Read tsotso EZEKIELI 16 Bible Online

EZEKIELI 16 - tsotso bible

EZEKIELI 16

²“Yivi mwana wu mundu, yitsushitsa vandu va Yerusalemi vamanye vindu vi shifwavi via vakholanga.

³Uvavoolele ndi, inzi Mwami Nyasaye mbolelanga litaala likali lia Yerusalemi, ‘Ni kilikali, uli mundu wivulwa mu shivala shia Kanaani! Tata wowo yali Muamori, na mama wowo nava Muhitse!

⁴Khulitukhu lia wivulwa, ikhovu yoyo yalekhwa khukhalaakwa, khali nuvula khusingwa na matsi khulolekha munihu. Khali shiuwavekhwa ichumbi inoho khufwala tsinguvu tsi tsindana tawe.

⁵Mundu avulakhuho wa khulolelakhu tsimbavasi, khali khukhukholela vindu vienevo khumanyinya ndi wakhuyaanza. Navutswa khulitukhu lia wivulwa, wasiuvwa mu mulimi, shichila wanuminya murwi khulitukhu lia wivulwa.’

⁶“Lwa navirila himbi havundu ha wali nuli, nakhulola nulakalaale mu masahi koko, nakhuvoolela,

⁷‘Uve mwoyo! Waneera khuli shiraakwa mu mulimi, khali nuhindila khandi nuraambiha khuli mwana wi shikhana watukha. Tsimbele tsiotsio tsiali tsingali, khali liswi liolio liali liameela vulahi. Nikhali walolekha uli shekenye nuvula shiu khwifwala.’

⁸“Lwa navirila khandi himbi havundu ha wali nuli, nalwo lwa nakhulola. Mumatukhu kenako, wali nu watukha mihika chiu musatsa khukhuyaanza. Nakhufwala inguvu yanje, khukhuvisa shekenye shioshio. Ni kilikali, nisuuha khandi nindaka khuli nyala khukhuyaanza, khali nikhola lilakano liu khukhuhila, nuva mukhali wanje.” Inzi Mwami Nyasaye mali khuvoola.

⁹“Nalwo lwa nakhusinga na matsi, khali nikhupangusa masahi koko, khukhuvekha makura.

¹⁰Nakhufwala inguvu yanaavwa ni tsimbusi tsinyishi lukanu, khandi nikhuha vilaaro vialombwa khu shiseelo shiu vukuuli vululu, shitambaya shiu khwivoha khu murwi, khandi inguvu yalombwa khu machioro malahi.

¹¹Nakhufwala nikhusiaya ni viuma. Nakhuvoha tsibinjili khu makhono koko, khandi matongolo mwing'ori mwomwo.

¹²Nalivira ibete mumuulu koko, khali matemba mu maroyi koko; nikhufwala itaachi indahi yene khu murwi kwokwo.

¹³Wasiaywa ni itsahabu nende ifetsa. Tsinguvu tsiotsio tsiali tsia naavwa khurula khu vitambaya via machioro malahi, khandi tsiali tsiasiaywa munjila indahi. Waliitsanga shiukhulia shilahi shiene -- vusi vunyukhu, vushi vwi tsinzushi, nende makura ku musayituni, khali nuva ni likoondo lilahi liene mbirilila. Walolekhanga khuli muruchi wi shikhali, khali ni kilikali nindio walolekhanga!

¹⁴Luyali lwolwo lwalanda shia havundu hosi khulilova shichila wali wakaasa likoondo. Vukhumi vwa nali ninakhuha, navwo vwachila nu kaasa likondo. Inzi Mwami Nyasaye mali khuvoola.

¹⁵“Navutswa wali wasuuvilila mu likoondo liolio liakaasa, khali nurumishila luyali lwa wali nu waheelwa khukhola vulaaya. Wakhola vulaaya na shia mundu wosi wavirayo.

¹⁶Wavukula tsindala khu tsinguvu tsiotsio, nulombela havundu hoho ha vasaalila khu yivi, khali nakwa havundu wa vakholelanga vulaaya vwovwo. Shikholwa khuli shienesho shishili khwikholekhakhu inoho shishinyala khwikholekhakhu khandi tawe!

