Read tsotso EZEKIELI 43 Bible Online

EZEKIELI 43 - tsotso bible

EZEKIELI 43

¹Matukhu mati nikakhavira, mundu mwenoyo yambukula nambila mu shilivwa khuluveka luli ivukwi.

²Nalola vukhumi vu Mwami Nyasaye wa Israeli nuvurulanga khuluveka luli ivukwi. Mwoyo kwekwe kwahulilikhana khuli lihilikana li michelelo chia matsi lwa yali niyitsanga, khandi lilova liang'ang'anga vukhumi vwevwe.

³Malolo kenako kali vutswa khuli malolo, ka nali ninalola mumatukhu ka Nyasaye yitsa nativitsa litaala likali lia Yerusalemi. Khali kalolekhanga khuli malolo, ka nalola ha Muchela kwa Kebara, ningwa hasi mahunama.

⁴Vukhumi vu Mwami Nyasaye vwinjila mu Litempeli liu Mwami Nyasaye khuvirila mu shilivwa khuluveka luli ivukwi.

⁵Nalwo lwa Roho wa Nyasaye yanjinguula, nambila mu lwanyi hakari; khali nindola vukhumi vu Mwami Nyasaye nu vwitsule mu Litempeli liu Mwami Nyasaye.

⁶Lwa mundu mwenoyo yali nasinjile himbi ninzi, nahulila khuli mundu alomolomanga ninzi khurula mu Litempeli.

⁷Yambolela, “Yivi mwana wu mundu, yishi ni shisoko shianje shiu vwami, khandi ni havundu hanje haseenanga, ha niitsa khumenya mu Vaisraeli mihika ni mihika. Khali Vaisraeli valiitsa khulekha khwononyinya lira lianje khali hati hene, vave vo vene inoho vami vavo, khuvirila khu vuheeyi inoho khutiila khu mivili chia vandu vakhutsa.

⁸Vavikha misambwa chiavo himbi khu chianje, nikhali khwali ni lisisi hakari havo nende inzi. Vononyinya lira lianje litakatifu khuvirila khu vutamanu khuli vwenovo. Khulwa yako, ninzi wavasalilitsa khuvirila mu vurima vwanje.

⁹Leshi varulitsiho misambwa chiavo nende machina matakatifu, ka vali nivasimiikha khwenya khuha vami vavo luyali; khali nilimenya navo mihika ni mihika.

¹⁰“Yivi mwana wu mundu, voolela Vaisraeli makhuva koosi khulondokhana khu Litempeli lia mali khukhumanyinya, khu vanyole tsisoni shichila vwoni vwavo. Vavoolele shia shindu shiosi khulondokhana khuli lisasanga khandi khuli liumbakhwa.

¹¹Niiva valiitsa khuva ni tsisoni shichila vwoni vwa vakhola vwosi, khutukha uvoolele shia shindu shiosi khulondokhana khu Litempeli lienelo, miliango chiu khwinjilamu nu khurula ilwanyi, khuli liumbakhwa lisase, khuli shia shindu shiosi shiarecheshitswa, mechitso nende malako khulondokhana khulio. Khutukha uvahandichile shia shindu shiosi khu valole shia shindu shiarecheshitswa nikanyalikha vitsushitsi nu khukhola vindu vienevo.

¹²Yili ni lilako khulondokhana khu Litempeli liu Mwami Nyasaye. Luveka lwosi luvotokhananga Litempeli liu Mwami Nyasaye ikulu wi shikulu luliitsa khuva lutakatifu lwene.”

¹³Vipimu viu vwaali, viliitsa khuva shipimu shilala shiene khu vipimu vi Litempeli. Muferechi kuli ni tsisentimita 50 nende tsisentimita 50 mu vukalamu, halala nu vuraambi vwi tsisentimita 25 khutsia mukari kuliitsa khuvotokhana musinji ku vwaali vwenovo.

