Read tsotso YOELI 1 Bible Online

YOELI 1 - tsotso bible

YOELI 1

¹Yili nalio likhuva liu Mwami Nyasaye yavoolela Yoeli mwana wa Petsweli.

²Munyi vasakhulu, muhulile makhuva kaanje, munyi voosi vamenyanga mu shivala, muhulishitsi! Shindu khuli yishi shinyala khuva shia kholekhakhu mumatukhu kenyu, inoho mumatukhu ka vakuuka venyu vali nivashili mwoyo?

³Muvoolelekhu vaana venyu makhuva kenako; navo valiitsa khuvoolelakhu vaana vavo, khali vaana vavo valivoolelakhu likhula lindi.

⁴Vituma ni vituma vi tsisichi, tsia yinjilila viraakwa mu milimi; tsiativitsa shia shindu shiosi mu milimi.

⁵Munyi vatandi, muchelihi numulila! Munyi vang'wetsanga idivai, mulaanjilile numukhuva tsikhwili, shichila matunda ka idivai irulakhu ka yononyinywa.

⁶Shituma shikali shi tsisichi tsilolekhanga khuli vasikali tsiseeri shivala shieru, tsili ni tsingulu khandi tsia yalulana mu vunyishi; tsili na miino khuli miino ki isimba, khandi tsili na miino ka macheko khuli ki isimba ikhali.

⁷Tsiayononyinya misabibu chianje; nitsilia mikhuyu chianje; lwa tsiakukuna makhanda kachio nu khukasiuva hasi; khali tsisia tsiene tsiarikala tsinzele.

⁸Vandu munyi, mwikhule khuli mwana wi shikhana muchima yifwalanga likunia niyikhula musatsa wewe wakhutsa wali natushili khumuhila.

⁹Shihanwa shi imu nende shihanwa shi idivai viarulitswa mu Litempeli liu Mwami Nyasaye; khali vasalisi vakholanga muhinzilu ku Mwami Nyasaye vikhulanga.

¹⁰Milimi chiarikala miele; lilova likhulanga, shichila viraakwa via yononyinywa; matunda ki misabibu kaniala khali makura kakora.

¹¹Munyi valimi, muheende mwoyo; munyi vasembeli vi misabibu, muve numulilanga tsikhwili; shichila inganu nende ishayiri; shichila lichesa mu milimi liativitswa.

¹²Misabibu chianiala, misala chi mikhuyu chialekha khwama; pomenguraneti, mashindu, nende misala chia matunda -- misala chiosi mu milimi chia yumakana. Ni kilikali, vuyaanzi vuvula mu vandu.

¹³Munyi vasalisi, mufwale makunia numwikhula; munyi varumikhanga ha vwaali, kholi numulila tsikhwili. Munyi varumishilanga Nyasaye wanje, mwinjilimu numwifwali tsinguvu tsia makunia vutukhu vwosi; shichila shihanwa shi imu nende shiu khung'wa viarulitswa mu Litempeli lia Nyasaye wenyu.

¹⁴Muhaane lilako lia vandu khuhonga vuchila khulia; khandi mulaanje shikhaalo shia vandu! Laanji halala vimilili nende vandu vi shivala shinu khwitsa khwinjila mu Litempeli liu Mwami Nyasaye, uli Nyasaye wenyu, numulila tsikhwili khuye.

¹⁵Wooyi! Khuliitsa khuva khuvutiinyu khulitukhu lienelo, shichila litukhu liu Mwami Nyasaye aliitsa khukhalachila vandu lili himbi khutukha, litukhu liu Mwami Nyasaye aliitsa khutivitsa vandu.

¹⁶Viraakwa vieru viativitswa vene nu khulolakhu. Vuyaanzi nende lisangala viakora mu Litempeli lia Nyasaye weru.

¹⁷Vukuutsa vwakuundila hasi mu malova; tsinzu tsia khuvikhamu vindu tsiarikala tsinzele; viachi vieru vivulamu imu yosi; shichila viraakwa vivulakhuho via khwachesa.

¹⁸Hulilikhu khuli tsinyama tsiumbulimu tsitsiulanga! Viayo vi tsing'ombe tsihuya huyanga, shichila tsivula vunyasi vu khwaya; khali shiayo shia makondi kanyakhananga.

¹⁹Mwami Nyasaye, nilililanga khu yivi, shichila mulilu kwalaalitsa vunyasi vu mwichendanyama, khali lumemo lwayeelitsila hasi misala chiosi mu mulimi.

²⁰Khali tsinyama tsiumbulimu tsitsiulanga ni tsilila khu yivi, shichila virula via matsi viakhaama, mulilu kwalaalitsa lwayilu lu mwichendanyama.