Read tsotso YEREMIA 7 Bible Online

YEREMIA 7 - tsotso bible

YEREMIA 7

¹Mwami Nyasaye yavoolela Yeremia,

²“Simukha utsi khusinjila ha shilivwa shi Litempeli lianje, wilwatsile vandu nuvoola, ‘Munyi voosi vandu va Yuda va mwinjililanga mu vilivwa yivi khwitsa khusaala khu Mwami Nyasaye, muhulishitsi likhuva liu Mwami Nyasaye.’

³Mwami Nyasaye wi Mikaanda Chiliihe, uli Nyasaye wa Israeli avoolanga, ‘Mukalukhane mu limenya lienyu nende vikholwa vienyu, na inzi nachila mutsililile khumenya havundu hanu.’

⁴Muvuli khusuuvilila mu makhuva ku khukaatwa numuvoola, ‘Yili ni Litempeli liu Mwami Nyasaye, Litempeli liu Mwami Nyasaye, nikali khuvoola Litempeli liu Mwami Nyasaye.’

⁵“Niiva ni kilikali muliitsa khukalukhana mu limenya lienyu nende vikholwa vienyu, mamukholele vandi katoto khuli kenyekhanga,

⁶niiva muliitsa khulekha khutambitsa vandu vi tsimbia tsindi, vavisandu inoho vakhutsakhali, khandi muleshe khusuundula shisahi shia vandu vavula vutamanu vwosi hanu; khandi niiva muliitsa khuvula khusaala khu vanyasaye vandi, vanyala khumukhola mutivitswi,

⁷nalwo lwa niitsa khumukhola mumenye havundu hanu, mu shivala shia nahaana mumatukhu kakhale khu vakuuka venyu khuva shiavo mihika ni mihika.

⁸“Loli, munyi musuuvililanga makhuva ki shikhaya ku khukaatwa.

⁹Muli vihuuvi, vandu valumindi, vaheeyi, vandu visuuhilanga mu vuvehi, vandu vasambanga vubani khu Baali, khandi vamusaalanga khu vanyasaye vandi, va mwali nu mwakorwa.

¹⁰Mukholanga vindu vi shifwavi, mamwitsa khusinjila mwene mu Litempeli lianje, khwitsa khusaala khwinzi, numuvoola, ‘Khuli vulahi!’

¹¹Mulolanga Litempeli lianje, lia vasaalilamu khwinzi liakwa shivisilu shia vanuuli? Inzi mwene mali khulola koosi ka mukholanga.

¹²Ruli nunundi mutsi khulolakhu havundu hali hanje mu litaala lia Shilo, havundu ha nali ninarovola khusaalilaho khwinzi, mamulole ka nakholaho, shichila vutamanu vwa vandu vaanje Vaisraeli vakhola.

¹³Mwakhola vindu yivi viosi, khandi khali niiva nalomoloma hali khanyishi khu munyi, mwambakhana khuhulishitsakhu. Khali mwambakhana khunjipakhu inzi Mwami Nyasaye, lwa namulaanga.

¹⁴Khulwa yako, ka nakhola mu litaala lia Shilo, nako ka nzitsanga khukhola Litempeli lianje, lia mwasuuvilila mulio. Niitsa khukhola havundu ha nali ninaha vakuuka venyu hanu, malala mele ka nakhola litaala lia Shilo.

¹⁵Niitsa khumukhunga khurula imbeli wanje, khuli lwa nakhunga viikho venyu voosi, vandu voosi vi inzu ya Efurahimu.”

¹⁶Mwami Nyasaye yavoola, “Yeremia, lekha khusaalilakhu vandu yava. Lekha khuvalilila inoho khusaala havukono havo; lekha khuvasaya vakholele ka venyanga, shichila shinyala khuvahulishitsa tawe.

¹⁷Ushili khulolakhu ka vakholanga mu mataala ka Yuda khandi khu tsinjila tsia Yerusalemi?

¹⁸Vaana vareenyanga tsikhuyi, vatata vavwananga mulilu, khandi vandu vakhali valombanga shinokho, khukanda tsikeki tsiu khuha nyasaye wa valaanganga Muruchi wi Shikhali wu Mwikulu. Vasuundulanga hasi vihanwa vi idivai khu vanyasaye vandi, khunomba khuvavukulila vurima.

