Read tsotso EZEKIELI 8 Bible Online

EZEKIELI 8 - tsotso bible

EZEKIELI 8

¹Khulitukhu lia kharanu, liu mweli kwa sita, khumuhika kwa sita, nikhala mu inzu yanje, halala na vasakhulu va Yuda. Nindimu, nanyola tsingulu tsiu Mwami Nyasaye.

²Naheenza, nindola shindu shiasasanga khuli nu mundu. Hasi hi shisiindi shi shindu shienesho, khwali ni shindu shiakhanga khuli mulilu, khandi ikulu wi shisiindi shienesho hang'ang'anga khuli mukasa kwavekhwa ilaanji indavu.

³Shindu shienesho shianyiila shindu shiasasanga khuli nu mukhono, manangumila liswi lianje; Roho yanjinguula ikulu, manambila Yerusalemi khuvirila mu malolo ka Nyasaye kenako; yambila hakari hene mu vwinjililu khuluveka luli ivuluka wi Litempeli, havundu ha musambwa kwachilanga Nyasaye nashendekha kwavetsanga.

⁴Vukhumi vwa Nyasaye wa Israeli vwaliho; vwalolekhanga khuli ni malolo, ka nali nindolikhu himbi ha Muchela kwa Kebara.

⁵Nalwo lwa Nyasaye yambolela, “Yivi mwana wu mundu, chinguula tsimoni tsiotsio ma uheenze khuluveka luli ivuluka.” Naheenza khuluveka luli ivuluka; nalolayo musambwa kwachilanga Nyasaye nashendekha himbi ha vwaali vuli mu vwinjililu khuluveka luli ivuluka.

⁶Nyasaye yambolela, “Yivi mwana wu mundu, ulolikhu shia vakholanga, shifwavi shiu khuhuka shia Vaisraeli vakholanga, khukhunga inzi khurula Havundu Hatakatifu hanje? Navutswa muliitsa khutsililila khulola shifwavi shindi shikali muno.”

⁷Nalwo lwa yandera mu vwinjililu vu mu lwanyi; khandi lwa naheenza, nalola induhu mu lisisi.

⁸Nalwo lwa yambolela, “Yivi mwana wu mundu, likulula mu lisisi yili.” Lwa nalikulula mu lisisi, nalwo lwa nalola muliango.

⁹Yambolela, “Yinjila mukari mwene ulole shifwavi shitamanu shia vakholelamu.”

¹⁰Ninjilamu manimbenza; nalolayo shia shindu shiosi shimolanga hasi, halala nende tsinyama tsiumbulimu tsiu khurishitsa; khali misambwa chiosi chia Vaisraeli chialiyo.

¹¹Vimilili makhomi saba vali imbeli wi misambwa chienecho; Yazania mwana wa Shafani yali navo. Shia mulala khuvo yali nakumile luchio lwelwe mu mukhono; mwooshi kwatuumanga ikulu khurula khu luchio lwa shia mundu.

¹²Nyasaye yandeva, “Yivi mwana wu mundu, ulolikhu ka vimilili va Vaisraeli vakholelanga mu vwivisi, shia mulala havundu hi misambwa chitsula? Vavoolanga, ‘Mwami Nyasaye shia khulolanga tawe! Mwami Nyasaye wayivilila shivala.’ ”

¹³Nalwo lwa Mwami Nyasaye yambolela, “Khali utsitsanga khulola vindu vi shifwavi via vakholanga vinyishi khuvira vienevo.”

¹⁴Nalwo lwa yambukula nambila mu vwinjililu vwi shilivwa khuluveka luli ivuluka wi Litempeli. Naho ha nalola vandu vakhali nivalilanga tsikhwili, shichila nyasaye ulaangwangwa Tamuzi yali umali khukhutsa.

¹⁵Nalwo lwa Nyasaye yambolela, “Yivi mwana wu mundu, unyala khuva ulolikhu kenako? Uliitsa khulola vindu vi shifwavi vikholekhanga vinyishi khuvira vienevo.”

¹⁶Yambukula nambila hakari hene mu lwanyi lwi Litempeli. Naho ha nalola vasatsa makhomi kavili na varanu nivaheenzitsi mikoongo chiavo khu Litempeli, nivaheenzi khuluveka luli ivukwi, nivooranga mbasu khuluveka luli ivukwi hakari wu lwanyi nende vwaali.

¹⁷Nalwo lwa yambolela, “Yivi mwana wu mundu, unyala khuva ulolikhu kenako? Linyala kuva likhuva liaangu khu vandu va Yuda khukhola shifwavi shiosi, shia yivi mwene uloli nivakholanga hanu nu khukholela vandu vindu viu khuvasalilitsa? Nu vulahi nivatsililile khukhola vutamanu, khali vachilanga nimbukula vurima? Loli, vasiinyi muno!

¹⁸Niitsa khuvasalilitsa vululu muno khuvirila mu vurima vwanje. Niitsa khuvula khuheenzakhu vutswa, inoho khuvavela tsimbavasi. Khali niiva valiitsa khusaala nivalaanjilila nu mwoyo mukali nivenya khukhonywa, niitsa khulekha khuvahulishitsakhu.”