Read tsotso EZEKIELI 33 Bible Online

EZEKIELI 33 - tsotso bible

EZEKIELI 33

¹Mwami Nyasaye yambolela,

²“Yivi mwana wu mundu, lomoloma na vandu vandi vumenyanga navo, uvavoolele: Nikava nyala khuchila liihe live mu shivala, ma vandu vi shivala shienesho varovole mundu muvo vene, nu khumukhola khuva mulindi wavo,

³khandi nikava aliitsa khulola mutsiku niyitsanga khuvakwana, mulindi aliitsa khukhuva shisiliva nu khuchelihitsa vandu vamanye shikholekhanga.

⁴Nikava mundu aliitsa khuhulila shisiliva nishikhuvwangwa nu khuchaya shia kavoolanga, khali mutsiku khwitsa khumwiira, ye mwene aliitsa khwituula shichila likhutsa lielie.

⁵Yahulila shisiliva nishikhuvwangwa, manachaya lichelihitso lia shiavoolanga. Mwene aliitsa khwituula niiva aliitsa khukhutsa. Navutswa nikava yakhahulishitsi malonde lichelihitso, yakhihonyinyi mwene.

⁶“Navutswa niiva mulindi aliitsa khulola mutsiku niyitsanga khukhukwana nu khulekha khukhuva shisiliva, vandu vavuli khuchelihitswa, ma mutsiku yitsi khwiira mulala khuvo; mundu mwenoyo aliitsa khukhutsa shichila vutamanu vu mulindi mwenoyo, navutswa niitsa khutuula mulindi shichila likhutsa liu mundu mwenoyo.

⁷“Yivi mwana wu mundu, mali khukhurovola khuva mulindi wa Israeli. Isaa yosi ya uliitsa khuhulila kambolanga, uliitsa khuvachelihitsa mu ka vakholanga.

⁸Niiva niitsa khuvoolela mundu mutamanu: Yivi mwana wu mundu mutamanu, ni kilikali uliitsa khukhutsa, khandi uleshe khulomoloma nu khuchelihitsa mundu mutamanu mwenoyo alekhane nu vutamanu vwevwe. Mundu mutamanu mwenoyo aliitsa khukhutsa shichila vutamanu vwevwe. Navutswa niitsa khukhuvukula yivi khuva mutamanu, shichila likhutsa lielie.

⁹Navutswa niiva uliitsa khuchelihitsa mundu mutamanu alekhane nu vutamanu vwevwe, naye yambakhane khulekhana nu vutamanu, aliitsa khukhutsila mu vutamanu vwevwe mwene, navutswa yivi mwene uliitsa khuhonyinya vulamu vwovwo.”

¹⁰Mwami Nyasaye avoolanga, “Yivi mwana wu mundu, kalushila khuvoolela Vaisraeli ka vavoolanga vene, ‘Khwalitohitswa nu vwoni vweru nende vutamanu vwa vene khwakhola. Tsingulu tsikhuvwele. Khunyala ndina khutsililila khuva nu vulamu?’

¹¹Khulwa yako, vavoolele, ‘Nzisuuhanga mumatukhu koosi ka inzi Mwami Nyasaye shili mwoyo ndi mbulakhu shinyanzitsanga, lwa mundu mutamanu akhutsanga; navutswa ndi nu vuyaanzi khulola mundu mutamanu nalekhane nu vutamanu vwevwe, nu khutsililila khuva mwoyo. Munyi Vaisraeli, mwikanile khurula mu vwoni vwenyu, khandi mulekhane nu mwiima kwenyu mutamanu! Shichila shina mwenyanga khukhutsa?’

¹²“Yivi mwana wu mundu, voolela vandu vovo va wumenyanga navo: Mundu wi likhola liu vulunji nakholi vwoni, likhola lielie liu vulunji liliitsa khukora. Mundu mutamanu naleshi khukhola vwoni, aliitsa khuvula khusalilitswa. Mundu wi likhola liu vulunji naraanga khukhola vwoni, aliitsa khuvula khutsililila khuva mwoyo khulondokhana khu likhola lielie liu vulunji.

¹³Khali niiva mbolelanga mundu wi likhola liu vulunji ni kilikali aliitsa khuva mwoyo, nikhali niiva aliitsa khusuuvilila mu vulunji vwevwe nu khukhola vutamanu, shikholwa shiosi shivulakhuho mu vikholwa vievie viu vulunji shilitsa khwitsushitswakhu. Navutswa aliitsa khukhutsa shichila vutamanu vwa mwene yakhola.

¹⁴Khali ngalushilanga khuvoolela mundu mutamanu, ‘Ni kilikali uliitsa khukhutsa,’ nikhali niiva aliitsa khulekhana nu vwoni vwevwe khandi akhole katoto khandi likhola liu vulunji,

¹⁵nikava aliitsa khukalushitsa shindu shia yavukula shichila likoovi, khukalushitsa shia yanuula vandi, nu khumenya khulondokhana khu malako kahaananga vulamu, mundu mwenoyo aliitsa khutsililila khuva mwoyo, shialiitsa khukhutsa tawe.

