Read tsotso LWIKHULU 2 Bible Online

LWIKHULU 2 - tsotso bible

LWIKHULU 2

¹Lolikhu khuli Mwami Nyasaye, khuvirila mu vurima vwevwe, yavikha mu shisuundi vandu va Sayoni. Vulahi vwa Israeli vwasambulukha. Khulitukhu lia yitsula vurima yalekha khali Litempeli lielie.

²Mwami Nyasaye vuchila tsimbavasi, neye wativitsa michitsi chiosi chia vandu vi inzu ya Yakobo. Mu vurima vwevwe nasambulanyinya tsimbinga tsia vandu va Yuda, nativitsa vwami nende vamihi vavo khuvakhola tsisoni.

³Mu vurima vwevwe, neye wachehitsa tsingulu tsiosi tsia Israeli. Neye walekha khuvakhonya, lwa mutsiku yavaseera. Neye washila khuli mulilu kwi tsimemo vandu va Yakobo, nayeelitsa shia shindu shiosi.

⁴Neye wanyiila vura vwevwe khuli nu mutsiku, nayirechekha khulesa nu mukhono kwekwe wi likhola liu vulunji khuli mutsiku. Neye wamulula vandu veru va khwayaanza voosi, mu litaala likali lia Sayoni. Neye wakhuvukulila vurima vululu khuli mulilu kusambanga shindu.

⁵Mwami Nyasaye wakwa khuli mutsiku, nativitsa Israeli. Neye wasambulanyinya tsinzu tsietsie tsiosi tsiu vwami khukwa lichiinga, nu khupomola tsimbinga tsietsie. Neye wameeta khulila nu khwikhula mu vandu va Yuda.

⁶Neye wapomolanyinya Litempeli, havundu ha khwasaalanga khuye. Neye wasambulanyinya havundu hehe wu khukholela milukha. Neye warulitsaho litukhu likali li Lisabato mu Sayoni. Mu vurima vwevwe vululu, wayambakhana mwami nende vasalisi.

⁷Mwami Nyasaye wayambakhana vwaali vwevwe, khandi wachaya Litempeli lielie. Waleshela vatsiku masisi ki tsinzu tsiu vwami, Liyooko liahulilikhana mu Litempeli liu Mwami Nyasaye. Khuli ni litukhu liu khwikhoyela mulukha.

⁸Mwami Nyasaye yali wayirulitsa, khupomolanyinya lisisi lia Sayoni khukwa lichiinga. Mwene yalipima, vuchila khulolakhu khuli nu vutamanu khuliononyinya. Yachila masisi khwinuya nuya, nikakwila hasi khulala.

⁹Vilivwa vialio viakwa hasi, wasambula manutong'olanyinya milondi chialio. Mwami nende vimilili valio vamenyanga mu vandu vi tsimbia tsindi, malako kavula shia kakholanga. Khali vaprofeti shivanyolanga malolo khurula khu Mwami Nyasaye tawe.

¹⁰Vimilili va Sayoni vikhalanga hasi nivahonjela, vayimitsila lukuushi khu mirwi chiavo, nu khwifwala tsinguvu tsia makunia. Vakhali vavukha va Yerusalemi vayinaminya mirwi chiavo mu tsisoni.

¹¹Tsimoni tsianje tsiamuuchiha shichila ndilanga tsikhwili, nyakhananga vululu muno mu mwoyo. Mbwele tsingulu, shichila vandu vaanje vativitswa. Shichila vaana nende tsindana vashiindanga, nivakhutsila mu tsinjila tsi litaala likali.

¹²Valililanga vamama vavo, nivavoola, “Ni hena hi shiukhulia nende idivai vili?” Ni vamali khushiinda khuli vandu vasalilitswa khu tsinjila tsiu mu litaala likali, vakhutsila kalaha, khu makulu ka vamama vavo.

¹³Munyi vandu va Yerusalemi, Ni shina shinyala khulekhanyinywa khu munyi? Munyi vandu va Sayoni, ni shina shianyala khusasanyinya khu munyi khulu khumuleminya mwoyo? Muliitsa khutivitswa ha kali hene khuli vukalaamu vwi inyanza; ni viina uliitsa khumuhonyinya?

¹⁴Vaprofeti venyu vamuvoolela malolo ku khumukaata; vayambakhana khumuvoolela havulavu vwoni vwenyu khu mukalukhane, navutswa vamwilwatsila likhuva liu vuvehi khumukoritsa.

¹⁵Vandu voosi vaviranga khu tsinjila vakhukholelanga shihenye henye; vachenyelanga munyi vandu va Yerusalemi nivasung'usa murwi, nivavoola, “Yili nalio litaala likali liali ni lialaangwa lilahi liene liu vuseletse, liayaanzitsanga vandu voosi mu shivala?”

¹⁶Vatsiku vovo voosi vakhuhenye henyelanga; vakhuchenyelanga nivakhukhomoolela; nivavoola, “Khumali khulitivitsa! Ni kilikali, yili nalio litukhu lia khwalindililanga nu mwoyo kwosi; khulikholi ka khwakanakananga!”

¹⁷Mwami Nyasaye ukholi ka yali niyaloshitsa kakholwi, warweshitsa ka yali niyasioma aliitsa khukhola; khuli yali niyalaaka aliitsa khukhola khurula khale, wativitsa shia yali niyaloshitsa aliitsa khutivitsa vuchila tsimbavasi; walomba mutsiku yikhoyanga shichila munyi, khandi waha vatsiku venyu tsingulu tsinyishi muno.

¹⁸Munyi vandu va Sayoni, mulile tsikhwili nu mwoyo mukali khu Mwami Nyasaye. Munyi masisi ka Sayoni, nu vulahi miliika chienyu khuroonya mbasu nu vutukhu khuli muchela kwa matsi. Mulile tsikhwili nu mwikhula, vuchila khuhulukha!

¹⁹Vushi mu tsindolo mu vutukhu vwosi numulila! Musaale lisaala lienyu khuli matsi khu Mwami Nyasaye khumukhonya! Muve vichehitsi khuye numumusaya nayaanza alolele tsimbavasi vandu venyu -- vaana va inzala imalanga niyiira mu tsinjila tsi litaala likali.

²⁰Yivi Mwami Nyasaye, uheenze ulole shia unyala khukhola! Ni viina wa wakholakhu vindu vienevo? Nu vulahi vandu vakhali khulia vaana vavo, vaana va vene vivula nivalela khu makulu kavo? Nu vulahi musalisi nende muprofeti khwiirwa ni vali mu Litempeli liolio?

²¹Mivili chia vandu vakhutsa vaanje vavukha nende vasakhulu chilakalaale mu tsinjila; vaana vaanje vi shikhana nende vi shiyayi vayiirwa ni shivavi; nivi wiira vandu venavo khulitukhu lia wa vavukulila vurima, vuchila khuvavela tsimbavasi.

²²Mwami Nyasaye, nivi walaanga vatsiku vaanje khurula shia havundu hosi, khuli ni litukhu liu mulukha kwi lilia; mundu avulakhuho wilukha inoho wihonolokha, khulitukhu lia wamanyinya vurima vwovwo; vatsiku vaanje vamali khutivitsa vaana va nalela nu khutushitsa.