Read tsotso EZEKIELI 41 Bible Online

EZEKIELI 41 - tsotso bible

EZEKIELI 41

¹Nalwo lwa yambila mu inzu yu mukari, Havundu Hatakatifu. Yapima injila yu khwinjililamu. Yali nu vuraambi tsimita 3 khutsia hasi mukari mwene

²khandi nu vukalamu tsimita 5, nende masisi tsimita 2.5 mu vulitoho. Yapima inzu yeneyo yonyene. Yali nu vuraambi tsimita 20 nende vukalamu tsimita 10.

³Yasimukha natsia khwinjila mukari mwa Havundu Hatakatifu. Yapima tsirulu tsili mu vwinjililu nanyola vulitoho vwatsio ni tsimita 3.5. Vwinjililu vwali nu vukalamu imita 1. Vwiyangu vwenovo vwali ni lisisi livambalalu tsimita 3.5.

⁴Yapima inzu yeneyo, nayo yali nu vuraambi mu tsimbeka nitsiva nu vukalamu tsimita 10. Inzu yeneyo yali yayumbakhwa imbeli wu lwanyi lwa hakari. Nalwo lwa yambolela, “Hanu naho Havundu Hatakatifu Hene.”

⁵Mundu mwenoyo yapima lisisi liu mumbakho kwi Litempeli. Liali ni tsimita 3. Khwali ni miumbakho mitititi chiavotokhananga khundulu khwi Litempeli lienelo, nu vukalamu tsimita 2.

⁶Miumbakho mitititi chienecho chiali mu miumbakho chi tsikolofa tsivaka. Shia ikolofa yali ni miumbakho makhomi kavaka. Lisisi lilwanyi lwi Litempeli lienelo liali lianyeleha khuvira lia hasi, khu miumbakho chienecho chive ni tsingulu khuvira lisisi li Litempeli.

⁷Miumbakho chiu khundulu chiali nu vuraambi vulala khuraanjila hasi khutsia ikulu. Miumbakho chi ilwanyi wi Litempeli liu Mwami Nyasaye, ilwanyi wi miumbakho chienecho, khwaliyo ni tsingasi tsivili, tsia khonyananga khutsia vwangu ikulu mu ikolofa ya hasi nurulilanga mu ikolofa ili ikulu.

⁸Namanya ndi Litempeli liali liayumbakhwa havundu halekhana vulahi, nava havundu ha tsikolofa tsine tsi Litempeli; vuraambi vu musinji kwi tsikolofa tsienetso

⁹Vulitoho vwi lisisi li ilwanyi wi tsinzu tsiu mukari vwali ni tsimita 2.5. Vwiyangu vwasasu mu shia inzu khu tsinzu tsiu mumbeka vu vwiyangu vu mukari nende Litempeli

¹⁰halala ni tsinzu tsia valindi tsiali nu vukalamu vwi tsimita 10, khuvotokhana Litempeli.

¹¹Khwali ni miliango khu tsinzu tsiu khundulu khuraanjila mu shikuri, mulala khuluveka luli ivuluka na kundi khuluveka luli ikuvanda. Navutswa misinji chiali ni chiahambanyinywa ni shikuri shienesho chiali nu vukalamu tsimita 2.5.

¹²Khundulu khwi shikuri shienesho, khuluveka luli imbo wi Litempeli, khwaliyo nu mumbakho kuli nu vuraambi vwi tsimita 45 nende vukalamu vwi tsimita 35. Masisi kene kali nu vulitoho vwi tsimita 2.5.

¹³Mundu mwenoyo yapima ilwanyi wi Litempeli. Lwali nu vuraambi vwi tsimita 50. Khuraanjila inyuma wi Litempeli liu Mwami Nyasaye khuvirila mu vwiyangu vwa havundu wu khuvirila, khutukha ha vumalishilanga, khuluveka luli imbo, vuraambi vwi tsimita 50.

¹⁴Vuraambi vuli imbeli wi Litempeli khuraanjila khuluveka yulu khutsia khutukha khu lundi numeeti khu vwiyangu vundi yovo, vwali ni tsimita 50.

¹⁵Nalwo lwa yapima vuraambi vu mumbakho kwali khuluveka luli imbo wu lwanyi inyuma wi Litempeli, khali khumeetakhu tsilwanyi tsiene; vwali nu vuraambi tsimita 50. Vwinjililu vwa Havundu Hatakatifu, nende Havundu Hatakatifu hene

¹⁶vwali vwalombwa khu misala khuraanjila hasi hene khutsia khutukha khu matirisha. Matirisha kenako kali kayikalwa.

¹⁷Mukari mwi Litempeli lienelo, kali nu vuraambi vukali muno khali khuvira miliango, mwali mwalombwa ni vindu

¹⁸viasasanga khuli vilombe vi tsimbaha nende misala chia mashindu. Musala kwa mashindu kwali hakari ha shia shilombe shi tsimbaha. Shia shilombe shi tsimbaha shiali ni tsimbeka tsivili;

¹⁹luveka lulala lwasasanga mumoni mu mundu khuluveka lu musala kwa mashindu; luveka lundi lwasasanga isimba indititi khuluveka lu musala kwa mashindu khuluveka lundi yolo. Tsiosi tsiali tsialombwa vulahi khuvotokhana Litempeli;

²⁰khuraanjila hasi khutsia khutukha khwikulu khwa masisi, khwaliyo ni vilombe vili ni tsimbaha, khandi vindu viasasanga misala chia mashindu khu masisi.

²¹Vwinjililu vwa Havundu Hatakatifu, hali hakholwa tsimbeka tsindekhanu tsine, khali vwinjililu vwa Havundu Hatakatifu Hene hali malala mele.

²²Khwaliho nu vwaali vwalombwa khu musala. Vwali nu vuraambi khutsia khwikulu imita 1.5 nende vukalamu imita 1.

²³Havundu Hatakatifu nende Havundu Hatakatifu Hene, hali ni miliango chivili nichiahaambana,

²⁴shia muliango kwali ni miliango chivili chinuyanuyanga.

²⁵Miliango chiu khwinjila Havundu Hatakatifu Hene, chiali chiasiaywa ni vindu vialombwa khuli vilombe vi tsimbaha nende misala chia mashindu khuli masisi kali nikalombwa. Shindu shiali shia khunikhwa mukari havundu wu khwinjilila mu Litempeli.

²⁶Khwali na matirisha mati khu shia luveka lwi inzu yeneyo nende masisi; khandi masisi kali kasiaywa ni vindu khuli misala chia mashindu.