Read tsotso EZEKIELI 19 Bible Online

EZEKIELI 19 - tsotso bible

EZEKIELI 19

¹Mwami Nyasaye yambolela nzimbile vamihi vavili va Israeli lwimbo lu khuva nu vuveleli mu mwoyo yulu,

²nimbola: Mama wenyu yali khuli isimba yu vukhumi mu tsisimba tsindi. Yikhala mu tsisimba tsimbukha, nu khuliishitsa vaana veve.

³Yalela mulala khu vaana vi tsisimba manikwa isimba. Yeeka khukumila nu khulia tsinyama, manilia vandu.

⁴Vandu vi tsimbia tsindi vahulila makhuva kayo, manikumilwa mu vwina vwavo. Vachikhwesesa khu minyololo nivachihila mu shivala shia Misri.

⁵Lwa mama wayo yalola kenako, yavwa tsingulu, khali lisuuvilitswa lielie nilivwa, navukula mwana wundi wi isimba namukhola khuva isimba indulu muno.

⁶Nimali khuhindila, yaraanga khuchenda chenda ni tsisimba tsindi; khali yo yeeka khuhiitsa nu khulia vandu.

⁷Yononyinya tsimbinga, khali nisambulanyinya mataala. Vandu vi shivala shienesho vatechelitswa shia isaa yosi ya vahulilanga isimba yeneyo nihuma huma.

⁸Vandu vi tsimbia tsiliyo vakanila halala khuchikwana; vandu varula mu tsimbeka tsiosi. Vachireeka ni tsineti tsiavo, nivachikumila.

⁹Vachivikha mu shindu khuchihila khu Mwami wa Babiloni. Nili iweneyo vachihila mucheela, khu valivula khuhulilakhu nihuma humanga, khu vikulu via Israeli.

¹⁰Mama wayo yali khuli musaala ku musabibu mu mulimi, kwaraakwa himbi ha muchela kwa matsi nu kwaama mu vunyishi tsisia nende matunda, shichila kwali kwaraakwa mu matsi manyishi.

¹¹Kwali ni shirina shi tsingulu, shiamanya nishilombwakhu tsindovoshi tsia vami. Musabibu kwenoko kwaraambiha muno nu kuvira misala chindi chiosi, vandu nivitsominya vuraambi vwakwo halala ni tsisia tsiakwo tsinyishi.

¹²Navutswa musabibu kwenoko kwarinyuulwa mu vurima, nu kusiuvwa hasi; vushindu khuluveka luli ivukwa vwakuuminya; matunda kakwo kavungulukha, shirina shi tsingulu shiakwo nishiniala, shiumakana ni shilaalitswa nu mulilu.

¹³Nunundi kwaraakwa mu shiangalangwi, mu shivala shiahangalala shiumakana shia matsi kakhanyolekhamu tawe.

¹⁴Navutswa mulilu kwaraanjila khu shirina shiene, kwalaalitsa tsisia tsiakwo nende matunda kakwo. Tsisia tsiakwo shitsiliitsa khuva ni tsingulu inoho khulombwakhu tsindovoshi tsia vami tawe. Kikholekha kakwa khuli lwimbo lu khwikhula; khandi vandu vamenya shia khase khosi nivalwimbanga.