Read tsotso EZEKIELI 20 Bible Online

EZEKIELI 20 - tsotso bible

EZEKIELI 20

¹Khumuhika kwa saba, khumweli wa kharanu, khulitukhu li likhomi liu mweli, valala khu vimilili va Israeli vitsa khureeveshitsa inganakani khu Mwami Nyasaye. Vitsa nivikhala imbeli wanje.

²Mwami Nyasaye yambolela,

³“Yivi mwana wu mundu, lomoloma na vimilili va Israeli. Vavoolele ndi inzi Mwami Nyasaye mbolanga: Munyala khuva mwitsa khundevishitsa inganakani yu khukhonywa? Ni kilikali, lwa ndi Mwami Nyasaye uli mwoyo, nzisuuhanga ndi shinzitsanga khuhuchililakhu khureevwa inganakani yu khukhonywa tawe.

⁴“Yivi mwana wu mundu, uliitsa khukhalachila vandu yava? Uliitsa khuvakhalachila toto? Lekha vamanye vindu vi shifwavi via vakuuka vavo vakholanga.

⁵Vavoolele ndi inzi Mwami Nyasaye mbolanga: Khulitukhu lia narovola Vaisraeli, ninzi wisuuhila vitsukhulu va Yakobo. Mwene nimanyinya khuvo nivashili mu shivala shia Misri, nivisuuhila, nimbola, ‘Ninzi Mwami Nyasaye, uli Nyasaye wenyu.’

⁶Khulitukhu lienelo, ninzi wavisuuhila ndi niitsa khuvarulitsa mu shivala shia Misri, nu khuvahila mu shivala shia nali ninarovola niitsa khuvaha, shivala shili ni lilova lilahi khandi linuulu nende vushi, shivala shilahi khuvira vivala vindi viosi.

⁷Nalwo lwa navavoolela, ‘Shia mulala khu munyi asiuvi ihale wene vindu vi shifwavi via yaanzililanga khukolakhu. Muvuli khwiyononyinya vene ni misambwa chia Misri. Ninzi Mwami Nyasaye, uli Nyasaye wenyu.

⁸Navutswa vambinganyinya nivambakhana khumbulishitsa. Vambakhana khulekhana ni misambwa chiavo inoho khwivilila misambwa chia vasaalakhu mu shivala shia Misri.

⁹Navutswa nakhola kenako shichila luyali lwanje, khu vandu vi tsimbia tsindi tsia hahimbi vavuli khunjaya, lwa nali ninarulitsa vandu veve mu shivala shia Misri.’

¹⁰“Ninzi mwene wavarulitsa mu shivala shia Misri, nivahila mu shiangalangwi.

¹¹Ninzi wavaha mivaalo kaanje khandi niveechitsa mechitso kaanje, ku mundu alondanga atsililile khuva mwoyo.

¹²Ninzi wavaha khandi litukhu lianje li Lisabato khuva khuli shimanyilu hakari hanje nende munyi, khu vamanye ndi ninzi Mwami Nyasaye wavatakasa.

¹³Navutswa Vaisraeli vambinganyinya nivali mu shiangalangwi. Vambakhana khulonda mechitso kaanje nende malako kaanje, ku mundu alondanga, atsililile khuva mwoyo. Khali vameneka malako khulondokhana khulitukhu lianje li Lisabato.

¹⁴Navutswa niyikalila khukhola ndio khwenya khuha lira lianje luyali, khu vandu vi tsimbia tsindi valivula khunjaya, nivali yavo valola khuli navarulitsa mu shivala shia Misri.

¹⁵Khali ndio, ninzi wavisuuhila mu shiangalangwi mwenomo ndi shinakhavaleri mu shivala shia nali ninavaha, shivala shi lilova lilahi khandi linuulu khandi shivala shilahi shiene muno nende vushi khuvira vivala vindi khulilova tawe.

¹⁶Niitsa khukhola ndio shichila vambakhana khulonda mivaalo kaanje, vameneka malako kaanje, nivononyinya litukhu li Lisabato -- valola nu vulahi khusaala khu misambwa chiavo.

¹⁷“Navutswa khali ndio, navavela tsimbavasi. Naviritsa mbuli khuviirila mu shiangalangwi mwenomo.

