Read tsotso EZEKIELI 32 Bible Online

EZEKIELI 32 - tsotso bible

EZEKIELI 32

¹Khumuhika kwi likhomi na chivili, litukhu liu khuraanga khu mweli, Mwami Nyasaye yambolela,

²“Yivi mwana wu mundu, wimbile Mwami wa Misri lwimbo lu khwikhula, nuvoola, ‘Wivukulanga mwene khuli uli isimba mu vandu vi tsimbia tsindi tsiosi, navutswa uli vutswa khuli ikweeno mu inyanza. Yivi mwene wituumbulanga mu michela, nutuuvulanyinya matsi ni vilenje viovio, khali nu wononyinya michela.’

³Inzi Mwami Nyasaye mbolanga: Niitsa khukhusiuvila ineti yanje, imbeli wi shikhaalo shia vandu vanyishi. Inzi mwene nakhukumilila khuluchinga mu ineti yanje ingali muno.

⁴Niitsa khukhusiuva khuluchinga, niitsa khukhulekha havundu havulavu, nu khulomba manyonyi nende tsinyama tsiumbulimu khukhulia.

⁵Niitsa khusalanyinya inyama yoyo khu vikulu, nu khwitsulitsa tsihoongo nu mmbili kwokwo.

⁶Niitsa khulomba masahi koko khusalana khulilova khutukha mu vikulu, khandi virula via matsi viliitsa khwitsula masahi koko.

⁷Lwa niitsa khukhutivitsa, niitsa khukhunikha likulu, nu khumwaminya tsinyining'ini; niitsa khukhunikha liuva na malesi, mweli kulivula khwakha vulavu.

⁸Niitsa khumwaminya shia vulavu vwosi mwikulu, shivala shilikwa shisuundi. Inzi Mwami Nyasaye mali khuvoola.

⁹“Niitsa khuchila vandu vanyishi vanyakhane mu mioyo chiavo, lwa niitsa khumuhila muvuvohe mu vandu vi tsimbia tsindi, mu vivala via mwakorwa shindu shiosi khulondokhanakhu.

¹⁰Niitsa khulomba vandu vanyishi khukhuchenyela, vami vavo valiitsa khutechela shichila yivi, lwa valiitsa khundola nindi ni shivavi shianje. Valiitsa khutechela shia khase khosi, shia mulala naria shichila vulamu vwevwe, khulitukhu lia uliitsa khutivitswa,

¹¹shichila inzi Mwami Nyasaye mbolanga: Mwami wa Babilonia aliitsa khukhwiira ni shivavi shieshie.

¹²Vandu vovo vanyishi valiitsa khwiirwa ni vivavi via vasikali, nivali vandu valulu khuvira vi vivala vindi viosi. Valiitsa khutivitsa vwiloli vwi shivala shia Misri nu khwiira vandu voosi.

¹³Niitsa khutivitsa miruku chienyu chiosi himbi ha Muchela kwa Naili. Matsi kali mukwo shikaliitsa khutuuvulwa inoho khwononyinywa khandi tawe.

¹⁴Niitsa khulenjelitsa matsi keke khandi michela chiechie khwelelekha khuli makura. Inzi Mwami Nyasaye mali khuvoola.

¹⁵“Lwa niitsa khutivitsa shivala shia Misri nu khwononyinya shia shindu shiosi mu shivala mwenomo, khumulula shia mundu wosi, nalwo lwa valiitsa khumanya ndi ninzi Mwami Nyasaye.

¹⁶“Kamali khulaaka khukhola yaka kaliitsa khukalukhana khukwa lwimbo lu khwikhula. Vandu vakhali khurula mu vandu vi tsimbia tsindi valiitsa khulwimba, khulu khwikhula shivala shia Misri nende vandu vamenyamu. Inzi Mwami Nyasaye mali khuvoola.”

¹⁷Khulitukhu li likhomi na karanu liu mweli kukhuraanga, khumuhika kwa khavili, khurula nu khurulitswa mu vuhaambe, Mwami Nyasaye yambolela,

¹⁸“Yivi mwana wu mundu! Lila tsikhwili shichila vandu vanyishi vi shivala shia Misri. Uvarume hasi khutsia khumenya na vandu vakhutsa khale.