¹⁷Wavukula machina ku vukuuli vululu, kali nikalombwa khu itsahabu nende ifetsa, ka nali nikhuheele, nu wilombela vifwanani via vandu vasatsa, nukholela vulaaya.

¹⁸Wavukula tsinguvu tsindahi tsiene tsiali ni tsia naavwa ni tsimbusi lukanu, tsia nali ninakhuha, nufwala vifwanani vienevo. Warumishila makura nende vubani vwanje, khuva khuli vihanwa khu vifwanani vienevo.

¹⁹Kanakanakhu ka wakhola! Wavukula shiukhulia shianje shihuunyanga mwayu mulahi shia nali nikhuheele, khali vusi vunyukhu, makura ku musayituni nende vusi vwi tsinzushi, nukhola musango khu vifwanani. Inzi Mwami Nyasaye mali khuvoola!

²⁰“Khali ndio, wavukula vaana vovo vi shiyayi nende vi shikhana va wivula khwinzi, nukhola khuli musango ku khusambwa khu misambwa chiochio. Ukanakananga lwa wakholanga vulaaya liali likhuva liti?

²¹Ukanakananga likhuva liu khusinza vaana vaanje nu khuvakhola khuli musango kwi shihanwa shiu khusambwa khu misambwa chiochio ni litoro khu yivi?

²²Khali mu vikholwa vi shifwavi viosi via wali nu wakhola, khali vulaaya vwa wakholanga wivilila ka wali nu wakholelwa mumatukhu ka wali nushili muvukha, mumatukhu ka wali nuwarikala shekenye vuchila shindu shiosi, nu walaakalala mu masahi koko mwene!”

²³Mwami Nyasaye avoolanga, “Wooyi! Wooyi! Uli khu vutiinyu muno! Lwa wakhola khale vutamanu vunyishi

²⁴lwa wiyumbashila tsinzu tsiu khusaalilwamu nende havundu wu khusaalila khu misambwa shia havundu hosi.

²⁵Wali wayumbakha shia havundu hosi khu muhaanda havundu ha vanyala khwitsa khusaala khu yivi; khali nurumishila likoondo liolio liakaasa khukhola vulaaya na shia mundu wosi wavirilayo, khumeeta khu vulaaya vwa wakholanga.

²⁶Khali wakhola vulaaya na Vamisri, nivali vareende vovo vitsula likomba liu khukhola vulaaya, khutsililila khukhola vulaaya, khuvwanyinya vurima mwinzi.

²⁷Khulwa yako, ninzi wanyiila mukhono kwanje, nikhusalilitsa. Ninzi wachehitsa shiukhulia shioshio, nikhura mu makhono ka vatsiku vovo, nivali vaana vi shikhana va Vafilistia, valola tsisoni shichila mwiima kwi shifwavi kwa wakholanga.

²⁸“Khali wakhola vulaaya na Vashuria, shichila wali nushili nu luusa lunyishi. Ni kilikali, wakhola vulaaya navo, khali nuva nu luusa lu khutsililila khukhola vulaaya.

²⁹Khali yivi mwene wirulitsa nukhola vulaaya na Vababilonia, nishili shivala shia vandu vakholanga vukhala; navutswa watsililila khuva nu luusa lunyishi.

³⁰“Inzi Mwami Nyasaye mbolanga, ‘Ni kilikali, lwa nalola nukholanga vindu yivi viosi, kalolekhanga walwala shichila vulaaya vwa wu kholanga vwenovo. Ukholanga vulaaya vuchila khulolakhu tsisoni tsiosi.

³¹Wayumbakha inzu yoyo yu khumenyamu shia havundu hosi khu muhaanda; khandi wayilombela havundu ha vasaalila khu yivi hakari mu litaala likali. Khali ndio, shiuwakholanga khuli mukhali wu kholanga vulaaya tawe, shichila wali wayambakhana khurungwa.

³²Wali khuli mukhali muheeyi, winjilitsanga vasatsa vandi munzu mwemwe, havukono wu musatsa wewe.

³³Vandu vasatsa vaheetsanga vakhali vakholanga vulaaya mirungu; navutswa yivi wahaananga vihanwa khu vayaanze vovo voosi, nuvarunga asooya khwitsa khukhulola khurula shia havundu hosi ha wakholelanga vulaaya.

