Read tsotso EZEKIELI 37 Bible Online

EZEKIELI 37 - tsotso bible

EZEKIELI 37

¹Inzi Ezekieli nitsula tsingulu tsiu vunyali vu Mwami Nyasaye. Yanjinguula khuvirila khu Roho wewe, nambikha mu luhoongo lwali nulwitsula vikuumba.

²Yanjenditsa shia havundu hosi mu vikuumba vienevo. Khwali ni vikuumba vinyishi viene mu luhoongo lwenolo. Navutswa viali viayumakana muno.

³Mwami Nyasaye yambolela, “Yivi mwana wu mundu, ni kilikali vikuumba yivi vinyala khuva nu vulamu khandi?” Nalwo lwa namuchipa, “Mwami Nyasaye, nivi wamanya!”

⁴Nalwo lwa yambolela, “Rulitsa vuprofeti khu vikuumba yivi. Munyi vikuumba viumakana, muhulishitsi makhuva ku Mwami Nyasaye avoolanga.

⁵Mwami Nyasaye avoolanga, ‘Loli! Nzitsanga khuvura miuya mu munyi, khu mutsililile khuva mwoyo!

⁶Niitsa khuchila mwava ni inyama nende miishi, khali nilimukhunikha ni shikhanda. Niitsa khuvura miuya mu munyi mutsililile khuva mwoyo. Nalwo lwa muliitsa khumanya ndi ninzi Mwami Nyasaye.’ ”

⁷Khulwa yako, narulitsa vuprofeti khuli navoolelwa. Lwa nali nishilomolomanga, nahulila liyooko khuli likolongomanga, ma vikuumba vienevo nivaraanga khuhaambana halala.

⁸Lwa nali nishiheenzanga, vikuumba vienevo viali vimeeli miishi nende inyama, halala ni shikhanda; navutswa miuya shichiali mu mivili chienecho tawe.

⁹Nyasaye yambolela, “Yivi mwana wu mundu, rulitsa vuprofeti shichila vushindu! Rulitsa vuprofeti nuvura miuya mu vandu viirwa yava, khu vatsililile khuva mwoyo.”

¹⁰Nalwo lwa narulitsa vuprofeti khulondokhana khuli nali nimbolelwi. Miuya chinjila mu mivili chienecho, manichisinjila; shiali shituma shia vandu shikali shiu khuchenyinya.

¹¹Nyasaye yambolela, “Yivi mwana wu mundu, Vaisraeli vali khuli vikuumba yivi. Vavoolanga vayumakana, vavula lisuuvilitswa khandi vamala khutiva.

¹²Khulwa yako, rulitsa vuprofeti khu vandu vaanje Israeli, nuvavoolela ndi inzi Mwami Nyasaye mbolanga, ‘Niitsa khwikula vilindwa vienyu. Nzitsanga khumurulitsamu nu khumukalushitsa mu shivala shia Israeli.

¹³Lwa niitsa khwikula vilindwa via vandu vaanje vayeveelwamu nu khuvarulitsamu, nalwo lwa munyi vandu vaanje muliitsa khumanya ndi ninzi Mwami Nyasaye.

¹⁴Niitsa khuvura miuya chianje muvo, khali valitsililila khuva mwoyo, nu khumenya mu shivala shiavo vene. Nalwo lwa muliitsa khumanya ndi ninzi Mwami Nyasaye. Nako ka nzitsanga khukhola. Inzi Mwami Nyasaye mali khuvoola.’ ”

¹⁵Mwami Nyasaye yambolela,

¹⁶“Yivi mwana wu mundu: Vukula shisala uhandichi khushio likhuva, ‘Vwami vwa Yuda.’ Uliitsa khuvukula shisala shindi nu khuhandikakhu, ‘Vwami vwa Israeli.’

¹⁷Numali khukhola ndio, uliitsa khukumilanyinya visala vivili yivi mu mukhono kwokwo khushikhola khuva shisala shilala.

¹⁸Lwa vandu vovo valiitsa khukhureeva, ‘Khuvoolelekhu shia kavoolanga?’

¹⁹Uliitsa khuvavoolela ndi inzi Mwami Nyasaye mbolanga, ‘Ndi himbi khuvukula shisala shi inzu ya Yosefu shili mu mukhono kwa Efurahimu, khandi shia vandu vi tsimbia tsia Israeli varula khutsio. Niitsa khuvukula shisala shia Yuda, nu khushira khushio, khu vive shisala shilala khwinzi.’

²⁰“Lwa uliitsa khuva nushili imbeli wavo nushikumile visala via uliitsa khuva numali khuhandikakhu,

²¹nalwo lwa uliitsa khuvavoolela: Mwami Nyasaye avoolanga, ‘Niitsa khurulitsa Vaisraeli, lwa vali vandu vaanje voosi mu vandu vi tsimbia tsia vahilwamu tsiosi, khuvalaanga halala nu khuvakalushitsa mu shivala shiavo vene.

²²Niitsa khuvahambinyinya khuva luhia lulala, nivali khu vikulu via Israeli. Voosi valiitsa khwamihwa nu mwami mulala; navutswa shivaliitsa khuva vivala vivili tawe. Khali shivaliitsa khwavukhanakhu tawe.

²³Shivaliitsa khwiyononyinywa ni misambwa chia vanyasaye vavo inoho na makhuva kavo ki shifwavi inoho vutamanu vwavo tawe. Vo valiitsa khuva vandu vaanje, ninzi niitsa khuva Nyasaye wavo.

²⁴Murumishi wanje Daudi, neye uliitsa khuvamiha. Ni kilikali, valiitsa khuva nu mwayi mulala. Valiitsa khulonda malako kaanje nende mechitso kaanje, khali khukhola kenyekhananga.

²⁵Valiitsa khumenya mu shivala shia nali ninaha Yakobo, wali murumishi wanje, mwa vakuuka venyu vamenyanga. Vo nende vitsukhulu vavo valiitsa khumenyamu mihika ni mihika. Murumishi wanje Daudi, aliitsa khuvamiha mihika ni mihika.

²⁶Niitsa khukhola lilakano li milembe navo mihika ni mihika. Liliitsa khuva lilakano li mihika ni mihika. Niitsa khuvakasitsa khandi vatakase, nu khuvakhola khwivulana mu vunyishi. Niitsa khumbakha havundu hanje hatakatifu muvo khumatukhu koosi. Niitsa khuva Nyasaye wavo, navo valiitsa khuva vandu vaanje.

²⁷Niitsa khumenya muvo. Niitsa khuva Nyasaye wavo, na vo valiitsa khuva vandu vaanje.

²⁸Nalwo lwa vandu vi tsimbia tsindi valiitsa khumanya ndi inzi Mwami Nyasaye neye utakasanga Israeli, lwa havundu hanje hatakatifu hali muvo mihika ni mihika.’ ”