Read tsotso EZEKIELI 2 Bible Online

EZEKIELI 2 - tsotso bible

EZEKIELI 2

¹Nalwo lwa yambolela, “Yivi mwana wu mundu, sinjila vulunji. Nyenyanga khuvoolele likhuva.”

²Lwa yali nalomolomanga khwinzi, Roho wa Nyasaye yinjila mwinzi, khandi nasinjilitsa vulunji; nimbulila nambolelanga shindu.

³Yambolela, “Mwana wu mundu, khurumanga khu Vaisraeli, khu shivala shiambinganyinya, nivali vandu vahingani. Vo nende vakuuka vavo vakhola vindu vitamanu imbeli wanje, khali khutukha nunundi.

⁴Vandu venavo ni vahaaka khandi vayambakhana khumba luyali. Khurumanga khutsia khuvo, uvavoolele, ‘Inzi Mwami Nyasaye mali khuvoola.’

⁵Khali nivahulishitsa inoho vambakhane khuhulishitsa (shichila ni vandu vu lwivulu lwa vahingani), nalwo lwa valiitsa khumanya ndi muprofeti wamenya muvo.

⁶Navutswa yivi mwana wu mundu, uvuli khuvariakhu inoho khuriakhu ka valomolomanga, khali nikava wumenyanga mu mavwa nende marakalu khandi mu tsinge. Uvuli khuriakhu shia shindu shiosi shia valomolomanga inoho khuheenda mwoyo khulondokhana khu ka vakholanga, shichila nu lwivulu lwa vandu vahingani.

⁷Uliitsa khuvavoolela shia shindu shiosi shia niitsa khuvoola, khali kave vanyala khuhulishitsa inoho khwambakhana khuhulishitsa, shichila nu lwivulu lwa vandu vahingani.

⁸“Navutswa yivi mwana wu mundu, uhulishitsi makhuva ka nzitsanga khukhuvoolela. Uvuli khuva muhingani khuli lwivulu lwa vandu vahingani yolo. Vambula munwa kwokwo unyanye shindu shia nzitsanga khukhuha.

⁹Naheenza, nimanyinywa mukhono nu kusonanga khwinzi. Shitabu shiali mu mukhono kwenoko, shia makhuva kali nikahandikwamu.

¹⁰Yikula shitabu shienesho imbeli wanje. Shiali shiahandikwamu imbeli nende imukongo makhuva khulondokhana khu lwikhulu, khulila nende vilaamo.”