¹⁹Vavoolele, Munyi mukanakananga muli valahi khuvira vandi? Tsi mu shihatisi mukhutsilimu na vandu vatamanu vakorwa Nyasaye!

²⁰Vamisri valiitsa khwiirwa na yavo valiirwa muliihe ni shivavi. Shivala shia Misri nende vandu veve vanyishi valiitsa khutivitswa muliihe.

²¹Vimilili vali ni tsingulu tsinyishi nende vandu va vakhonyanga nivali mu shihatisi valiitsa khuvoola, ‘Vamisri vakholomoshe hasi, vakhutsa halala na vandu vatamanu vakorwa Nyasaye, vali niviirwa muliihe.’

²²“Vashuria vali iweneyo, vavotokhanwa ni vilindwa via vasikali veve, voosi vali niviirwa muliihe;

²³vilindwa viavo vili hasi mukari mwene mu vwina vwenovo. Vasikali vavo voosi viirwa muliihe khandi vilindwa viavo vivavotokhananga. Mumatukhu ka vali nivashili mwoyo, varishitsanga vandu shia havundu hosi mu shivala shia vandu vashili mwoyo vamenyamu.

²⁴“Khali Vaelamu vali iweneyo, va votokhanwa ni vilindwa via vasikali vavo viirwa muliihe. Shia mundu wosi mutamanu wakorwa Nyasaye yakholomokha natsia mu shihatisi. Mumatukhu ka vali nivashili mwoyo, vali varishitsa vandu mu shivala shia vamenyamu, navutswa nunundi tsisoni tsia valia halala na yavo vakholomokha nivatsia navo mu shihatisi.

²⁵Vaelamu vakhutsilayo halala na yavo viirwa muliihe. Vavotokhanwa ni vilindwa via vasikali vavo viirwa muliihe vatamanu vakorwa Nyasaye. Mumatukhu ka vali nivashili mwoyo varishitsa vandu vashili mwoyo mu shivala shiavo, nikhali valiho tsisoni tsia vakumila halala na yavo vali niviirwa muliihe.

²⁶“Mesheki nende Tubali valiyo, khandi vilindwa via vasikali vavo va vavotokhana. Voosi ni vasoleli, vayiirwa muliihe. Khali ndio, vaheenditsa vandu vashili mwoyo mu mioyo.

²⁷Valekhwa khuyeveelwa na vandu vamenyanga mumatukhu kakhale vayeveelwa mu shilindwa niviyavaale viuchi viavo, nivitiilitsi vivavi khu mirwi chiavo khandi niviyavaale tsingavo tsiavo. Vandu vi tsingulu venavo lwa vali nivashili mwoyo, vali varishitsa vandu mu shivala.

²⁸Khulwa yako, munyi Vamisri muliitsa khutivitswa, khali mivili chienyu chiliyeveelwa na vandu vatamanu vakorwa Nyasaye vali niviirwa muliihe.

²⁹“Vaedomu vamenyayo halala na vami vavo nende vamihi vavo voosi. Lwa vali nivashili mwoyo vali vayitsula tsingulu, navutswa nunundi vakhutsa shilala na vandu vatamanu vakorwa Nyasaye.

³⁰“Vimilili voosi va vandu varulanga khuluveka luli ivuluka valiyo khandi; khali Vasidoni vatsia khwiyunga na vandu vakhutsa. Mumatukhu ka vali nivashili mwoyo, varishitsa vandu vali nivashili mwoyo shichila tsingulu tsiavo; navutswa nunundi vandu vatamanu vakorwa Nyasaye vayeveelwa halala na yavo vali niviirwa muliihe. Voosi vavirilanga mu tsisoni halala na yavo vakhutsa nivayeveelwa mu vilindwa.

³¹“Lwa Mwami wa Misri aliitsa khulola vandu venavo aliitsa khuleminywa mwoyo kwekwe, shichila ali nu mukaanda kwa vasikali vanyishi. Inzi Mwami Nyasaye mali khuvoola.

³²“Ninzi wachila Mwami wa Misri narishitsa vandu vali nivashili mwoyo, navutswa ye mwene nende mukaanda kwa vasikali veve valiitsa khukhutsila muliihe, nu khuyeveelwa mu vilindwa halala na vandu vatamanu vakorwa Nyasaye, vali niviirwa muliihe. Inzi Mwami Nyasaye mali khuvoola.”