Read tsotso HOSEHA 1 Bible Online

HOSEHA 1 - tsotso bible

HOSEHA 1

¹Yili nalio likhuva liu Mwami Nyasaye yavoolela Hoseha mwana wa Beri, mumatukhu ka Uzia, Yotsamu, Ahazi nende Hezekia vali nivali vami va Yuda; khandi mumatukhu ka Yerobohamu mwana wa Yohashi yali nali Mwami wa Israeli.

²Lwa Mwami Nyasaye yalomoloma lukhuraanga khu Hoseha, yamuvoolela, “Simukha utsi khuhila mukhali wu kholanga vulaaya; khandi wivuli khuye vaana khuvirila munjila yu khukhola vulaaya khuli mama wavo; shichila vandu vi shivala shinu vakholanga vulaaya mu vunyishi, lwa vambakhananga khuva vasuuvilwa khwinzi.”

³Khulwa yako, Hoseha yasimukha natsia khuhila mwana wi shikhana walaangwangwa Gomeri, mwana wi shikhana wu mundu walaangwangwa Dibulahimu. Gomeri yaheelitsa niyivula khu Hoseha mwana wi shiyayi.

⁴Mwami Nyasaye yavoolela Hoseha, “Mukulikhi lira ‘Yezireli’, shichila hari hatititi, niitsa khusalilitsa Mwami wa Israeli, lwa mukuuka wewe Yehu yasuundula shisahi mu Luhoongo lwa Yezireli. Niitsa khutivitsa vwami vwi shivala shia Israeli.

⁵Khulitukhu lienelo, niitsa khutivitsa tsingulu tsia vasikali va Israeli vali natsio mu Luhoongo lwa Yezireli.”

⁶Gomeri yaheelitsa khandi, niyivula mwana wi shikhana. Nalwo lwa Mwami Nyasaye yavoolela Hoseha, “Mukulikhi lira ‘Wakhalolelwa tsimbavasi’ shichila shinzitsanga khutsililila khulolela Vaisraeli tsimbavasi inoho khuvasemehakhu khali hati hene tawe.

⁷Navutswa niitsa khulolela tsimbavasi vandu va Yuda, khandi nilivahonyinya khuvirila mu tsingulu tsianje, lwa ndi Mwami Nyasaye, uli Nyasaye wavo. Shikali niitsa khuvahonyinya ningwanila vura, shivavi, inoho liihe, inoho tsifarasi, inoho vandu vaninanga khu tsifarasi tawe.”

⁸Lwa Gomeri yaleshitsa “Wakhalolelwa tsimbavasi” khunuuna, yaheelitsa khandi, niyivula mwana wundi wi shiyayi.

⁹Khulwa yako, Mwami Nyasaye yavoolela Hoseha, “Mukulikhi lira ‘Shiumuli vandu vaanje tawe,’ shichila shiumuli vandu vaanje, ninzi shindi Nyasaye wenyu tawe.”

¹⁰Khali ndio, Vaisraeli valiitsa khwivulana mu vunyishi vave khuli muyeeshe khuluchinga lwi inyanza, kukhanyala khuvula khupimwa inoho khuvalitswa. Havundu ha vavoolelwa, “Shiumuli vandu vaanje tawe,” naho ha valiitsa khulaangwa, “Vandu va Nyasaye uli mwoyo.”

¹¹Khulwa yako, vandu va Yuda nende Vaisraeli valiitsa khuhambanyinywa halala, nu khurovola mwimilili wavo vene. Valiitsa khuva ni miandu minyishi mu shivala shienesho, shichila litukhu liu mundu wakulikhwa lira Yezireli liliitsa khuva li tsingulu tsinyishi.