Read tsotso HOSEHA 13 Bible Online

HOSEHA 13 - tsotso bible

HOSEHA 13

¹Lwa Vaefurahimu valomoloma, vandu vatechela; Vaefurahimu vali vaheelwa vukhumi shia havundu hosi mu Israeli. Navutswa vakwa mu vutamanu lwa vasaala khu musambwa kwa Baali, khandi nivakhutsa.

²Vaefurahimu vatsililila khukhola vwoni mu vunyishi; vilombelanga vene vifwanani khu vivia, misambwa chialombwa vulahi vwene khu ifetsa, nivili viosi vindu via mundu yalomba. Vandu vavoola, “Kholi misango khu yichi!” Vandu vatsunzunanga khu vifwanani visasanga vimoli.

³Khulwa yako, munyi voosi mulava khuli mwooshioshi kulolekhanga mu mavwevwe, inoho khuli liime likhamulukhanga vwangu inoho khuli ikhulio ya vushindu vurulilanga ha vilulilanga imu inoho khuli mwooshi kutuumanga nu kurulila mu litirisha.

⁴Mwami Nyasaye avoolanga, “Ninzi Mwami Nyasaye, uli Nyasaye wenyu, nindi woyo wamurulitsa mu shivala shia Misri; Nyasaye wundi avulakhuho wa mwamanya nikakhali inzi. Muhonyinyi wundi avulakhuho unyala khuvira khwinzi.

⁵Ninzi wamulinda numuli mu shiangalangwi, mu shivala shiumakanu.

⁶Navutswa lwa valia, nalwo lwa vikura, vikura nivaraanga khwilola, khutukha lwa vanzivilila.

⁷Khulwa yako, niitsa khumukwila khuli isimba, niitsa khumukonekha khu injila khuli ingoi.

⁸Niitsa khumukwana khuli likunyuli limali khunuulwa vaana; niitsa khumwavulanyinya muviliru vienyu; nu khumumalilayo khuli isimba, khuli inyama yumbulimu yavulanyinya shindu.

⁹“Munyi Vaisraeli, niitsa khumutivitsa; ni viina wanave ni tsingulu tsiu khumukhonya?

¹⁰Ni hena ha mwami wenyu ali nunundi khumuhonyinya? Ni hena ha vamihi venyu voosi vali, nikanyalikha vamulinde? Navo vachila numuvoola, ‘Khuhi mwami nende vimilili vanyala khukhwamiha.’

¹¹Ninzi wamuha vami mu vurima vwanje, khandi ninzi wavarulitsaho mu vululu vwanje.

¹²“Vutamanu vwa Efurahimu vwahandikwa, vwoni vwevwe vwavikhwa vulahi havundu.

¹³Isalila yeye ili khuli yu mukhali ahulilanga lwa yivulanga mwana, navutswa ali khuli mwana uvula vusitsa; shichila yambakhananga khumanyinya murwi isaa yu khwivulwa niyakhatukha.

¹⁴Khutukha nilirulitsa vandu yava mu shihatisi. Nyala khumuhonyinya khurula mu likhutsa toto? Yivi likhutsa, ni hena ha vulwale vwovwo vuli? Yivi shihatisi, ni hena hi litivitsa liolio lili? Mbulakhu khuli nyala khulolela vandu yava tsimbavasi.

¹⁵“Khali niiva Efurahimu anyala khuneera khuli vunyasi, Inzi Mwami Nyasaye naruma imbuutsa indulu yi ivukwi, imbuutsa irulanga mu shiangalangwi; khali virula vievie via matsi viliitsa khukhaama, tsisieveye tsietsie tsilahangalala; alayaaywa shia shindu shiu vukuuli vululu mu livishilu lielie.

¹⁶Vandu vi litaala lia Samaria valasalilitswa shichila vutamanu vwavo; shichila vambinganyinya inzi Nyasaye wavo. Valiitsa khwiirwa ni shivavi, vaana vavo valatonywa mu vitonye, vakhali vavo vaheelitsa valavulanyinywa mu tsinda.”