Read tsotso YEREMIA 6 Bible Online

YEREMIA 6 - tsotso bible

YEREMIA 6

¹Munyi vandu va Benyamini, ruli mu Yerusalemi mwilushile vulindi vulahi! Khuvili shisiliva mu litaala lia Tekoha, numuchingula shimanyilu mu litaala lia Betsi-hakeremi; shichila matiinyu kaliitsa khurula ivuluka, kaliitsa khutivitsa vandu vanyishi.

²Niitsa khutivitsa litaala likali lia Sayoni, lilolekhanga liakaasa khandi liaangu khwononyinywa.

³Vayi ni viayo viavo via makondi valiitsa khulikwana; valiitsa khusimiikha maheemo kavo khulivotokhana, shia mulala niyimililanga shiayo shieshie ha mwene yenyanga.

⁴Valiitsa khuvoola, “Mwirecheshe khukwana litaala likali lia Yerusalemi! Hambi khulikwane tsisaa sita mbasu! Wooyi! Khuli khu vutiinyu, shichila litukhu livwetsanga, shinini shia halukolovo shiraambihanga!

⁵Kholi vwangu, leshi khulikwane mu vutukhu, nu khutivitsa tsinzu tsiu vwami tsiumbakhwa mulio!”

⁶Mwami Nyasaye wi Mikaanda Chiliihe avoolanga, “Muyeelitsi misala chialio; yumbashi tsinjinga khuvotokhana Yerusalemi. Litaala likali yili liliitsa khusalilitswa; shindu shivulakhu mulio nikakhali khutambitsa vandu.

⁷Khuli shisima shitsilililanga khuva na matsi malahi, nindio khandi litaala likali lia Yerusalemi litsilililanga khuva nu vutamanu; visalilitsu nende litivitswa navio vihulilikhananga mulio; vulwale nende makuule navio viandolanga vutswa mu tsimoni tsianje.

⁸Munyi vandu va Yerusalemi, muchelihe, nikakhavele kario, niitsa khumulekha mu vurima, khukhola shivala shienyu khukwa shiangalangwi khali mundu aliitsa khuvula khumenyakhu mushio.”

⁹Mwami Nyasaye wi Mikaanda Chiliihe avoolanga, “Vaisraeli varikala valiitsa khuvunjitswa halala, khuli matunda ki misabibu; khuli mundu yatuulanga matunda khu musabibu, muliitsa khuhavina shia mundu wosi lwa mushili nu vwiyangu.”

¹⁰Nalwo lwa nachipa, “Ni viina wanyala khulomolomakhu muchelihitsi, vahulile? Loli, vayikalwa maroyi, shivanyala khuhulishitsa tawe. Khali ndio, valolanga likhuva liolio yivi Mwami Nyasaye, khuli ni shindu shiu khuseshelela, vayambakhana khulilonda khali hati hene.

¹¹Navutswa inzi nayitsula vurima vu Mwami Nyasaye; khali mbulakhu khuli nyala khuvwikalila.” Mwami Nyasaye yambolela, “Vukulila vurima vwanje vaana vali mu tsinjila tsi litaala likali, vayayi vavukha vivunjelitsi halala; khali vasatsa nende vakhali vavo valiitsa khurulitswaho, khali vandu vahindila nende vasakhulu.

¹²Tsinzu tsiavo tsiliitsa khuheelwa vandi, halala ni milimi chiavo nende vakhali vavo; lwa niitsa khuchingula mukhono kwanje khusalilitsa vandu vene shivala. Inzi Mwami Nyasaye mali khuvoola.

¹³Voosi, khali khuraanjila khu muti khutukha khu mukali, shia mulala nu mwilili khunyola vukhala vwi shikhaya; Vaprofeti nende vasalisi vakholanga shilala, voosi ni vakaati.

¹⁴Vashilikha likuule lia vandu vaanje khuli munjila yu khukholakhu vutswa, nivavoola, ‘Milembe, milembe,’ lwa khuvula milembe.

