Read tsotso DANIELI 3 Bible Online

DANIELI 3 - tsotso bible

DANIELI 3

¹Mwami Nebukadineza yalomba shifwanani khu itsahabu. Shifwanani shienesho shiali nu vuraambi tsimita 27 nende vukalamu tsimita 3. Yarenjekha shifwanani shienesho mu lwomera lwa havundu halaangwangwa Dura, mu lusomo lwa Babilonia.

²Nalwo Mwami Nebukadineza yaruma likhuva khu vimilili va vandu, vasinjilili, vagavana, vandu vakhonyanga vandi inganakani, vasinjilili va mavishilu, vakhalachi vaheenzeshitsanga katoto, vakhalachi vi shiina nende vimilili vandi voosi vi tsisomo khwitsa mu shikhaalo khutakasa shifwanani shia yali niyalomba.

³Nalwo lwa vimilili va vandu, vasinjilili, vimilili vi tsisomo, vandu vakhonyanga vandi inganakani, vasinjilili va mavishilu, vakhalachi nende vimilili vi tsisomo tsiosi vivunjelitsa khulu khutakasa shimanyilu, shiu Mwami Nebukadineza yali niyakhola. Lwa vasinjila imbeli wi shimanyilu shiu Mwami Nebukadineza yali niyalomba,

⁴mundu ulaanjililanga yalaanjilila nu mwoyo mukali, navoola, “Munyi vandu vi tsimbia tsindi tsiosi, nende tsinomolomo tsiosi, muhulishitsi lilako liu Mwami Nebukadineza!

⁵Lwa muhulila lwika nulukhuvwangwa, indulelo, vukhana nende vindu vindi viu khwimbila tsinyimbo, muliitsa khwinama hasi nu khusaala khu shifwanani shialombwa khu itsahabu shiu Mwami Nebukadineza yalomba.

⁶Mundu uliitsa khwambakhana khwinama nu khusaala khu shifwanani shienesho, aliitsa khusiuvwa vwangu mu lijiko liu mulilu.”

⁷Khulwa yako, lwa vandu vahulila lwika, indulelo, vukhana nende vindu vindi viu khwimbila tsinyimbo, nivikhuvwangwa nende tsinyimbo tsiu vukhana ni tsimbwangwa, vandu vi tsimbia tsiosi vinama nivasaala khu shifwanani shialombwa khu itsahabu shiu Mwami Nebukadineza yali niyalomba.

⁸Mumatukhu kenako, valala khu Vababilonia valolekha nivalomoloma vindu vitamanu khulondokhana khu Vayahudi.

⁹Vavoolela Mwami Nebukadineza, “Yivi mwami uhindile!

¹⁰Yivi mwami, umali khuhaana lilako ndi shia mundu wosi nahulila lwika, indulelo, vukhana nende vindu vindi viu khwimbila tsinyimbo nende tsinyimbo tsiu vukhaana ni tsimbwangwa, alinama khandi asaale khu shifwanani shialombwa khu itsahabu.

¹¹Malako kenako kavoolanga ndi vandu vambakhana khukalonda valasiuvwa mu mulilu mululu kwi lijiko kwenoko.

¹²Khuliho na Vayahudi valala va urovole khusinjilila vindu vikholekhanga mu lusomo lwa Babilonia; navo ni Shadaraka, Meshaka nende Abedinego. Yivi mwami, vandu yava valechelitsi malako koko. Khali vambakhane khurumishila vanyasaye vovo, inoho khusaala khu shifwanani shia walomba khu itsahabu.”

¹³Nalwo lwa Nebukadineza yali nu vurima vululu; khandi nahaana lilako ndi Shadaraka, Meshaka, nende Abedinego vinjilitswimu. Valera vandu venavo imbeli wu Mwami Nebukadineza.

¹⁴Nebukadineza yavavoolela, “Munyi Shadaraka, Meshaka, nende Abedinego, kanyala khuva toto ndi mwa yambakhana khurumishila vanyasaye vaanje, inoho khusaala khu shifwanani shia nalomba khu itsahabu?

¹⁵Khulwa yako, lwa muhulila lwika, indulelo, vukhana, vilili nende vindu vindi viu khwimbila tsinyimbo, muliitsa khusaala khu shifwanani shia nalomba khu itsahabu, shilolekhanga shilahi muno.”