¹⁹Navutswa ni kilikali anyala khuva ninzi wa varindilanga? Vene visalilitsanga nu khwilerela tsisoni.

²⁰Khulwa yako, inzi Mwami Nyasaye, niitsa khusalilitsa Litempeli yili khurulana khu vurima vwanje. Niitsa khusalilitsa vandu nende tsinyama, khandi misala nende viraakwa. Vurima vwanje vuliitsa khuva khuli mulilu kukhanyala khuvula khutsiminywa.”

²¹Mwami Nyasaye wi Mikaanda Chiliihe, uli Nyasaye wa Israeli avoolanga, “Mutsililile khukhola ka mulolanga ni malahi; meeti vihanwa viu khusambwa vienyu khu misango chienyu chindi numulia vene inyama yenyu!

²²Litukhu lia narulitsa vakuuka venyu mu shivala shia Misri, nali nishili khuvavoolelakhu shindu shiosi khulondokhana khu vihanwa viu khusambwa nende misango;

²³navutswa navavoolela, ‘Mulonde malako kaanje, ninzi niitsa khuva Nyasaye wenyu, na munyi muliva vandu vaanje. Mumenye khulondokhana khu malako kaanje, khu mumenye limenya lilahi.’

²⁴Navutswa vakuuka venyu vambakhana khukalonda inoho khuhulishitsa; nikhali vali vahaaka, nivakhola vindu vitamanu via vikombanga khukhola mu mioyo chiavo. Vali vandu vatamanu muno, vucheli vu khuva valahi.

²⁵Khuraanjila khulitukhu lia vakuuka veru varula mu shivala shia Misri khutukha nunundi, nali namenya shia litukhu nindumanga varumishi vaanje voosi, nivali vaprofeti, khu munyi.

²⁶Khali ndio, vambakhana khuvahulishitsa inoho khukavikha mu tsinganakani tsiavo. Nikhali vali vahaaka khandi nivava vahingani khuvira vakuuka vavo.

²⁷“Lwa yivi Yeremia uliitsa khuvavoolela vindu vienevo viosi, valiitsa khwambakhana khukhuhulishitsa. Lwa uliitsa khuvalaanga, valiitsa khwambakhana khukhuchipa.

²⁸Khulwa yako, uliitsa khuvavoolela, ‘Yulu nu luhia lwambakhana khulonda malako ku Mwami Nyasaye, uli Nyasaye wavo, khandi lwambakhana khuchelihitswa. Katoto kamali khutiva; khali shivalomolomanga katoto tawe.’

²⁹“Munyi vandu va Yerusalemi, mwikhule khu vutoonje vwi vikulu; veechi liswi lienyu numusiuva ihale wene. Inzi Mwami Nyasaye ndi nu vurima, mali khwambakhana vandu vaanje.

³⁰“Vandu va Yuda vakhola vindu vitamanu imbeli wanje; vavikha misambwa chiavo chi shifwavi mu Litempeli lianje, khuliononyinya.

³¹Vayumbakha mu Luhoongo lwa Hinomu vwaali vulaangwangwa Tofetsi, khusambilakhu vaana vavo vi shiyayi nende vi shikhana khuli musango khuvwo. Nali nishili khuvavoolela vakhole ndio, inoho khukanakanakhu khukhola kenako.

³²Khulwa yako, litukhu liliitsa khutukha lwa vuliitsa khuvula khulaangwa Tofetsi inoho Luhoongo lwa Hinomu; navutswa Luhoongo Lukhusinzwa. Valiitsa khuyeveela mivili chia vandu vakhutsa mu Luhoongo lwa Tofetsi, khutukha lwa valiitsa khuvula khuva na havundu handi.

³³Mivili chia vandu vakhutsa venavo, chiliitsa khuva shiukhulia shia manyonyi nende tsinyama tsiumbulimu. Mundu avulakhuho uliitsa khuvirishitsa.

³⁴Shivala shiliitsa khukwa shiangalangwi. Niitsa khumulula mu mataala ka Yuda khandi mu tsinjila tsia Yerusalemi liyooko liu vuyaanzi nende khusangala, khandi mwoyo ku khusangala ku musatsa uselelanga nende mwiiha wewe.”