Read tsotso EZEKIELI 7 Bible Online

EZEKIELI 7 - tsotso bible

EZEKIELI 7

¹Mwami Nyasaye yambolela,

²“Yivi mwana wu mundu, voolela Vaisraeli ndi Shiheeli shimali khutukha! Shiheeli shimali khutushila tsimbeka tsine tsiosi khulilova!

³Shiheeli shimali khumukwila nunundi; niitsa khumusalilitsa khuvirila mu vululu vu vurima vwanje. Niitsa khumukhalachila khulondokhana khu vikholwa vienyu, niitsa khumusalilitsa shichila miima chienyu chi shifwavi.

⁴Shinyala khumuheenzakhu vutswa inoho khumuvela tsimbavasi tawe. Niitsa khumusalilitsa shichila vikholwa via mukholanga, khandi shichila shifwavi shia mutsilililanga khukhola. Nalwo lwa muliitsa khumanya ndi ninzi Mwami Nyasaye.”

⁵Mwami Nyasaye avoolanga: Matiinyu kaliitsa khutsililila khumukwila vuchila khusinjila. Lolikhu khuli karoonjele khumukwila!

⁶Shiheeli shimali khutukha, toto, shiheeli shimali khutukha. Shimali khumutushila; lolikhu khuli shimutushili!

⁷Munyi vandu vi shivala shinu, matiinyu kamali khumukwila! Inyinga imali khutukha; ni kilikali, litukhu lili himbi khutukha. Nalio litukhu lia muliitsa khunyakhana muno shililiitsa khuva liu khulaanjilila liyooko liu vuyaanzi mu vikulu tawe.

⁸Niitsa khumusalilitsa vwangu yuvu khuvurila mu vululu vu vurima vwanje; niitsa khumukhalachila khulondokhana khu vikholwa vienyu. Niitsa khumusalilitsa shichila shifwavi shienyu shia mukholanga shiosi.

⁹Mbulakhu khuli niitsa khumuheenzakhu vutswa inoho khumuvela tsimbavasi. Niitsa khumusalilitsa shichila vikholwa vienyu via mukholanga, khandi shichila shifwavi shiamenya mu munyi. Nalwo lwa muliitsa khumanya ndi ninzi Mwami Nyasaye uchilanga numutivitswa.

¹⁰“Lolikhu, litukhu lienelo litsanga! Mutsitsangwa khutivitswa. Vutamanu vukholekhanga shia havundu hosi; vwiloli vwashila muno shia havundu hosi.

¹¹Vutamanu vutamanili likali; Mundu avulakhuho uliitsa khwihonolokha, khali vukhumi vwavo, inoho miandu; viliitsa khuvula khuheelwa luyali.

¹²Inyanga imali khutukha, litukhu lili himbi khutukha; leshi mukuuli wi vindu avuli khwikhoya, mukuulitsi avuli khwikhula, shichila niitsa khutivitsa vandu voosi.

¹³Vakuulitsi valiitsa khuvula khureeva khukalushitsilwa via vakuulitsa mumatukhu ka valiitsa khuva nivashili mwoyo; shichila matiinyu yaka kaliitsa khukwila vandu voosi nu khuvula khukalukhanyinywa. Mundu avulakhuho uliitsa khwihonolokha shichila vutamanu vwavo.

¹⁴Shisiliva shimali khukhuvwa, khali shia mundu wosi umali khwirecheshitsa shia shindu; navutswa mundu avulakhuho utsitsanga muliihe, shichila shia mundu wosi aliitsa khusalilitswa.

¹⁵Liihe liaraanjila ilwanyi, vulwale nende inzala viaraanjila mu tsinzu tsieru tsia khumenyamu; Yavo vali mu milimi viirwangwa ni shivavi; inzala nende vulwale vimalanga yavo vali mu litaala likali;

¹⁶Niiva mundu anyala khwilukha, aliitsa khunyoleshela mu vikulu khuli vituti vimenyanga mu tsihoongo, voosi nivikhulanga shichila vwoni vwavo vwa vakhola.

¹⁷Shia mulala khuvo aliitsa khuva muteteshele, nu khuraanga khuteteshela.

¹⁸Valiitsa khwifwala tsinguvu tsia makunia, valiitsa khutechela nivaria muno. Tsisoni tsiliitsa khuvalia, valiitsa khuvekwa viole khu mirwi chiavo.

¹⁹Valiitsa khusiuva ifetsa yavo mu tsinjila tsi litaala, khandi itsahabu yavo iliitsa khukwa khuli shindu shioneshe; ifetsa nende itsahabu yavo viliitsa khuvula khuvahonyinya khu vurima vwanje inzi Mwami Nyasaye; shivaliitsa khuchirumishila khunyola viosi via vikombanga inoho shiukhulia shiosi shia venyanga tawe; shichila itsahabu nende ifetsa nayo yavisikaritsa ni vakwa mu vwoni.

²⁰Vilombela vifwanani viavo vi shifwavi, vindu vili nu vukhumi vwi shikhaya, khurula khu machina kavo malahi ku vukuuli vululu muno; nashio shivune shichilanga nikhola vindu vienelo khuva vitamanu khu munyi.

²¹Niitsa khukhola vandu vi tsimbia tsindi khumunuula vindu vienyu, khandi vandu vatamanu mu shivala shinu valiitsa khumuyaaya vindu vienevo; valiitsa khwononyinya vindu vienevo.

²²Niitsa khulekha khuvakhonya, khu vononyinyi havundu hanje wu vukuuli vululu; vanuuli valiitsa khwinjilaho nu khwononyinyaho,

²³nu khutivitsa havundu henaho. Lwa shisahi shiliitsa khusuundulwa mu shivala, khandi vutamanu vuve vwayitsulamu.

²⁴Niitsa khulomba vandu vi tsimbia tsindamu tsiene khwitsa khumenya mu tsinzu tsiavo. Niitsa khutivitsa tsingulu tsiavo tsiu khwilola; khali Havundu Hatakatifu havo haliitsa khwononyinywa.

²⁵Lwa valiitsa khunyakhana vululu muno, nalwo lwa valiitsa khwenya milembe, navutswa valiitsa khuvula khuchinyola.

²⁶Matiinyu kaliitsa khulondekhana, makhuva matamanu kaliitsa khulondekhana; valiitsa khwenyelitsa malolo khurula khu muprofeti; navutswa vasalisi vavo valiitsa khukorwa mivaalo ku khuvaha valonde, khali vasakhulu valiitsa khuvula shia veechitsa.

²⁷Mwami wi shivala aliitsa khwikhula, khali mwimilili aliitsa khuheenda mwoyo khandi vandu vene shivala valiraanga khutechela. Niitsa khuvakhola likhuva khulondokhana khu vikholwa viavo; niitsa khuvakhalachila khu ka vakholanga vene. Nalwo lwa valiitsa khumanya ndi ninzi Mwami Nyasaye.”