³⁴Kalolekhanga wali mukhali lukanu khurula khu vakhali vandi voosi, lwa wakholanga vulaaya. Mundu avulakhuho wakhuhombelitsa khukhola naye vulaaya. Wisamulitsa mwene mu likhola vulaaya, navutswa mundu avulakhuho wakhurunga yivi, lwa wakhola kenako. Khulwa yako, wali mundu lukanu lundi.’

³⁵“Khulwa yako, yivi mukhali wu kholanga vulaaya, uhulishitsi likhuva liu Mwami Nyasaye avoolanga.

³⁶‘Inzi Mwami Nyasaye nyenyanga khukhuvoolela ndi yivi mwene wayilerela tsisoni lwa winavula shekenye, lwa wakholanga vulaaya na vayaanze vovo, khali shichila misambwa chiochio chia wasaalakhu, khandi shichila wasuundula shisahi shia vaana vovo va wavaha khuli shihanwa.

³⁷Khulwa yako, niitsa khulaanga halala vayaanze vovo voosi, vakhukholanga nuva nu vuyaanzi, shia mundu wosi wa wali nu wayaanza khandi shia mundu wosi wa wali nuwambakhana. Niitsa khuvakhola vakhukwane khurula mu tsimbeka tsiosi, khandi khukhunaavula tsinguvu imbeli wavo, valikhulola nuli shekenye.

³⁸Niitsa khukhukhalachila khuli mukhali wu kholanga vuheeyi khandi mulumindi. Niitsa khukhusalilitsa khuvirila mu vurima vwanje khandi lishiendekha lianje.

³⁹Nalwo lwa niitsa khuchila vayaanze vovo valikhwamiha. Navo valiitsa khusambulanyinya tsinzu tsiotsio; khandi havundu hoho ha vasaalanga khu yivi. Valiitsa khukhunaavula tsinguvu, khandi valikhunuula machina koko ku vukuuli vululu, khukhurika shekenye, vuchila shindu shiosi.’

⁴⁰“Valiitsa khukhukwana nu mukaanda kwa vasikali. Valiitsa khukhwiira na machina, nu khukhumureemaka mu vitonye ni vivavi viavo.

⁴¹Valiitsa khusamba tsinzu tsiotsio nu mulilu khandi vakhusalilitse vandu vakhali nivalolanga. Niitsa khukhukhola khulekha khukhola vulaaya, khandi ulivula khwisamuliitsakhu mu likhola vulaaya nu mundu wosi.

⁴²Nindio niitsa khukhusalilitsa khuvirila mu vurima vwanje, lishiendekha liandi nalio khu yivi liliitsa khuvwa. Niitsa khuhonjela vutswa, khali nilivula vurima vwa niitsa khukhulolelakhu khandi.

⁴³Wayivilila ka inzi Mwami Nyasaye nakhukholela khuraanjila mumatukhu ka wali nushili muvukha. Wanomba khuva nu vurima shichila kenako koosi. Khulwa yako, niitsa khuvanzila shia shindu shiosi shia wakhola. Inzi Mwami Nyasaye mali khuvoola. Ni kilikali, shindu shivulakhulaho shitamanu shia wakhola numeeta khu shifwavi shioshio?

⁴⁴“Yivi Yerusalemi, mundu niyenyi khurumishila lukanu khu yivi anyala khuvoola, ‘Khuli lwa mama ali, nindio mwana wewe wi shikhana ali.’

⁴⁵Ni kilikali, nivi mwana wu mukhali yivula, wasinya musatsa wewe nende vaana veve vayivula. Yivi uli vutswa shilala na vakhana venyu vasinya vasatsa vavo nende vaana vavo. Mama wowo yali Muhitse, na tata wowo yali Muamori.

⁴⁶Mwana wi shikhana wenyu mukhulundu nu Musamalia, wamenya khuluveka luli ivuluka wowo, nende vaana vi shikhana veve. Mwana wi shikhana wenyu mushie ni Sodomu uli khuluveka luli ikuvanda wowo, halala na vaana vi shikhana veve.

⁴⁷Khali ndio, shiuwanyalikha khulekha khulonda mwiima kwavo, inoho khukhola shifwavi shiavo tawe. Mumatukhu mati, kalolekhanga ndi wali wakoyana muno mu vikholwa viovio khuvira vo.

