Read tsotso EZEKIELI 29 Bible Online

EZEKIELI 29 - tsotso bible

EZEKIELI 29

¹Khulitukhu li likhomi na kavali liu mweli kwi likhomi, khumuhika kwi likhomi nu khuli mu vuhaambe, Mwami Nyasaye yambolela,

²“Yivi mwana wu mundu, kalukhana Mwami wa Misri. Muvoolele makhuva khulondokhana khuli ye mwene halala na vandu vamenyanga mu shivala shia Misri valiitsa khusalilitswa.

³Muvoolele ndi inzi Mwami Nyasaye mbolanga: Niitsa khukhukwana yivi Mwami wa Misri, yivi ulolekhanga khuli ikweeno ingali ikonanga hakari mu matsi ku Muchela kwa Naili! Ukanakananga Muchela kwa Naili ni kwokwo, khandi nivi wakulomba!

⁴Niitsa khulivira ingaka mu miino koko, khandi njili tsisutsi tsiosi mu muchela tsihaande khu yivi. Niitsa khukhukhwesa khurula mu Muchela kwa Naili, halala ni tsisutsi tsiosi tsiahaanda khu yivi.

⁵Niitsa khukhusiuva mu shiangalangwi, yivi nende tsisutsi tsienetso tsiosi, mmbili kwokwo kuliitsa khukwa mu shikuri, khali mundu avulakhuho uliitsa khukhuvukula akhuyeveele. Niitsa khulomba manyonyi nende tsinyama tsiumbulimu, tsilii mmbili kwokwo khuli ni shiukhulia.

⁶Nalwo lwa Vamisri valiitsa khumanya ndi ninzi Mwami Nyasaye.” Mwami Nyasaye avoolanga, “Vaisraeli vali vasuuvilila mu yivi uvakhonye, navutswa wali muteteshele khuli shitundu shiteteshele.

⁷Lwa vakhukumila mukhono, watong'okhanamu, nusiavula maveeka kavo nu vakhola nivakwa. Lwa vitiila khu yivi, watong'okhanamu, nuranga khutechela viungu viu mmbili kwokwo.”

⁸Khulwa yako, inzi Mwami Nyasaye mbolanga: Niitsa khuruma vasikali khwitsa khukhukwana ni vivavi yivi Mwami wa Misri. Valiitsa khwiira vandu vovo halala ni tsinyama tsiotsio tsiosi,

⁹khutukha lwi shivala shia Misri shiliitsa khurikala shiangalangwi shiele. Nalwo lwa muliitsa khumanya ndi ninzi Mwami Nyasaye. Lwa umali khuvoola ndi Muchela kwa Naili nu kwokwo khandi nivi wakulomba,

¹⁰ni kilikali, niitsa khukhola vutsiku khu yivi khandi khu michela chiochio. Niitsa khutivitsa shia shindu shiosi mu shivala shia Misri, khutukha lwa shiliitsa khukwa shiangalangwi shikhaya khuraanjila Migidoli khutsia khutukha Siyene khali khu mipaka chia Etsopia.

¹¹Mundu avulakhuho inoho inyama iliitsa khuchenda yavirilamu. Shindu shivulakhuho shiliitsa khumenyayo khumihika makhomi kane.

¹²Niitsa khuchila shivala shia Misri shilitivitswa mu vivala vindi viosi mu shivala. Mataala ki shivala shia Misri kaliitsa khukwa lichiinga khumihika makhomi kane; kaliitsa khutivitswa muno khali khuvira mataala kandi koosi khulilova. Niitsa khulomba Vamisri khwilushila mu shivala shindi. Valiitsa khwilukha khutsia mu shia shivala nu khumenya na vandu vi shivala shienesho.

¹³Mwami Nyasaye avoolanga, “Niitsa khukalushitsa Vamisri mu shivala shiavo vene khurula mu vandu vi tsimbia tsindi, tsia navasalanyinyamu;

¹⁴niitsa khuvakhola vamenye ingo wavo wavivulwa, khuluveka luli ikuvanda wi shivala shia Misri. Valiitsa khuvula khuva luhia lwi tsingulu nivamenyayo.

¹⁵Luliitsa khuva luhia luteteshele mu vandu vi tsimbia tsindi tsiosi, khandi valivula khwamihakhu vandu vi tsimbia tsindi. Niitsa khuvalomba valivula khuva ni tsingulu, khali tsiu khwamiha vandu vi tsimbia tsindi.

¹⁶Shivala shia Israeli shishiliitsa khwilukhachila khuvo khwenya khukhonywa tawe. Matiinyu kalinyola shivala shia Misri, kaliitsa khuva khuli liechitso khu Israeli ndi shiuvuli vulahi khwilukhachila vakhonyi vwa Vamisri tawe. Nalwo lwa Israeli valiitsa khumanya ndi ninzi Mwami Nyasaye.”

¹⁷Khulitukhu liu khuraanga khu mweli kukhuraanga khumuhika kwa makhomi kavili na saba, lwa khwali nu khushili mu vuhaambe, Mwami Nyasaye yambolela likhuva lielie.

¹⁸Yavoola, “Yivi mwana wu mundu, Mwami Nebukadineza wa Babilonia yakwana litaala lia Tiro. Yanika mukaanda kwa vasikali veve khuchinga misiko militoho khu murwi chiavo khali nivarikala viole khandi nivasionekha maveeka kavo. Navutswa shindu shivulakhuho shiu mwami wavo, inoho vasikali veve vanyola khurulana khu matiinyu ka vavirilamu.

¹⁹Khulwa yako, inzi Mwami Nyasaye mbolanga, ‘Niitsa khuvukula shivala shia Misri, nu khuhaana khu Mwami Nebukadineza. Aliitsa khuyaayamu shia shindu shiosi nu khuvukula miandu chiosi chi shivala shia Misri, khuli murungu kwa vasikali veve.

²⁰Mali khumuha shivala shia Misri khuli murungu, shichila muhinzilu kwekwe, shichila mukaanda kwa vasikali veve vakholela mihinzilu. Inzi Mwami Nyasaye mali khuvoola.’

²¹“Lwa kaliitsa khwikholekha, niitsa khuchila Vaisraeli valinyola tsingulu, makhukhole yivi Ezekieli khulomolomela havundu ha shia mundu wosi aliitsa khukhulolela. Nalwo lwa valiitsa khumanya ndi ninzi Mwami Nyasaye.”