¹⁸Nikhali, nachelihitsa vandu vavukha vamenyanga navo mwichendanyama, nimbola, ‘Muvuli khulonda malako ka vakuuka venyu valondanga, inoho khulonda mwiima kwavo, inoho khwiyononyinya vene, lwa musaalanga khu misambwa chiavo.

¹⁹Inzi Mwami Nyasaye ndi Nyasaye wenyu. Mulonde malako kaanje nende mechitso kaanje.

²⁰Kholi litukhu lianje li Lisabato khuva litakatifu, khu live khuli shimanyilu shi lilakano lia khwakhola hakari hanje nende munyi, limukhole khwitsushitsa ndi ninzi Mwami Nyasaye, uli Nyasaye wenyu.’

²¹“Navutswa khali vandu vi likhula lienelo vambinganyinya. Vambakhana khulonda malako kaanje nende mechitso kaanje, ku mundu alondanga, atsililile khuva mwoyo. Vononyinya malako khulondokhana khulitukhu lianje li Lisabato. Nali ninzirecheshe khuvasalilitsila mu shiangalangwi khuvirila mu vurima vwanje, khali khuvativitsa voosi.

²²Navutswa shinali nakhola kenako tawe, shichila kali kanderela tsisoni mu vandu vi tsimbia tsindi, vali nivalola khuli narulitsa Vaisraeli mu shivala shia Misri.

²³Khali ndio, namanya ninzisuuhila mu shiangalangwi ndi niitsa khuvasalanyinya mu vivala vindi mu shivala,

²⁴shichila vambakhana khulonda mechitso kaanje, vameneka malako kaanje, vambakhana khulonda malako khulondokhana khulitukhu li Lisabato, khali nivasaala khu misambwa milala miele chia vakuuka vavo vasaalakhu.

²⁵“Nalwo lwa navaha malako matamanu ku khulonda nende mechitso kanyala khuvikalila khuva mwoyo.

²⁶Nachila nivononyinywa khuvirila khu vihanwa vilala viele via nali nivaheele. Navaha vwiyangu khukhola musango kwa vaana vavo vu khuraanga khuli shihanwa shiu khusambwa khu vanyasaye vavo, khwenya khuvarishitsa. Niitsa khukhola kenako khwenya vamanye ndi ninzi Mwami Nyasaye.

²⁷“Khulwa yako, yivi mwana wu mundu, nuyaanza voolela Vaisraeli likhuva lianje liambolanga. Nindi khandi vakuuka vavo vanyekanga, lwa vambakhana khuva vasuuvilwa khwinzi.

²⁸Navinjilitsa mu shivala shia nali nalaaka navaha. Lwa valola vikulu viraambi nende misala mbisi, vakholelaho chiosi misango. Vanomba nimba nu vurima khuvirila khu vihanwa viu khusambwa nende idivai ya vali nivaleri khuli vihanwa khwinzi.

²⁹Navareeva, ‘Ni havundu shina ha mutsitsanga khusaalilanga?’ Vo vanjipa, ‘Halaangwangwa nunundi Havundu Hichingukha.’

³⁰“Khulwa yako, voolela Vaisraeli ndi inzi Mwami Nyasaye ndevanga, ‘Mwenyanga khwiyononyinya vene khuli vakuuka venyu vakhola, lwa mwenyanga khusaala khu vindu vi shifwavi via nakaya?

³¹Lwa munyi muhaananga vihanwa khandi muhaana vaana venyu khuli misango chi vihanwa viu khusambwa nu mulilu mwiyononyinyanga vene khuvirila khu misambwa chienyu khali nunundi. Munyi Vaisraeli, nyala khwenyakhu mureevishitsi khwinzi inganakani yu khukhonywa? Nikhali, lwa inzi ndi Mwami Nyasaye uli mwoyo, nzisuuhanga ndi shinyala khuhuchilila khureevwakhu shindu shiosi na munyi tawe.’

³²Munyi mwamenya numuvoolanga, ‘Khwenyanga khuva khuli vandu vi tsimbia tsindi, khuli vandu vi tsimbia tsirulanga mu vivala vindi vasaalanga khu misala nende machina.’ Ka mukanakananga khukhola mu mioyo chienyu kaliitsa khuvula khwikholekha.

³³“Lwa inzi Mwami Nyasaye ndi mwoyo, nzisuuhanga ndi niitsa khumwamiha ni tsingulu tsianje khuvirila mu vurima vwanje.

