Read tsotso YEREMIA 9 Bible Online

YEREMIA 9 - tsotso bible

YEREMIA 9

¹Nakhikombi murwi kwanje kuve khuli shisima shia matsi, tsimoni tsianje tsive khuli virula vi miliika, nikanyalikha nzililile khulila tsikhwili mbasu nu vutukhu shichila vandu vaanje vayiirwa.

²Nakhikombi mbe na havundu hanyala khumenya mu shiangalangwi, hanyala khulekhana na vandu vaanje, ihale wene khurula khuvo. Mwami Nyasaye avoolanga, “Voosi vakwa vaheeyi, nu mukaanda kwa vandu vambakhana khuva vasuuvilwa.

³Vayirechekha khuvoola vuvehi; khuli vura vwakhumbulwa khulesa mivanu; vuvehi vwashila mu shivala shienesho khuvira katoto, shichila vamenya nivakholanga vwoni vunyishi lukanu; khali shindu shivulakhuho shia vamanyi khwinzi, uli Nyasaye wavo. Inzi Mwami Nyasaye mali khuvoola.

⁴Shia mulala ave mucheli khurula khu mureende wewe, avuli khusuuvilila amwavo wewe wosi; shichila shia amwavo wosi nu mukaati, shia mureende wosi nu mumoonyi.

⁵Shia mulala khuvo akaatanga mureende wewe, mundu avulakhuho ulomolomanga katoto. Vanala khulomoloma makhuva ku vuvehi; khali vamenya nivakholanga vutamanu; vakhaywa khwikanila.

⁶Shia mulala wamenya natambitsanga weshie, nu khukaata weshie, wayambakhana khumanyakhu shindu khwinzi. Inzi Mwami Nyasaye mali khuvoola.

⁷Khulwa yako, inzi Mwami Nyasaye wi Mikaanda Chiliihe mbolanga: Loli! Niitsa khuvasamba khuli shivia shisambwangwa nu mulilu nu khuvachelitsa! Ni shina shindi shianyala khukhola khuvira hawenaho, lwa vandu vaanje vakholanga vwoni?

⁸Lilomoloma liavo lili khuli mivanu chiu vutsiva; vamenya nivakaatanga; shia mulala avoolelanga mureende wewe makhuva ku khulera milembe, navutswa akanakananga mu mwoyo kwekwe khuli amwinjilila.

⁹Nyala khulekha khuvasalilitsa shichila vindu vienevo? Mbuli khuvanza vandu vuluhia khuli lwenolo? Inzi Mwami Nyasaye mali khuvoola.”

¹⁰Navoola, “Niitsa khwikhula nu khulila shichila vikulu, nu khwikhula shichila lwayilu mwichendanyama, lwahangalala vutswa; Khali mundu avulakhuho unyala khukhalakanyilamu, khali ing'ombe ivulakhuho yanilaayo; manyonyi nende tsinyama tsiumbulimu via yilukhayo.”

¹¹Mwami Nyasaye avoolanga, “Niitsa khukhola Yerusalemi khuva shituma shi lichiinga, havundu ha vivwe vinyala khumenya; mataala ka Yuda kaliitsa khukwa shiangalangwi, vuchila mundu khumenya muko.”

¹²Nalwo lwa nareeva, “Mwami Nyasaye, ni viina uli nu vusitsa vu khumanya shia kavoolanga? Ni viina wa yivi Mwami Nyasaye, uli Nyasaye wavoolelakhu makhuva kenako nambula wavoolelakhu vandi? Shichila shina shivala shiononyinywa khandi shiahangalala khuli shiangalangwi, khali mundu avulakhuho ukhalakanyilamu?”

¹³Nalwo lwa Mwami Nyasaye yachipa, “Kamali khwikholekha kario, shichila vandu vaanje vayambakhana khulonda malako kaanje ka nali ninavaha. Valekha khulonda mechitso kaanje, nu khumenya khulondokhana khuko.

¹⁴Navutswa ni vahaaka mu mioyo chiavo khandi vasaalanga khu Baali, khuli lwa vakuuka vavo vali nivaveechitsa.

¹⁵Khulwa yako, inzi Mwami Nyasaye wi Mikaanda Chiliihe wa Israeli mbolanga: Loli! Niitsa khuliishitsa vandu yava shilulu nu khuvakhola khung'wa matsi ka vikhwamu isuumu.

¹⁶Niitsa khuvasalanyinya mu vandu vi tsimbia tsia vene, inoho tsia vakuuka vavo vali ni vakorwa. Niitsa khuruma vasikali khutsia khuvakwana, khutukha lwa niitsa khutivitsa voosi.”

¹⁷Mwami Nyasaye wi Mikaanda Chiliihe avoolanga, “Kanakanikhu shindu khu vindu vikholekhanga, mulaanje hanu vakhali vikhulanga; rumi mundu atsi khumulaanjila valala khu vakhali vechela khwikhula.”

¹⁸Vandu vavoola, “Vavooleli vakhole vwangu khwitsa khukhwimbila lwimbo lu khwikhula, khuraanje khulila miliika chieru, visichi vi tsimoni tsieru vitsililile khuchetulukha miliika khuli matsi.”

¹⁹Hulishitsi khuli vandu valilanga tsikhwili mu Sayoni, nivavoola, “Khwativitswa muno! Khwakwa mu tsisoni tsingali, shichila khwayivala shivala, lwa vasambulanyinya tsinzu tsieru.”

²⁰Navoola, “Munyi vakhali, muhulishitsi makhuva ku Mwami Nyasaye, muhulile ka yenyanga khuvoola; mwechitsi vaana vi shikhana venyu lwimbo lu khwikhula, shia mulala khu munyi yechitsi mureende wewe lwimbo lwa maliika.

²¹Likhutsa limali khwinjila khuvirila mu matirisha keru, lia yinjila mu tsinzu tsieru tsiu vwami, khali liativitsa vaana veru mu tsinjila tsi litaala likali, vayayi vavukha veru hakari halio.

²²Mivili chia vandu vakhutsa chiliitsa khulaakalala shia havundu hosi, khuli shituma shi isiingo mu milimi, khuli vivoho vi imu ya muchesi yarika munyuma, mundu avulakhuho uliitsa khuchivunjelitsa Mwami Nyasaye umali khukhuvoolela kenako.”

²³Mwami Nyasaye avoolanga, “Mundu uli nu vusitsa avuli khwichinjilila mu vusitsa vwevwe, inoho uli ni tsingulu khwichinjilila mu tsingulu tsietsie, inoho mundu wi miandu khwichinjilila shichila miandu chiechie.

²⁴Navutswa leshi mundu wichinjililanga, khwichinjilila shichila limanya nende vucheli viali navwo khulondokhana khwinzi, lwa inzi ndi Mwami Nyasaye wu kholanga malahi, vwatoto khandi likhola liu vulunji khulilova, shichila nako ka nyanzitsanga. Inzi Mwami Nyasaye mali khuvoola.”

²⁵Mwami Nyasaye avoolanga, “Loli! Matukhu kali himbi khutukha, lwa niitsa khusalilitsa vandu voosi vashevwa mmbili kwonyene, nikhali ni vasoleli.

²⁶Niitsa khusalilitsa Vamisri, Vandu va Yuda, Vaedomu, Vaamoni, Vamoabu, nende vandu voosi vamenyanga mu shiangalangwi vaveekanga vinyosi khu mirwi chiavo; shichila vandu vi tsimbia tsienetso voosi ni vasoleli, khandi Vaisraeli voosi vashili khushevwa mu mioyo chiavo.”