Read tsotso EZEKIELI 28 Bible Online

EZEKIELI 28 - tsotso bible

EZEKIELI 28

¹Mwami Nyasaye yambolela khandi,

²“Yivi mwana wu mundu, voolela Mwamihi wi litaala lia Tiro ka inzi Mwami Nyasaye mbolanga. Lwa uli nu mwoyo ku khwilola, khandi ulomolomanga nuvoola nivi nyasaye, wikhalanga khu shisoko shiu vwami hakari hi inyanza, navutswa uli vutswa mundu, shiuli mutakatifu khuli nyasaye tawe;

³ni kilikali, unyala khuva uli nu vusitsa khuvira Danieli, khandi shindu shivulakhuho shia waviswa;

⁴nivi warumishila vusitsa nende vucheli vwovwo khwivishila miandu mu vunyishi, nu khwivunjishitsila itsahabu nende ifetsa mu livishilu liolio.

⁵Vusitsa vunyishi vwa uli navwo mu likhola vukhala, vwakhola miandu chiochio khuva minyishi, nu khwilola khuvirila mu miandu chiochio!

⁶Khulwa yako, Mwami Nyasaye avoolanga, Lwa wivukulanga mwene khuva nu vusitsa khuli nyasaye,

⁷niitsa khukhulerela vatsiku khukhusalilitsa yivi, khurula mu vandu vi tsimbia tsindamanu khuvira tsimbia tsindi tsiosi. Valiitsa khwononyinya vindu vilahi viosi via wanyola khuvirila mu vucheli vwovwo nende vusitsa.

⁸Valiitsa khukhusiuva mu vwina, khandi uliitsa khukhutsila mu luliiva lwi inyanza, manya khuli vandu viirwa.

⁹Uliitsa khutsililila khuvoola, ‘Ninzi nyasaye’, imbeli wa vandu va khwiiranga, khali nikava uli vutswa mundu, navutswa shiuli nyasaye tawe, imbeli wa yavo vakhusalilitsanga tsinguma?

¹⁰Uliitsa khukhutsa khuli vandu vasoleli vakhutsanga lwa vandu vi tsimbia tsindi valiitsa khukhwiira; shichila inzi Mwami Nyasaye mali khuvoola.”

¹¹Mwami Nyasaye yambolela khandi,

¹²“Yivi mwana wu mundu, yimba lwimbo lu khwikhulu shichila Mwami wa Tiro. Muvoolele ndi inzi Mwami Nyasaye mbolanga: Mwami wa Tiro, nivi wali shimanyilu shiu vuseletse; wali waheelwa luyali lunyishi nende liiva liu vuseletse.

¹³Nivi wamenyanga Edeni, nukuli Mulimi kwa Nyasaye, nufwalwa machina manyishi ku vukuuli vululu lukanu na lukanu, khuli lichina liu vulimu, topazi, yaspi, zabarayadi, lichina liu vukuuli vululu, lichina lia mayayi, yaspi, machina ki ilaanji ya bulu, lichina lia bulu na mayayi nende machina kandi ku vukuuli vululu.

¹⁴Ninzi warovola injelosi khukhulinda; numenya mu Shikulu shianje shitakatifu nuchenda khu machina kakhanga mulilu.

¹⁵Wali wamenya limenya liseletse khuraanjila khulitukhu lia waloongwa, khutukha lwa waraanga khukhola vwoni.

¹⁶Muvunyishi vu vukhala vwa wakholanga, wali mutamanu khandi wakholanga vwoni. Khulwa yako, namanya nikhukhunga khuli shindu shiononyinywa khurula khu Shikulu shia Nyasaye, khandi injelosi ikhulindanga yeyo yakhukhunga khurula hakari ha machina kakhanga mulilu.

¹⁷Wali nu mwoyo ku vwiloli shichila wali wakaasa likoondo; luyali lwolwo lwachila nukoyana khuli mundu muyiingwa. Ninzi wakhusiuva hasi; khali nikhwilavushitsa imbeli wa vami, khu vakhuheenze valole khuli lwa usasanga.

¹⁸Khuvirila khu vutamanu vwa wakholanga mu vunyishi, nurumishila vukaati mu likhola vukhala vwovwo, wononyinya havundu hoho hatakatifu. Khulwa yako, ninzi wahaambitsa mulilu mu yivi khali nikhulaalitsa khutukha lwa wakwa likooshe imbeli wa vandu voosi vakhulolakhu.

¹⁹Voosi vamanya yivi mu vandu vachenyelanga ka khukwila; wamala khutivitswa khali shiuliitsa khusinjila mihika ni mihika tawe.”

²⁰Mwami Nyasaye avoolanga,

²¹“Yivi mwana wu mundu, yishievushi uheenze litaala lia Sidoni nulomoloma vuprofeti khulio;

²²nuvoola ndi inzi Mwami Nyasaye mbolanga: Yivi litaala lia Sidoni, niitsa khukhukalukhana, nikhumanyinya ndi ninzi uli nu vukhumi. Nalwo lwa uliitsa khumanya ndi ninzi Mwami Nyasaye, lwa niitsa khuva nikhukhalachilanga khandi nimanyinyanga mu yivi vutakatifu vwanje.

²³Niitsa khuchila lukhutsu khwinjilila vandu vamenyamu, shisahi khusuundulwa mu tsinjila tsi litaala likali; vandu valiitsa khwiirwa mulio ni shivavi shia vaviirilanga khurulila mu tsimbeka tsiosi.”

²⁴Nyasaye avoolanga, “Lwa kaliitsa khwikholekha, Vaisraeli shivaliitsa khumenyakhu na vareende va vanyashitsanga nu khuvakhola khuli vandu vachendanga mu mulimi kwa marakalu inoho mavwa tawe. Nalwo lwa Vaisraeli valiitsa khumanya ndi inzi Mwami Nyasaye neye ukholi kenako.”

²⁵Mwami Nyasaye avoolanga, “Lwa niitsa khulaanga halala Vaisraeli khurula mu vandu va vasalanyinywamu, nu khumanyinya khuli ndi mutakatifu khuvo imbeli wa vandu vi tsimbia tsindi, nalwo lwa valiitsa khumenya mu shivala shiavo vene, shia nali ninaha murumishi wanje Yakobo.

²⁶Valiitsa khumenya mu shivala shienesho mu milembe; valiitsa khumbakha tsinzu, nivaraaka misabibu mu milimi chiavo. Valiitsa khumenya mu milembe lwa niitsa khuva nikhalachilanga vareende vavo va vavukulanga vutamanu. Nalwo lwa valiitsa khumanya ndi ninzi Mwami Nyasaye, uli Nyasaye wavo.”