Read tsotso EZEKIELI 11 Bible Online

EZEKIELI 11 - tsotso bible

EZEKIELI 11

¹Roho wa Nyasaye yanjinguula ikulu, nambila khu shilivwa khuluveka luli ivukwi wi Litempeli liu Mwami Nyasaye. Khwali na vandu makhomi kavili na varanu ha vwinjililu vwi shilivwa shienesho. Nalola mu vandu venavo Yahazania mwana wa Azuri nende Pelatia mwana wa Benaya, nivali vimilili va vandu.

²Mwami Nyasaye yambolela, “Yivi mwana wu mundu, yava navo vandu valoshitsanga khukhola vutamanu, khandi vakhonyanga vandu ninganakani indamanu mu litaala likali yili.

³Vavoolanga, ‘Inyinga yu khumbakha tsinzu ishili khutukha. Litaala likali yili lili khuli inyungu, na khutsi vene navo inyama.’

⁴Khulwa yako, yivi mwana wu mundu, uprofetekhu shindu khulondokhana khuvo.”

⁵Nalwo lwa Roho wu Mwami Nyasaye yanzimilila khuvirila mu tsingulu tsietsie, ma Mwami Nyasaye nambolela nzi khuvoolela vandu, “Munyi Vaisraeli, namanya vulahi vwene lilomoloma lienyu, khandi kamuloshitsanga mu tsinganakani tsienyu khukhola.

⁶Mwayiira vandu vanyishi mu litaala likali yili; khandi mwasalanyinya mivili chia vandu viirwa mu tsinjila tsi litaala likali.

⁷“Khulwa yako, Mwami Nyasaye avoolelanga munyi, ‘Ni kilikali, mivili chia mwasiuvayo chili khuli tsinyama, navutswa litaala likali yili lili khuli inyungu.’ Nikhali, chiliitsa khurulitswa mu litaala likali!

⁸Munyi mwaria khwiirwa ni shivavi; navutswa niitsa khuchila muliirwa ni shivavi! Inzi Mwami Nyasaye mali khuvoola.

⁹Niitsa khumurulitsa mu litaala likali lienyu, nu khumukhalachila khu mupaka kwa Israeli.

¹⁰Muliitsa khwiirwa ni shivavi; niitsa khumukhalachila khu mupaka kwa Israeli. Nalwo lwa muliitsa khumanya ndi ninzi Mwami Nyasaye.

¹¹Litaala likali lienyu yili liliitsa khuvula khuva khuli inyungu yenyu inoho khuli inyama khu munyi. Niitsa khumukhalachila khu mupaka kwa Israeli.

¹²Nalwo lwa muliitsa khumanya ndi ninzi Mwami Nyasaye; shichila mwayambakhana khulonda malako nende mechitso kaanje, navutswa mulondanga mechitso ka vandu vi tsimbia tsindi, tsia mumenyanga natsio hahimbi.”

¹³Lwa nali nimprofetanga, Pelatia mwana wa Benaya yakhutsa. Nalwo lwa nakwa hasi mahunama, nindanga khulila tsikhwili nu mwoyo mukali, nimbola, “Wooyi! Mwami Nyasaye! Uliitsa khumulula Vaisraeli varikale voosi?”

¹⁴Mwami Nyasaye yambolela,

¹⁵“Yivi mwana wu mundu, vamwiru vovo, nivali vandu va Yerusalemi valomolomanga vindu khulondokhana khu yivi nende Vaisraeli voshio vamenyanga mu vuhaambe. Vavoolanga, ‘Vandu vali mu vuhaambe vavula vwiyangu vu khusaala khu Mwami Nyasaye. Mwami Nyasaye neye wa khuha shivala shia khwamenyamu yishi khuva miandu chieru.’

¹⁶“Khulwa yako, voolela vandu vamuli navo mu vuhaambe ka inzi Mwami Nyasaye mbolanga. ‘Khali niiva ninzi wamuhila khutsia khumenya ihale wene mu vandu vi tsimbia tsindi, khali niiva ninzi wamusalanyinya mu vivala vindi, khali ndio, niitsa khutsililila khuva navo mu vivala via vamenyamu.’

¹⁷“Vavoolele ndi inzi Mwami Nyasaye mbolanga, ‘Niitsa khumulera halala khurula mu vandu vi tsimbia tsindi, tsia mwamenyamu. Niitsa khumurulitsa mu vivala via namukhunga numutsia khuhatilamu. Niitsa khumukalushitsila shivala shia Israeli.

¹⁸Lwa muliitsa khuva nu mwakhakalukha mu shivala shienesho, muliitsa khurulitsaho misambwa nende vifwanani vi shifwavi viosi.

¹⁹Niitsa khumukhola muve nu mwoyo mulala khandi likhola lilala. Niitsa khurulitsa muvo mwoyo ku vuhaaka, nu khumuha mwoyo ku khwichehitsa.

²⁰Nalwo lwa valiitsa khulonda malako kaanje nende mechitso kaanje, nu khutsililila khuva vasuuvilwa khwinzi. Valiitsa khuva vandu vaanje, ninzi niitsa khuva Nyasaye wavo.

²¹Navutswa niitsa khusalilitsa vandu vasaalanga khu misambwa chi shifwavi chia nasiinyishila. Niitsa khuvasalilitsa khulondokhana khu vikholwa via vene vakhola. Inzi Mwami Nyasaye mali khuvoola.’ ”

²²Nalwo lwi vilombe vi tsimbaha viavambula tsimbaha tsiavio, makurutumu nikichinguukha halala navio; ma vukhumi vwa Nyasaye wa Israeli nu vuvikhunikha.

²³Vukhumi vu Mwami Nyasaye vwarula hakari hi litaala likali nuvutsia ikulu. Vwasinjila khu shikulu khuluveka luli ivukwi wi litaala likali.

²⁴Lwa nali nishili mu malolo kenako, Roho wa Nyasaye yambukula nambila mu shivala shiu vuhaambe shia Babilonia khulola vandu vali nivali mu vuhaambe. Nalwo lwa malolo ka nali nindoli kakhaama, nimbula khukalola khandi.

²⁵Namanya nimbolela vandu vali nivali mu vuhaambe shia shindu shiosi shiu Mwami Nyasaye yali niyamanyinya.