¹⁶Vwoni vwa mwene yakhola vuliitsa khuvula khwitsushitswa. Ni kilikali, aliitsa khutsililila khuva mwoyo, shichila ye mwene ukholi katoto khandi likhola liu vulunji.

¹⁷“Navutswa khali ndio, vandu vovo va wumenyanga navo vavoolanga, ‘Shia inzi Mwami Nyasaye kholanga shikali katoto tawe!’ Ni kilikali, ka vo vene vakholanga nako kakhali katoto tawe.

¹⁸Lwa mundu wi likhola liu vulunji aliitsa khulekha khukhola likhola liu vulunji, makhola vutamanu, ni kilikali aliitsa khukhutsa shichila kenako.

¹⁹Lwa mundu mutamanu aliitsa khulekha khukhola vutamanu, makhole katoto khandi likhola liu vulunji, ni kilikali aliitsa khutsililila khuva mwoyo shichila kenako.

²⁰Navutswa munyi muvoolanga, ‘Mwami Nyasaye walekhana ni likhola liu vulunji.’ Niitsa khumukhalachila khurulana khu ka vene mukholanga.”

²¹Khulitukhu lia kharanu khu mweli kwi likhomi khumuhika kwa khwamenyanga mu vuhaambe, mundu wundi vutswa yali wayilukha khurula mu Yerusalemi khwitsa khwinzi. Yavoola, “Litaala likali limali khutivitswa!”

²²Khulitukhu liu mundu mwenoyo yitsa khwinzi, khwali khulokolovo khwi litukhu lienelo, lwa tsingulu tsiu Mwami Nyasaye tsiali nitsikhanga mwinzi. Lwa mundu mwenoyo yitsa mu mavwevwe yali umbolele khale shiambola; namanya ninomoloma vuchila khuhonjela.

²³Mwami Nyasaye yambolela,

²⁴“Yivi mwana wu mundu, vandu vamenyanga mu mataala kakwa lichiinga mu shivala shia Israeli vavoolanga, ‘Aburahamu yali vutswa mundu mulala wonyene, manaheelwa shivala shiosi. Nikhali khutsi ni vandu vanyishi, nunundi shivala yishi ni shieru shiu khumenyamu.’

²⁵“Vavoolele ndi inzi Mwami Nyasaye mbolanga, ‘Munyi muliitsanga inyama ishilimu nu musahi, khandi musaalanga khu misambwa chienyu, nu khusuundula shisahi. Khulwa yako, munyala khuvukula shivala yishi mumenye mushio toto?

²⁶Mwasuuvilila vivavi vienyu, mukholanga vindu vi shifwavi, khandi shia mulala khu vandu vasatsa yava achenda chendanga nu mukhali wu mureende wewe! Khulwa yako, munyala khuvukula shivala yishi mumenye toto?’

²⁷Muvavoolele ndi inzi Mwami Nyasaye mbolanga: Ni kilikali, khumatukhu koosi ka inzi Mwami Nyasaye shili mwoyo, nzisuuhanga ndi vandu vamenyanga mu mataala kakwa lichiinga valiitsa khwiirwa ni shivavi. Mundu wumenyanga mu mulimi niitsa khulomba tsinyama tsiumbulimu tsilimulia. Lukhutsa luliitsa khwiira yavo vamenyanga mu tsimbinga nende mu tsimbangaywa.

²⁸Niitsa khulomba shivala khukwa shiangalangwi khandi shiele vutswa. Niitsa khutivitsa vasikali vavo vilola vi tsingulu; vikulu via Israeli viliitsa khukwa shiangalangwi, vuchila mundu khukhalakanyilamu.

²⁹Lwa niitsa khusalilitsa vandu shichila vwoni vwavo nu khulomba shivala khukwa shiangalangwi, vuchila mundu khumenyamu, nalwo lwa muliitsa khumanya ndi ninzi Mwami Nyasaye.”

³⁰Mwami Nyasaye yambolela, “Yivi mwana wu mundu, vandu vandi valomolomanga makhuva khulondokhana khu yivi. Khali vikhale himbi khu masisi khandi mu miliango chi tsinzu tsiavo, nivavoolelana, ‘Leshi khutsi khuhulishitsa ku Mwami Nyasaye avoolanga!’

³¹Vitsanga khukhulola khuli vandu vitsanga mu vituma mu vituma, mavikhala imbeli wowo khuli ni vandu vaanje. Vahulilanga makhuva koko ka uvoolanga, navutswa shivanyala khukakhola tawe; shichila vamanyinyanga vali nu vuyaanzi vutswa mu ka valomolomanga, navutswa vavula shia varweshitsanga mu mioyo chiavo.

³²Ulolekhanga khuvo khuli mundu wimbanga tsinyimbo tsindahi tsiene muno, mundu wimbanga nu mwoyo mulahi khandi ukhuvanga vukhana vulahi; shichila vahulilanga makhuva koko, navutswa valekha khukakhola.

³³Navutswa lwa kaliitsa khwikholekha -- ni kilikali kaliitsa khwikholekha -- nalwo lwa muliitsa khumanya ndi khwaliho nu muprofeti mu munyi.”