikali, niitsa khuvanzila ka liakhola kandi.

⁵⁷Niitsa khutanditsa vimilili vavo nende vandu vu vusitsa vavo, vagavana vavo, vimilili vimililanga mikaanda chia vasikali vavo, nende vasikali vavo viliihe; valiitsa khukona tsindolo vuchila khuvukha. Inzi Mwami, uli ni lira lindi Mwami Nyasaye wi Mikaanda Chiliihe mali khuvoola.

⁵⁸“Lisisi likaalamu lia Babilonia liliitsa khulekhanyilwa hasi ma vilivwa vialio viraambi khusambwa nu mulilu. Muhinzilu kwa vandu vakhola nu kwi shikhaya, muhinzilu kwa vandu vi tsimbia tsindi tsiakhola kuliitsa khusambwa nu mulilu. Inzi Mwami Nyasaye wi Mikaanda Chiliihe mali khuvoola.”

⁵⁹Muprofeti Yeremia yahaana mivaalo keke khu Seraya mwana wa Neria, mukuuka wa Maseya, mulala khu varumishi vu Mwami Zedekia, lwa yasimukha natsia naye mu litaala lia Babilonia. Kakholekha khumuhika kwa khane, lwa Mwami Zedekia wa Yuda yamihanga.

⁶⁰Yeremia yali wahandika mu shitabu makhuva khulondokhana khu matiinyu koosi kali nikatsitsanga khukwila litaala li Babilonia

⁶¹Yeremia yavoolela Seraya, “Lwa uliitsa khuva nu wakhatukha mu litaala lia Babilonia, ulole ndi usomi nu mwoyo mukali makhuva kali mu shitabu yishi.

⁶²Uliitsa khusaala, nuvoola, ‘Mwami Nyasaye, nivi wavoola uliitsa khutivitsa havundu hanu, khu mundu inoho tsinyama tsilivula khumenyakhu hanu; haliitsa khuva khuli shiangalangwi mihika ni mihika.’

⁶³Lwa uliitsa khuva nu wakhamala khusoma shitabu shienesho, uliitsa khuvohakhu lichina; nu khulisiuva mu Muchela kwa Efurate,

⁶⁴nuvoola, ‘Nako kaliitsa khukwila litaala lia Babilonia -- shiliitsa khwiyinikha, khali shishiliitsa khusinjila tawe; shichila matiinyu ku Mwami Nyasaye aliitsa khulera.’ ” Makhuva ka Yeremia kamalilishilanga hawenaho.