Read tsotso EZEKIELI 14 Bible Online

EZEKIELI 14 - tsotso bible

EZEKIELI 14

¹Litukhu lindi, valala khu vasakhulu Vaisraeli vanjendelela, nivikhala imbeli wanje.

²Mwami Nyasaye yambolela,

³“Yivi mwana wu mundu, vandu va ulolanga yava vayirulitsa nu mwoyo kwosi khusaala khu misambwa. Khali misambwa chiavo chienecho, nachio chichilanga nivakhola vwoni. Vunyala khuva vulahi, nivareevi vukhonyi khurula khwinzi?

⁴“Khulwa yako, ulomolome khuvo nu vavoolela ndi inzi Mwami Nyasaye mbolanga: Shia Muisraeli wosi wirulitsa nu mwoyo kwosi khusaala khu misambwa nu khukhola vwoni khwinzi, nu khwilukhachila khutsia khureeva vukhonyi khu muprofeti, inzi Mwami Nyasaye niitsa khuchipa shia mundu wosi lichipu, shichila vunyishi vwi misambwa chiechie chiosi,

⁵nikanyalikha ngalushitsi Vaisraeli voosi khwinzi, khulu khulekhana ni misambwa chiavo.”

⁶Mwami Nyasaye avoolelanga munyi Vaisraeli, “Mwikanile khurula mu vwoni vwenyu, khandi mulekhane ni misambwa chienyu. Leshi khukhola shifwavi shia mukholanga yeshio.

⁷“Nikava mulala khu Vaisraeli inoho mulala khu vacheni vamenyanga mu Vaisraeli, aliitsa khwambakhana khusaala khwinzi, navutswa asaale khu misambwa, khali khwilukhachila khutsia khureeva vukhonyi khu muprofeti, inzi Mwami Nyasaye niitsa khumuchipa khuli kenyekhanga!

⁸Inzi mwene niitsa khukhola mundu mwenoyo likhuva. Niitsa khukhola mundu mwenoyo khuva shimanyilu, khandi shindu shia vandu valiitsa khukholela shihenye henye. Khali niitsa khumukhunga khurula mu vandu vaanje. Nalwo lwa muliitsa khumanya ndi ninzi Mwami Nyasaye.

⁹“Niiva muprofeti aliitsa khukaatilitswa khuvoola vuvehi, inzi Mwami Nyasaye neye uliitsa khuva namukholi khukaatwa. Niitsa khumusalilitsa nu khumutivitsa khurula mu vandu vaanje Israeli.

¹⁰Niitsa khusalilitsa muprofeti mwenoyo nende mundu wareeva vukhonyi khwinzi Mwami Nyasaye.

¹¹Niitsa khukhola kenako khu Vaisraeli valilekha khunzilukha nu khukhola shifwavi khuvirila khu vwoni vwavo. Nalwo lwa valiitsa khuva vandu vaanje, ninzi niitsa khuva Nyasaye wavo. Inzi Mwami Nyasaye mali khuvoola.”

¹²Mwami Nyasaye yambolela,

¹³“Yivi mwana wu mundu, niiva shivala shiliitsa khukhola vwoni imbeli wanje, nu khwambakhana khuva vasuuvilwa khwinzi, niitsa khushisalilitsa nu khutivitsa viraakwa vi shivala shienesho. Niitsa khuruma inzala yu khwitsa khwiira vandu nende tsinyama.

¹⁴Khali niiva vandu vavaka yava Nuhu, Danieli, nende Ayubu valiitsa khuva nivashili mwoyo mushio, valiitsa khuvula khukhutsa vutswa, shichila ni vandu vi likhola liu vulunji. Inzi Mwami Nyasaye mali khuvoola.”

¹⁵Niiva naruma tsinyama tsiumbulimu mu shivala shienesho khwitsa khutivitsa vandu, khali shivala nishirikale shiele, vuchila mundu khukhalakanyila mushio, shichila tsinyama tsiumbulimu.

¹⁶Khali niiva vandu vavaka venavo, valiitsa khuva nivashili mwoyo nivamenyanga mushio, valiitsa khukhaywa khuhonyinya vaana vavo vi shikhana nende vi shiyayi. Navo vonyene valiitsa khuhonyinywa, navutswa shivala shiliitsa khurikala shiele vuchila shindu.

¹⁷Niiva niitsa khuchila liihe likwi mu shivala shienesho, khali nombe vandu khwiira vandi halala ni tsinyama tsimenyanga mushio;

¹⁸khali nikava vandu vavaka yava valiitsa khuva nivashili mwoyo, inzi Mwami Nyasaye nzisuuhanga ndi valiitsa khukhaywa khuhonyinya vaana vavo vi shiyayi inoho vi shikhana; navutswa vandu vavaka yava vonyene, navo valiitsa khuhonyinywa.

¹⁹“Niiva niitsa khuruma lukhutsu mu shivala shienesho, nu khumululayo vandu vanyishi khuvirila mu vurima vwanje, halala ni tsinyama,

²⁰khali nikava Nuhu, Danieli nende Ayubu valiitsa khuva nivashili mwoyo mu shivala shienesho, nzisuuhanga ndi valiitsa khukhaywa khuhonyinyakhu vaana vavo vi shiyayi inoho vi shikhana. Likhola liu vulunji lia vene vakholanga, nalio liliitsa khuvahonyinya vutswa. Inzi Mwami Nyasaye mali khuvoola.”

²¹Mwami Nyasaye avoolanga, “Niitsa khusalilitsa litaala likali lia Yerusalemi khuvirila mu vikha vine. Navio ni liihe, inzala, tsinyama tsiumbulimu nende lukhutsu -- khutivitsa vandu nende tsinyama.

²²Khali ndio, vandu valiitsa khurikala nivali mwoyo mu litaala lienelo, nivalera vaana vavo vi shiyayi nende vi shikhana khu yivi; valiitsa khwitsa khu yivi. Lwa uliitsa khulola mwiima kwavo nende vikholwa viavo, nalwo lwa uliitsa khumanya ndi salilitsanga munjila yatoto vandu vi litaala likali lia Yerusalemi.

²³Valiitsa khumanya ndi vasalilitswi khurulana khu shivune shiatoto khulondokhana khu mwiima kwavo nende vikholwa viavo. Inzi Mwami Nyasaye mali khuvoola.”