Read tsotso HOSEHA 10 Bible Online

HOSEHA 10 - tsotso bible

HOSEHA 10

¹Vaisraeli vali khuli musala ku musabibu mulahi, musabibu kwamanga matunda. Lwa vanyola matunda mu vunyishi, nalwo lwa vumbakha vwaali mu vunyishi. Lwa shivala shiavo shianyola vuhinda mu vunyishi, nalwo lwa vasiaya machina ki misambwa nivasaala khuko.

²Vali nu mwoyo kwitsula vuvehi; khutukha vasalilitswi nunundi khurulana khu vutamanu vwavo. Mwami Nyasaye aliitsa khusambulanyinya vwaali vwavo, nu khupomolanyinya tsirilu tsiavo.

³Vandu yava valitsa khuvoola vwangu yuvu, “Khuvula mwami unyala khukhwamiha, shichila khwayambakhana khuha Mwami Nyasaye luyali. Ni shina shiu mwami anyala khukholela khutsi?”

⁴Ni vandu vu khwilomolomela vutswa, visuuhitsananga mu vuvehi nivakhola lilakano; khulwa yako, vandu vamenya nivayaalananga khuli mavaanze ku vutsiva kashila mu mulimi kwalimwa.

⁵Vandu vi litaala lia Samaria valiitsa khutechela shichila shihunwa shialombwa khu itsahabu mu litaala lia Betseli shimali khukora. Vo nende vasalisi vasaalanga khu musambwa kwenoko valiitsa khwikhula shichila kenako. Valiitsa khulila lwa shimali khunuulwa vukhumi vwashio.

⁶Musambwa kwenoko kuliitsa khuhilwa mu shivala shia Ashuria, khurungwa khuli vushuru khu Mwami wi tsingulu wa Ashuria. Vandu vuluhia lwa Efurahimu valiitsa khuheelwa tsisoni, Vaisraeli valiitsa khunyola tsisoni shichila musambwa kwavo.

⁷Mwami wa Samaria aliitsa khutivitswa, khuli shisala shielemanga ikulu khu matsi.

⁸Havundu ha vasaalilanga khu vutoonje vwi vikulu via Aveni, ha Vaisraeli vakholela vwoni haliitsa khutivitswa. Mavwa nende mavaanze viliitsa khumeela khu vwaali vuliyo. Vandu valiitsa khulila nivavoolela vikulu, “Khukhunikhi, ukhukwili.”

⁹Mwami Nyasaye avoolanga, “Munyi Vaisraeli, khuraanjila numushili Gibeha, mushikholanga vwoni; khandi mushitsilililanga khuvukhola. Ni kilikali, muliitsa khutivitswa muliihe numuli mu litaala lia Gibeha.

¹⁰Niitsa khukwana vandu vatamanu venavo nu khuvasalilitsa; vandu vi tsimbia tsindi tsiosi valiitsa khuvakhumbila, lwa vasalilitswa shichila vwoni vwavo vunyishi.

¹¹“Efurahimu yali khuli shimoli shiechitswa vulahi, nayaanzilila khwilula imu, khandi nimbula khumwachikha muchochi khu maveeka keke malahi; Navutswa niitsa khwachikha Efurahimu muchochi. Yuda aliitsa khulima mwene, ni kilikali, Yakobo aliitsa khuvusa nasung'usula.

¹²Navoola, ‘Munyi vene mulime milimi chindi, mwiraachile vukuutsa vwi likhola liu vulunji, nu khuchesa lichesa liu vuyaanzi vwatoto. Matukhu ku khukhava inzi Mwami Nyasaye kamali khutukha ku khwitsa nu khumuha tsikhaavi.’ ”

¹³Navutswa mwaraaka vukuutsa vuleranga vutamanu, mwanyola vutamanu khurulana khu kenako; mwalia vindu virulanga khu vuvehi vwenyu. “Lwa mwali ni lisuuvilitsa mu makaare kenyu kiliihe, mu vunyishi vwa vasikali venyu,

¹⁴liihe liliitsa khurulila mu munyi vene, ma tsimbinga tsienyu tsiosi tsilitivitswa. Kaliitsa khwikholekha khuli kikholekha lwa Mwami Shalimani yativitsa mu liihe litaala lia Betsi-arabeli; vamama nende vaana vavo nivatonywa mu vitonye.

¹⁵Munyi vandu vi litaala lia Betseli, nako kaliitsa khwikholekha khu munyi, shichila mwakhola vutamanu vunyishi. Lwa vuliitsa khuva nu vwakhashia mu mavwevwe, nalwo lwa Mwami wa Israeli aliitsa khutivitswa.”