⁴⁸Ni kilikali, nzisuuhanga khuvirila khu lira lianje inzi Mwami Nyasaye ndi, mwana wi shikhana wenyu Sodomu nende vaana vi shikhana veve, vashili khukholakhu vindu vitamanu khuli yivi nende vaana vi shikhana venyu mwakhola.

⁴⁹Vutamanu vu mwana wi shikhana wenyu Sodomu yakhola vuli ndi, ye halala na vaana vi shikhana veve, lwa vali nivanyoli shiukhulia khandi nivali vahinda, varaanga khwichinjilila, nivalekha khukhonya vandu vamanani nende vatakha.

⁵⁰Khali ndio, vichinjilila, nivaraanga khukhola vindu vi shifwavi imbeli wanje. Khulwa yako, ninzi wavativitsa lwa nalola ka vali nivakholi kenako.

⁵¹“Litaala lia Samaria lishili khukholakhu khali inusu yu vwoni vwevwe. Nivi wakhola vindu vi shifwavi vinyishi khuvira via vali nivakhola. Nusasanyinye vutamanu vwovwo khu vutamanu vwa vaana vi shikhana venyu, ni kilikali vutamanu vwavo ni shindu tawe!

⁵²Yivi mwene uliitsa khunyola tsisoni tsiotsio! Vwoni vwovwo nu vunyishi khuvira vwa vaana vi shikhana venyu. Vo vavula vutamanu vwosi khuvira yivi. Yivi mwene uliitsa khunyola tsisoni, shichila wakhola vaana vi shikhana venyu khulolekha khuli vakhola vikholwa viu vulunji.

⁵³“Niitsa khukalushitsila Sodomu nende Samaria halala na vaana vi shikhana vavo vuhinda vwali vwavo vwa khale. Khali niitsa khukhukhola yivi khuva nu vuhinda khuli vo,

⁵⁴khu yivi mwene uliva ni tsisoni, shichila vikholwa via yivi mwene wali nu wakhola. Nimali khukhukhola ndio, nalwo lwa vaana vi shikhana venyu valiitsa khulola ndi liiva liavo ni lilahi khuvira lienyu.

⁵⁵Vaana vi shikhana venyu, nivali Sodomu nende Samaria, halala na vaana vi shikhana vavo valiitsa khuva ni liiva liavo liali muliraanga. Khali yivi mwene nende vaana vi shikhana venyu muliitsa khuva mu liiva lienelo.

⁵⁶Nivi wachaya mwana wi shikhana wenyu, nali litaala lia Sodomu khurulana khu vwichinjililu vwovwo.

⁵⁷Ukanakananga vutamanu vwa wali nukholi vwali nuvushili khumanyikhana havulavu? Liakwa vutswa khuli shindu shiu khukholelwa shihenye henye na Vaedomu, Vafilisti nende vareende vandi va vachayanga.

⁵⁸Uliitsa khunyakhana khurulana khu vindu vi shifwavi via yivi mwene wakhola. Inzi Mwami Nyasaye mali khuvoola.”

⁵⁹Mwami Nyasaye avoolanga, “Ni kilikali, niitsa khukhukhola khuli wenyekhanga khukholwa; shichila wachaya lilaka liolio khandi numeneka lilakano.

⁶⁰Navutswa khali ndio, niitsa khuhaana luyali khu lilakano lia nakhola nivi, lwa wali numushili vavukha. Niitsa khurweshitsa nivi lilakano li mihika ni mihika.

⁶¹Uliitsa khwitsushitsa khuli wakholanga. Uliitsa khuva ni tsisoni lwa ulikalushitsa mwana wi shikhana wenyu mukhulundu nende mushie. Niitsa khuvakhola khukwa vaana venyu vi shikhana, khali niiva shikali nako ka nyenyanga kakholeshe mu lilakano lia nakhola nivi tawe.

⁶²Niitsa khurweshitsa lilakano lianje nivi, khandi ulimanya ndi ninzi Mwami Nyasaye.

⁶³Niitsa khukhusemeha khurula mu vwoni vwovwo vwosi; navutswa yivi uliitsa khwitsushitsa nu khuhuka, khali ulinyola tsisoni mu vindu via uvoolanga. Inzi Mwami Nyasaye mali khuvoola.”