Read tsotso EZEKIELI 25 Bible Online

EZEKIELI 25 - tsotso bible

EZEKIELI 25

¹Mwami Nyasaye yambolela,

²“Yivi mwana wu mundu, chinguula tsimoni tsiotsio uheenze mu shivala shia Amoni, khali uprofete makhuva khulondokhana khushio.

³Voolela Vaamoni: Hulishitsi makhuva ku Mwami Nyasaye avoolanga. Munyi mwali nu vuyaanzi lwa mwalola havundu hanje hatakatifu nihononyinywa, lwa vandu va Yuda vativitsa shivala shia Israeli nivahilwa mu vuhaambe.

⁴Nzitsanga khuchila vandu vi tsimbia tsirulanga khuluveka luli ivukwi khumukwana nu khuvukula shivala shienyu. Valiitsa khumbakha tsimbinga tsiavo mu munyi, nu khusimiikha maheemo kavo ku khumenyamu hakari henyu. Valiitsa khulia matunda kenyu nu khung'wa maveele kenyu.

⁵Niitsa khukhola litaala lia Raba khuva lwayilu lwi tsingamia; khandi mataala ka Vaamoni khuva khuli shiko shia makondi. Nalwo lwa muliitsa khumanya ndi ninzi Mwami Nyasaye.

⁶“Inzi Mwami Nyasaye mbolanga, ‘Lwa mwakhuva tsikhovi, numusilasila nu vuyaanzi khandi numusangala shichila shivala shia Israeli,

⁷niitsa khumusalilitsa. Niitsa khulomba vandu vi tsimbia tsindi khumuyaaya shia shindu shiosi. Niitsa khumutivitsa, na munyi muliitsa khuvula khuva luhia inoho shivala. Nalwo lwa muliitsa khumanya ndi ninzi Mwami Nyasaye.’ ”

⁸Mwami Nyasaye yavoola, “Lwa shivala shia Moabu shiavoola ndi vandu va Yuda ni shilala na vandu vi tsimbia tsindi tsiosi,

⁹niitsa khuchila mataala kavotokhane shivala shia Moabu khuseerwa, khali mataala malahi yako, nikali Betsi-yeshimotsi, Baali-mehoni nende Kiriatsahimu.

¹⁰Niitsa khuchila vandu vi tsimbia khuluveka luli ivukwi khuvakuura, nu khuvukula miandu chiavo. Shivala shia Moabu shilitsa khuvula khwitsushitswa mu vandu vi tsimbia tsindi.

¹¹Niitsa khutivitsa shivala shia Moabu. Nalwo lwa valiitsa khumanya ndi ninzi Mwami Nyasaye.”

¹²Mwami Nyasaye yavoola, “Lwa Vaedomu vavanzila vutamanu vwa vandu va Yuda va vakhola,

¹³inzi Mwami Nyasaye mbolanga, ‘Niitsa khusalilitsa Edomu, nu khumulula shia mundu wosi nende tsinyama tsiumbulimu khurula mu shivala shienesho. Niitsa khushikhola khukwa shiangalangwi shiele khuraanjila mu litaala lia Temani khutsia khutukha Dedani, wa vandu valiitsa khwiirwa ni shivavi.

¹⁴Vaisraeli valiitsa khumbanzila ka Edomu yakhola. Valiitsa khuchila Vaedomu khuvirila mu vurima vwanje vululu. Nalwo lwa Vaedomu valiitsa khumanya ha vurima vwanje vutukhanga. Inzi Mwami Nyasaye mali khuvoola.’ ”

¹⁵Mwami Nyasaye yavoola, “Lwa Vafilisti vavanzila vutamanu vwa vatsiku vavo va vakholela, khandi nivatsililila khuva vatsiku vavo khuluhono,

¹⁶inzi Mwami Nyasaye niitsa khusalilitsa Vafilisti. Niitsa khutivitsa Vakeretsi nende vandu vamenyanga himbi khu inyanza.

¹⁷Niitsa khuvasalilitsa vululu muno, nimbanzila ka vakholanga. Valiitsa khuvirila mu vurima vwanje. Nalwo lwa valiitsa khumanya ndi ninzi Mwami Nyasaye.”