¹⁴Luveka lu vwaali vwenovo, lwa nuluve hasi hene muno khuraanjila ikulu wu musinji luliitsa khuva nu vuraambi imita 1. Luveka lulondakhu luliitsa khuvikhwa inyuma, khuraanjila khundulu khwene tsisentimita 50 khuluvotokhana, nu vuraambi khutsia mukari tsimita 2. Luveka lulondakhu lulavikhwa inyuma khundulu tsisentimita 50 khuluvotokhana.

¹⁵Ikulu wu vwaali vwenovo, vwa varumishila khusambilakhu vihanwa viu musango, vulava nu vuraambi tsimita 2 mu shia luveka. Mumbakho ku mumbeka ku luveka lwenolo lulichingukha khuvira tsimbeka tsindi.

¹⁶Ikulu wu vwaali vwenovo vwali vuraambi tsimita 6 mu shia luveka.

¹⁷Luveka luli hakari, luliitsa khuva nu vuraambi tsisentimita 7 mu shia luveka; nalwo luliitsa khuva nu lwika khundulu khwalwo nu vuraambi vwi tsisentimita 25. Khuliitsa khuvaho nu muferechi kwi tsisentimita 50. Viiko viu khuninilakhu khutsia khu vwaali vulava khuluveka luli ivukwi.

¹⁸Mwami Nyasaye yambolela, “Yivi mwana wu mundu! Inzi Mwami Nyasaye mbolanga: Ulonde mechitso khulondokhana khu vwaali. Lwa vwaali vuliitsa khumbakhwa, uliitsa khuvukhola khuva vutakatifu lwa uliitsa khusamba shihanwa shiu musango khuvwo, nu khumitsa masahi ki miruku chiahaanwa khuli vihanwa.

¹⁹Vandu vuluhia lwa Levi varulanga mu vandu vu lwivulu lwa Zadoko visuundanga himbi khwinzi khundumishila; navo va uliitsa khuha shihunwa khuli shihanwa shiu khurulitsaho vwoni. Inzi Mwami Nyasaye mali khuvoola.

²⁰Uliitsa khuvukula masahi kashio, ukaveshe khu tsimbeka tsine tsiu vwaali, khu tsimbeka tsia hakari wu vwaali, khali khundulu khu vwaali khwosi. Nindio khandi uliitsa khutakasa vwaali nu khuvukhola khuva vutakatifu.

²¹Uliitsa khuvukula khandi shihunwa shiu khukholela musango kwi shihanwa shiu khurulitsaho vwoni. Nashio shiuliitsa khusambila havundu harovolwa ilwanyi wi Litempeli liu Mwami Nyasaye, ihale wene khurula Havundu Hatakatifu.

²²Khulitukhu lia khavili, uliitsa khukhola musango kwi imbuli isatsa, vuchila imbala yosi khuli shihanwa shiu khurulitsaho vwoni; khandi vwaali vuliitsa khunihitswa, khuli vwanihitswa na masahi ki shihunwa.

²³Numali khuvunihitsa, uliitsa khuhaana shihunwa vuchila imbala yosi nende limiiko khurula mu shiayo, vuchila imbala yosi khuli shihanwa shienyu.

²⁴Uliitsa khuha Mwami Nyasaye miruku chienecho. Vasalisi valiitsa khumitsa khuchio ichumbi nu khuchihaana khuli shihanwa shiu khusambwa khu Mwami Nyasaye.

²⁵Uliitsa khuhaana khumatukhu saba imbuli nende ichilishi shia khulitukhu khuli shihanwa shiu khurulitsaho vwoni. Uliitsa khuhaana khandi limiiko khurula mu shiayo vuchila imbala yosi.

²⁶Vasalisi valiitsa khutakasa vwaali, nu khuvwirecheshitsa khurumikha khumatukhu saba.

²⁷Nivamali matukhu saba kenako, khulitukhu lia munane, vasalisi valiitsa khukhola khuvwo musango kwi shihanwa shiu khusambwa nende shiu khulera milembe. Niitsa khuvihuchilila. Inzi Mwami Nyasaye mali khuvoola.”