¹⁵Vakhola vindu vi tsisoni, vakhola shifwavi; Khali ndio, shivalalokhu tsisoni tsiosi; khali vakorwa khuli vanyala khunyola tsisoni. Khulwa yako, vatsitsanga khwiirwa khuli vandi viirwa; Lwa mba nivasalilitsanga, nalwo lwa vativitswa. Inzi Mwami Nyasaye mali khuvoola.”

¹⁶Mwami Nyasaye avoolanga, “Sinjili mumasanga njila muheenze, mureevishitsi mumanye makhuva kikholekha mumatukhu kakhale, ha injila indahi ili, muchendelekhu, munyole lihulukha mu mioyo chienyu. Navutswa khali vo vavoola, ‘Shiukhunyala khuchendela khuyo tawe.’

¹⁷Nalwo lwa narovola valindi vanyala khumulinda, nimbola, ‘Muhulishitsi muhumu kwi shisiliva!’ Navutswa khali munyi mwavoola, ‘Shiukhunyala khuhulishitsa tawe.’

¹⁸“Khulwa yako, Mwami Nyasaye yavoola: Munyi vandu vi tsimbia tsiosi, muhulishitsi; munyi vashiahidi, mumanye kaliitsa khuvakwila.

¹⁹Yivi lilova, uhulishitsi! Lola khuli nzitsanga khuchila matiinyu khukwila vandu yava, shichila vindu vitamanu via valoshitsanga khukhola, lwa vambakhana khuhulishitsa makhuva kaanje; lwa vambakhana khulonda mechitso kaanje.

²⁰Vulahi shina vwa ndi navwo lwa vanderelanga vubani khurula mu lusomo lwa Sheba, inoho tsipila pili khurula mu shivala ihale wene? Vihanwa viu khusambwa vienyu via yambakhanwa, khali misango chienyu chiakhaywa khunyanzitsa.

²¹Khulwa yako, inzi Mwami Nyasaye mbolanga, ‘Loli, mbishilanga vandu yava visikaritsu viavitsa khwisikarilakhu; vatata nende vaana vi shiyayi vavo, mureende nende mulina valiitsa khutivitswa.’ ”

²²Mwami Nyasaye avoolanga, “Loli, vandu vitsanga nivarula mu shivala shili ivuluka, luhia lwi tsingulu tsinyishi lumali khwirechekha khuraanjitsa liihe khurula ihale wene.

²³Viyavaale vura nende marimu, ni vandu valulu vuchila tsimbavasi tsiosi, muhumu kwavo kuhulilikhananga khuli inyanza ihilikananga; vahilanga tsifarasi, nitsiroonjele khuli musikali yirechekhanga khutsia mu liihe, khwitsa khukwana yivi litaala likali lia Sayoni.”

²⁴Nalwo lwa Vaisraeli vavoola, “Khwavoolelwa makhuva khulondokhana khuvo, khuvula shia khukhola; khunyakhananga mu mioyo, khuhulilanga isalila khuli yu mukhali wivulanga mwana.

²⁵Khali khwakhaywa khutsia mu milimi, inoho khuchenda khu muhaanda; shichila mutsiku wiyavaale shivavi, khandi khurishitswangwa mu tsimbeka tsiosi.”

²⁶Mwami Nyasaye avoolanga, “Munyi vandu vaanje, mwifwale tsinguvu tsia makunia, mukalaakale mu likooshe; mwikhule numuhala khuli mwikhulanga mwana wi shiyayi muteelwa, shichila mutivitsi yitsanga khumukwana, alamukwana vwangu muno.

²⁷Mali khukhukhola khuli murunishitsi mundu upimanga liiva lia vandu vaanje, umanye ni vandu va lukanu shina.

²⁸Voosi ni vahaaka khandi vahingana, vamenya nivamoonyanga vandi. Valolekhanga khuli vakwa mukasa nende shivia, voosi vakoyana mu likhola liavo.

²⁹Lijiko liakhanga mulilu mululu muno, risasi lisambangwa nu mulilu; navutswa khali shivia shivulakhuho shiyekulukhanga, shichila vandu vatamanu valiitsa khuvula khunihitswa.

³⁰Valiitsa khulaangwa, ‘Indakala yi ifetsa, shichila inzi Mwami Nyasaye mali khuvambakhana.’ ”