³⁴Niitsa khumurulitsa mu vandu vi tsimbia tsindi, khandi mulera halala khurula mu vivala viosi via mwasalanyinywamu, khuvirila mu tsingulu tsianje nende vurima vwanje.

³⁵Niitsa khumuhila mu shiangalangwi shia vandu vi tsimbia tsindi. Nindi iweneyo, nalwo lwa niitsa khukhalachila shia mulala khu munyi.

³⁶Niitsa khumukhalachila munyi, khuli nakhalachila vakuuka venyu mu shiangalangwi, nivashili mu shivala shia Misri. Inzi Mwami Nyasaye mali khuvoola.

³⁷“Niitsa khumulinda ni tsingulu tsianje, nu khumukhola khulonda lilakano lianje.

³⁸Niitsa khurulitsa mu munyi shia mundu wosi muhingani, khandi vandu vakholanga vwoni imbeli wanje. Niitsa khuvarulitsa mu shivala shia vamenyamu nunundi, navutswa shiniitsa khuvahuchilila khukalukha mu shivala shia Israeli tawe. Nalwo lwa muliitsa khumanya ndi ninzi Mwami Nyasaye.”

³⁹“Munyi Vaisraeli, inzi Mwami Nyasaye mbolanga, ‘Nu vulahi! Mutsililile khusaala khu misambwa chia vanyasaye venyu, khali nikava mwa yambakhana khumbulishitsa. Navutswa shiumunyala khutsililila khwononyinya lira lianje litakatifu shichila vihanwa vienyu nende misambwa chienyu tawe;

⁴⁰shichila khu shikulu shianje shitakatifu, shikulu shiraambi shiene muno mu Israeli, naho ha munyi Vaisraeli voosi muliitsa khundumishila. Naho ha niitsa khumuhuchilila. Naho ha niitsa khwenya vukhonyi vwenyu nende vihanwa vienyu vilahi viene, halala ni vihanwa vitakatifu vienyu. Inzi Mwami Nyasaye mali khuvoola.

⁴¹Lwa niitsa khumurulitsa mu shivala shia mwasalanyinywamu, nimulera halala, nalwo lwa mbuchilila vihanwa vienyu vilahi viu musango. Nalwo lwa niitsa khumumanyinya vutakatifu vwanje imbeli wa vandu vi tsimbia tsindi.

⁴²Nalwo lwa munyi muliitsa khumanya ndi ninzi Mwami Nyasaye, lwa niitsa khumukalushitsa mu shivala shia Israeli, nishili shivala shia nali nalaaka naha vakuuka venyu.

⁴³Muliitsa khwitsushitsilayo mwiima mutamanu kwenyu nende vikholwa vienyu viachila nu mutamana. Muliitsa khulola vene tsisoni khulondokhana khu vikholwa vitamanu via mwakhola.

⁴⁴Nalwo lwa muliitsa khumanya ndi ninzi Mwami Nyasaye, lwa niitsa khumunyashitsa; shikali khulondokhana khuli mumenyanga inoho khuli mwakoyana tawe; navutswa khulondokhana khuli lira lianje liaheelwa luyali. Inzi Mwami Nyasaye mali khuvoola.’ ”

⁴⁵Mwami Nyasaye yambolela,

⁴⁶“Yivi mwana wu mundu, yishevushi uheenze khuluveka luli ikuvanda, khali wilwatsile vandu vamenyanga ikuvanda weneyo, vamenyanga ikuvanda wi shiangalangwi.”

⁴⁷Vavoolele ndi inzi Mwami Nyasaye mbolanga, “Yivi muliru, niitsa khukhuvwanyinya nu mulilu, khali kulaalitsi shia musala kwosi, muvisi nende kumakanu. Tsimemo tsiu mulilu tsiliitsa khuvula khutsiminywa. Kuliitsa khulaalitsa shia shindu shiosi, khuraanjila khuluveka luli ikuvanda khutukha khuluveka luli ivuluka.

⁴⁸Vandu voosi valiitsa khumanya ndi inzi Mwami Nyasaye naavwanyinya mulilu. Kuliitsa khuvula khutsiminywa.”

⁴⁹Nalwo lwa navoola, “Yivi Mwami Nyasaye! Vandu vilililanga shichila inzi nivavoola, ‘Wayaanza vutswa khwilomolominya mu tsinganu!’ ”