Read tsotso EZEKIELI 38 Bible Online

EZEKIELI 38 - tsotso bible

EZEKIELI 38

¹Mwami Nyasaye yambolela,

²“Yivi mwana wu mundu, kondeshela Mwami Gogi wi shivala shia Magogi, mwimilili wamihanga Mesheki nende Tubali. Rulitsa vuprofeti khuye.

³Muvoolele ndi inzi Mwami Nyasaye mbolanga: Niitsa khukhukwana yivi Gogi, mwimilili wa Mesheki nende Tubali.

⁴Niitsa khukhukalaakalitsa nu khura tsingaka mu miino koko. Niitsa khukhurulitsa hanu halala nu mukaanda kwa vasikali vovo voosi tsifarasi nende vandu vakwanilakhu, niviyavaale viuchi, shituma shia vasikali vi tsingulu nivachinji tsingavo nende vivavi khandi nivifwali tsikofia.

⁵Vasikali va Perisia, Etsopia nende Puti vali navo; voosi vayiyavaala tsingavo, khandi vayifwala tsikofia tsiu mukasa.

⁶Khuliho khandi nu mukaanda kwa vasikali khurula havundu halaangwangwa Gomeri, Betsi-togarimu khuluveka luli ivuluka wene, halala ni mikaanda chia Vasikali vandi khurula mu vandu vi tsimbia tsindi vali navo.

⁷Wirecheshe khukwana halala na vasikali vovo voosi nende vandu vandi voosi va uli navo, khali utsililile khuvalinda.

⁸“Uliitsa khulaangwa matukhu manyishi nikakhavira khutsia khuseera shivala shia vandu vakalushitswamu khurula mu vandu vi tsimbia tsindi; navo vamenyanga mu milembe vuchila khuria liihe. Uliitsa khukwana shikulu shia Israeli shialolekhanga khale khuli ni shiangalangwi, khandi khuli lichiinga khumatukhu manyishi, navutswa nunundi vandu voosi vamenyayo mu milembe.

⁹Uliitsa khuvakwana vwangu muno khuli imbuutsa ihuutsanyinyanga shindu. Uliitsa khusalana shia havundu hosi khuli malesi kakhunikhanga yivi, mukaanda kwa vasikali vovo voosi nende vandu vuli navo voosi.”

¹⁰Inzi Mwami Nyasaye mbolelanga Mwami Gogi, “Lwa litukhu lienelo liliitsa khutukha, uliitsa khuva ninganakani indamanu, nu khuloshitsa khukhola vindu vitamanu,

¹¹nuvoola: Niitsa khuseera shivala shivula lisisi, shivala shia vandu vamenyamu mu milembe. Vandu vamenyamu voosi vali mu vulindi vulahi, khali vamenyanga mu shivala masisi, vilivwa nende milondi.

¹²Niitsa khuvukula miandu chiavo nu khuyaaya shia shindu shiosi shia vandu vamenyanga mu mataala kali ni kapomolanyinywa. Vandu venavo vavunjelitswa khurula mu vandu vi tsimbia tsindi; khali vali ni miruku nende miandu; khandi vali ninganakani ndi shivala shiosi ni shiavo.

¹³Navutswa vandu va mataala ka Sheba nende Dedani halala na vandu vakholanga vukhala va Tarishishi valiitsa khureeva, ‘Nivi viina uliitsa khwitsa khunuula vandu ifetsa nende itsahabu yavo? Nivi viina uliitsa khwitsa khukhooma tsing'ombe tsiavo, nu khuvukula miandu chiavo, khali khuvakhola vamanani?’

¹⁴“Khulwa yako, yivi mwana wu mundu, rulitsa vuprofeti khandi uvoolele Mwami Gogi ndi inzi Mwami Nyasaye mbolanga, ‘Lwa shivala shianje shia Israeli shimenyanga mu vulindi vulahi, nalwo lwa uliitsa khuraanga luchendo lwolwo.

¹⁵Uliitsa khurula havundu hoho ha wumenyanga, khuraanjila ihale wene khurula ihale wene khuluveka luli ivuluka halala na vasikali vovo vi tsifarasi nende vasikali vi tsingulu.

¹⁶Uliitsa khukwana Vaisraeli, khuli malesi kakhunikhanga shivala. Mumatukhu kenako, niitsa khukhuruma khuseera shivala shianje, khu vandu vi tsimbia tsindi valimanya ndi ninzi wakhuruma yivi Gogi, khukhumanyinya vutakatifu vwanje.’

¹⁷“Inzi Mwami Nyasaye mbolanga ndi, nivi wachila nimbolela varumishi vaanje, nivali vaprofeti va Israeli mumatukhu kakhale makhuva koko. Vaprofeta mumatukhu kakhale ndi niitsa khuchila wakwana Vaisraeli.”

¹⁸Mwami Nyasaye avoolanga, “Khulitukhu liu Mwami Gogi aliitsa khuseera shivala shia Israeli, nalwo lwa niitsa khumanyinya vululu vwanje.

¹⁹Mbolanga havulavu khuvirila mu vurima vwanje vululu ndi, shivala shiliitsa khutechela vutamanu muno mu shivala shia Israeli mumatukhu kenako.

²⁰Shia shindu shiosi shili mwoyo -- tsisutsi tsiosi, manyonyi, tsinyama nende vandu, viliitsa khutechela nu khurishitswa lwa niitsa khulolekha. Vikulu viliitsa khusiuvwa; machina kaliitsa khuvunzukhana; masisi kaliitsa khuyongovela hasi.

²¹Niitsa khuchila matiinyu koosi kalikwila Mwami Gogi. Inzi Mwami Nyasaye mali khuvoola. Vasikali veve valiitsa khukwana vene khuvene ni vivavi viavo.

²²Niitsa khusalilitsa Mwami Gogi khuvirila khu lukhutsu lutamanu muno khandi shiraano. Niitsa khukhuvitsa imbula inyishi, imbula ya machina nende mulilu kwa salufa khu mikaanda chiochio chia vasikali, halala na vandu vi tsimbia tsindi tsiosi vali nivi.

²³Nindio niitsa khumanyinya tsingulu tsianje nende vutakatifu vwanje munjila yeneyo; nilimanyikhana khu vandu vi tsimbia tsindi tsiosi khulilova. Nalwo lwa valiitsa khumanya ndi ninzi Mwami Nyasaye!”