Read tsotso LIVALITSWA 11 Bible Online

LIVALITSWA 11 - tsotso bible

LIVALITSWA 11

¹Vaisraeli varaanga khwililila khu Mwami Nyasaye, khulondokhana khu vutiinyu vwavo vwa vavirilamu. Lwa Mwami Nyasaye yavahulila, yavalolela vurima, khali naruma mulilu khutsia khusamba vandu venavo. Mulilu kwahaamba muvo, nu kwononyinya luveka lulala lu khundulu khwa maheemo ka vandu vamenyamu.

²Nalwo lwa vandu vililila khu Musa. Musa yasaala khu Mwami Nyasaye, mulilu nu kutsima.

³Khulwa yako, havundu henaho hakulikhwa lira Tabera, shichila naho havundu ha mulilu kwarula khu Mwami Nyasaye, nu kuhaamba muvo.

⁴Khwali na vandu vacheni valala, vali niviyunga na Vaisraeli. Vandu venavo varaanga khuva nu luusa lu khwikomba khulia inyama, khali Vaisraeli vene nivaraanga khwililila, nivavoola, “Vwakhavele vulahi nu khunyoli inyama yu khulia yonyene!

⁵Khwitsushitsanga tsisutsi tsia khwanyanyanga, vuchila khukuula lwa khwamenyanga mu shivala shia Misri. Khali mwitsushitsikhu khuli khwaliitsanga kakumba, linaasi liu mu matsi, vitungu sumu, vitungu, nende shiraakwa shisasanga khuli shitungu?

⁶Navutswa nunundi khumali khukhoritsa mutsanzo ku khulia; shiukhulia shindi shivulakhuho shia khutsitsanga khulolakhu, nikakhali maana!”

⁷Maana kalolekhanga khuli vukuutsa vutititi, khuli vulavililu vwa mayayi.

⁸Vandu vachenda chenda nivavutoola, nu khuvusia nisio inoho muluchina inoho khulombakhu tsikeki. Vwali nu mutsanzo khuli kwi ikeki yalombwa na makura ku musayituni.

⁹Lwa liime lialolekhanga mu vutukhu mu maheemo ka vandu vamenyamu, nalwo lwa maana kalolekhanga khandi.

¹⁰Musa yahulila vandu voosi nivilililanga, nivasinjile mu vituma mu vwinjililu vwa maheemo kavo. Musa yanyakhana mu mwoyo, shichila Mwami Nyasaye yavalolela vurima,

¹¹navoolela Mwami Nyasaye, “Shichila shina numbikha mu vutiinyu yuvu? Ni shindu shina shiakholi shivuli khukhuyaanzitsa, shichilanga nundiukha musiko mulitoho kwa vandu yavo voosi?

¹²Nyala khuva ninzi wa valoonga inoho wavivula? Shichila shina umbolele nzikhole khuli muleli nu khuvachinga mu makhono kaanje khuli vaana vatoro khuvahila mu shivala, shia wali nu walaaka ulaha vakuuka vavo?

¹³Ni hena hanyala khunyola inyama, yamba vandu venavo voosi? Vilililanga khwinzi, nivareeva, ‘Khuhe inyama ya khulia!’

¹⁴Mbulakhu tsingulu tsiu khuchinga musiko kwa vandu venavo; musiko kwenyu nu mulitoho khwinzi.

¹⁵Niiva utsitsanga khumbukula ndio, vwakhavele vulahi numali khunziira vwangu! Niiva unyala khumbela tsimbavasi, uvuli khunzivala mu vutiinyu vwanje.”

¹⁶Mwami Nyasaye yavoolela Musa, “Nderela vimilili makhomi saba va Vaisraeli, va wamanya ni vimilili va vandu khandi vahuchililwa na vandu khuva vimilili; uvavoolele vitsi ha Liheemo Litakatifu, khandi vasinjiliho nuli navo.

¹⁷Niitsa khwikhaho khandi nomolome nivi. Niitsa khuvukula roho, wa nakhuha khandi vahe. Valiitsa khukhukhonya khuchinga musiko mulitoho kwa vandu venavo, nikanyalikha uvuli khukuchinga wonyene vutswa.

¹⁸Voolela vandu, ‘Mwitakase vene shichila mukamba. Muliitsa khunyola inyama ya mulia. Mwami Nyasaye umali khuhulila, khuli mulilanga numuvoola muvula mundu unyala khumuha inyama yu khulia, khandi ndi mwamenyanga vulahi muno, numuli mu shivala shia Misri. Mwami Nyasaye atsitsanga khumuha nunundi inyama, navutswa mulachilia.