¹⁶Shadaraka, Meshaka nende Abedinego vachipa Mwami Nebukadineza, “Yivi mwami, khuvulakhu khuli khunyala khwishinga mulilomoloma khulondokhana khu makhuva yaka.

¹⁷Niiva Nyasaye wa khurumishilanga anyala khukhuhonyinya mu lijiko liu mulilu, khandi khurula khu yivi, nu vulahi nakhuhonyinyi.

¹⁸Mwami Nebukadineza, navutswa niiva shikali kario tawe, khutukha umanye ndi khulalekha khurumishila vanyasaye vovo, inoho khusaala khu shifwanani shia walomba khu itsahabu.”

¹⁹Nalwo lwa Nebukadineza yali nu vurima shichila Shadaraka, Meshaka nende Abedinego, nakalukhana likondo lielie; yahaana lilako tsikhuyi tsivikhwi mu lijiko liu mulilu hali saba khuvira shichelo.

²⁰Khu, yahaana lilako khu vandu valala vi tsingulu mu valindi mu vasikali veve vavohe Shadaraka, Meshaka, nende Abedinego nu khuvasiuva mu lijiko liu mulilu mululu.

²¹Nalwo lwa vandu venavo vavohwa, nivashifwali tsikaanzu tsiavo, tsikofia tsiavo nende tsinguvu tsindi; vasiuvwa mu lijiko liu mulilu mululu muno.

²²Lwa Mwami Nebukadineza yali nahaani lilako mulilu kwi lijiko kuve mululu muno, tsimemo tsiu mulilu tsiasila nitsiira vandu vali nivachinga vandu vavaka venavo, khali nivashili khuvasiuva mu mulilu kwenoko.

²³Navutswa vandu vavaka venavo, Shadaraka, Meshaka, nende Abedinego vakwa hasi, nivavoheelwi khandi nivasiuvwa mu lijiko liu mulilu mululu.

²⁴Nalwo lwa Mwami Nebukadineza yachenya, nasinjila vwangu. Yavoolela vandu vamukhonyanga inganakani, “Shivavele vandu vavaka vavoheelwi, nivasiuvwa mu mulilu?” Vachipa, “Yivi mwami, ni katoto.”

²⁵Yavachipa, “Navutswa ndoli vandu vane vavohololwi, nivachendanga mu mulilu hakari; khali shiukuvasalilitsanga tawe. Mundu wa khane alolekhanga khuli ni nyasaye.”

²⁶Nebukadineza yisuunda himbi khu muliango kwi inzu yi lijiko liu mulilu mululu liavetsamu nalaanga, “Munyi varumishi va Nyasaye Uli Ikulu khu Viosi, nivali Shadaraka, Meshaka nende Abedinego hambi ilwanyi!” Nalwo lwa Shadaraka, Meshaka nende Abedinego varula mu mulilu.

²⁷Vimilili va vandu, vagavana, vasinjilili nende vakhonyani vi inganakani vu Mwami Nebukadineza vivunjelitsa halala, khandi nivalola ndi mulilu kuvulakhu tsingulu tsiosi tsiu khusamba vandu venavo; khali liswi liavo khu mirwi livulakhuho lialaalitswa, mundu avulakhuho wasalilakhu shichila mulilu, inoho khali miuya chiu mulilu chivulakhuho chiahulilikhana khurula khuvo.

²⁸Nebukadineza yavoola, “Nzitsominyanga Nyasaye wa Shadaraka, Meshaka nende Abedinego umali khuruma injelosi yeye khuhonyinya varumishi veve, vali ni lisuuvilitsa muye!

²⁹Khulwa yako, mbananga lilako ndi shia luhia lwosi lwa vandu, inoho vandu valinyekakhu Nyasaye wa Shadaraka, Meshaka, nende Abedinego, valiavulanyinywamu mu vitonye, khandi tsinzu tsiavo tsilisambulanyinywa; shichila nyasaye wundi avulakhuho uli nu vunyali vu khuhonyinya munjila khuli yeneyo.”

³⁰Nalwo lwa Mwami Nebukadineza yaha Shadaraka, Meshaka nende Abedinego muhinzilu ku vunyali mu lusomo lwa Babilonia.