Read tsotso HOSEHA 8 Bible Online

HOSEHA 8 - tsotso bible

HOSEHA 8

¹Mwami Nyasaye avoolanga, “Khuvi shisiliva! Mutsiku yitsanga khuli inditsu, khukwana Litempeli lianje, shichila vandu vameneka lilakano lianje khandi vahinganyinya malako kaanje.

²Vaisraeli vanaanganga Nyasaye wavo, nivavoola ndi navo vandu vaanje khandi vamanya inzi.

³Navutswa Vaisraeli vayambakhana khulonda malahi; mutsiku aliitsa khuvahitsanyinya.

⁴“Vandu vaanje vamihitsa vami, vuchila khuvahuchilila. Varovola vimilili, vuchila khwenya manye. Varumishila ifetsa nende itsahabu yavo, khulomba misambwa -- chiachila nivativitswa.

⁵Munyi vandu vi litaala lia Samaria, nahima shihunwa shienyu shialombwa khu itsahabu. Ndi nu vurima vululu na munyi. Nuluhono shina lwa muvukula khu muvuli khuva nu vutamanu vwosi?

⁶Munyi Vaisraeli muli vutswa murio! Mundu neye walomba musambwa kwenoko, shiali Nyasaye tawe. Shifwanani shi shihunwa shia Samaria shiliitsa khutong'olanyinywa mu vitonye.

⁷Varaakanga imbuutsa, vachesa shihungutsi! Imu yu mu mulimi ivula shirwi, iliitsa khuvula khumeela shindu. Niiva iliitsa khumeela, vandu vi tsimbia tsindi valiitsa khuchilia.

⁸Munyi Vaisraeli, mwamalwa khale; ni kilikali, nunundi mumenyanga mu vandu vi tsimbia tsindi khuli shindu shikhaya vutswa.

⁹Lwa mwatikulukha numutsia mu shivala shia Ashuria, muli khuli ipunda yumbulimu yonyene ihuya huyanga; Efurahimu wasamulitsa valina vene vayayaanza.

¹⁰Khali niiva mwasamuliitsa valina venyu vamwayaanza mu vandu vi tsimbia tsindi, niitsa khuvalera halala vwangu yuvu. Muliitsa khuminikha nu musiko mulitoho, lwa mwami wi tsingulu ava namutambitsanga.

¹¹“Vaefurahimu vayumbakha vwaali vunyishi vakhole vwoni, naho havundu ha vakholelanga vwoni.

¹²Mba ni namuhandichila malako kaanje mu vunyishi, mwakhakavukuli khuli ni shindu shicheni vutswa.

¹³Mwayaanza khukhola misango; musinzanga miruku chi misango numulia; navutswa inzi Mwami Nyasaye shinyala khuhuchilila misango chienecho tawe. Nzilililanga khwitsushitsa vutamanu vwenyu nu khumusalilitsa shichila vwoni vwenyu; niitsa khumukalushitsa mu shivala shia Misri.

¹⁴Munyi Vaisraeli, mwayivilila Muloonji wenyu, navutswa mwayumbakha tsinzu tsiu vwami; vandu va Yuda vayumbakha mataalaki tsimbinga manyishi; navutswa niitsa khuvwanyinya mulilu mu mataala kavo kenako, khulaalitsa tsimbinga tsiavo.”