¹⁹Muliitsa khuvula khuchilia khulitukhu lilala lionyene inoho khumatukhu kavili, inoho khumatukhu karanu, khumatukhu likhomi inoho khumatukhu makhomi kavili;

²⁰navutswa khu mweli kwosi -- khutukha lwa inyama yeneyo, iliitsa khurulila mu muulu kenyu; khandi lwa iliitsa khumusiinya -- shichila mwa yambakhana inzi Mwami Nyasaye, uli mwoyo na munyi, khandi shichila mwililila khuye, numwireva shichila shina nu khurula mu shivala shia Misri?’ ”

²¹Musa yavoolela Mwami Nyasaye, “Nzimililanga vandu tsiheelefu tsimia sita, vachendanga khu vilenje; khandi nivi uvooli, utsitsanga khuvaha inyama ya vanyala khulia khu mweli mulala?

²²Ukanakananga makondi nende tsing'ombe, viliitsa khusinzwa shichila vo, nambula valia nu khwikura? Inoho ukanakananga tsisutsi tsiu mu inyanza tsiliitsa khuluvwa shichila vo, nambula valia nu khwikura?”

²³Mwami Nyasaye yavoolela Musa, “Nyala khuva nacheheelwa tsingulu? Utsitsanga khulola vwangu yuvu, niiva makhuva kamboli kaliitsa khwikholekha inoho kaliitsa khuvula khwikholekha!”

²⁴Nalwo lwa Musa yasimukha natsia ilwanyi, khuvoolelakhu vandu makhuva ku Mwami Nyasaye yali navooli. Yalaanga halala vimilili va vandu makhomi saba venavo navavoolela vavotokhane Liheemo Litakatifu.

²⁵Mwami Nyasaye yikha hasi khuvirila mu malesi, nalomoloma naye. Yavukula roho wa yali niyaha Musa, naha vimilili makhomi saba venavo. Lwa vali nivanyoli roho, varaanga khuprofeta, navutswa shikikholekha khuluhono tawe.

²⁶Vavili khu vimilili venavo, nivali Eludadi nende Medadi, vali nivahonji mu maheemo ka vandu vamenyamu, vuchila khutsia khwinjila mu Liheemo Litakatifu. Vanyola Roho lwa vali nivali mu maheemo kenako, khali nivaraanga khulaanjilila khuli ni vaprofeti.

²⁷Muyayi muvukha yasimukha vwangu, natsia khuvoolela Musa, ka Eludadi nende Medadi vakholanga.

²⁸Yoshwa mwana wa Nuni, wali nali mukhonyani wa Musa khuraanjila muvuvukha vwevwe, yalomoloma navoola, “Musa, nuyaanza uvakaye!”

²⁹Navutswa Musa yamuvoolela, “Unyala khuva ushendeshelanga inzi? Vwakhavele vulahi, niiva khutsi voosi khwakhavele vaprofeti vu Mwami Nyasaye, khali Mwami Nyasaye yakhaheele shia mundu wosi roho!”

³⁰Musa nende vimilili makhomi saba venavo, vakalukha mu maheemo ka vandu vamenyamu.

³¹Mwami Nyasaye yaruma vwangu vushindu, nuvulera tsisiindu khurula mu inyanza, tsiakhaywa khupulukha khuvira khali imita indala khurula hasi. Tsiasalana mu maheemo ka vandu vamenyamu, khandi khu tsindulu khwa maheemo kenako khu tsikilomita tsinyishi mu tsimbeka tsiosi.

³²Vandu vatsitsanga, nivakumila tsisiindu khulitukhu liosi mbasu nu vutukhu, khandi khulitukhu lilondakhu liosi. Mundu avulakhuho, wakumila tsisiindu hasi hi tsikilo 1,000. Vatsisalanyinya shia havundu hosi mu maheemo ka vandu vamenyamu khutsiuminya.

³³Lwa vandu vali nivashili ni inyama yu khulia inyishi, Mwami Nyasaye yavalolela vurima, khali navalerela matiinyu makali.

³⁴Khulwa yako, havundu henaho hakulikhwa lira Kiburotsi-hatava [1], shichila naho havundu ha vayeveela mivili chia vandu, vali nu luusa lu khulia.

³⁵Vandu varula Kiburotsi-hatava, nivatsia mu litaala lia Hazerotsi; khandi nivatsililila khumenyamu.