Read tsotso LIVALITSWA 17 Bible Online

LIVALITSWA 17 - tsotso bible

LIVALITSWA 17

¹Mwami Nyasaye yavoolela Musa,

²“Voolela Vaisraeli vakhuhe tsindovoshi likhomi na tsivili, shia indovoshi khurula khu shia mwimilili wu luhia lwa vandu vi tsimbia tsia Israeli. Handika shia lira liu mundu, khu shia indovoshi yeye.

³Handika khu indovoshi ya vandu vu lwivulu lwa Levi, lira lia Haruni; shia luhia lwa vakuuka veru, luliitsa khuva ni indovoshi yavo.

⁴Hiila tsindovoshi tsienetso, mu Liheemo Litakatifu lianje khutsira imbeli wi Lisanduku li Lilakano, ha mwakanila.

⁵Indovoshi yu mundu wandovola, iliitsa khumeela tsisia. Nalwo lwa niitsa khuva malane na makhuva kachilanga Vaisraeli nivililila shia khase khosi, nikali ka vilililanga shichila yivi.”

⁶Nalwo lwa Musa yalomoloma khu Vaisraeli. Shia mwimilili wavo, yamuha indovoshi yeye, shia luhia indovoshi, tsiosi likhomi na tsivili. Indovoshi ya Haruni yali mutsio.

⁷Musa yavikha tsindovoshi tsienetso tsiosi mu Liheemo Litakatifu, liali nilili imbeli wi Lisanduku li Lilakano liu Mwami Nyasaye.

⁸Litukhu lialondakhu mu mavwevwe, lwa Musa yinjila mu Liheemo Litakatifu, yalola ndi indovoshi ya Haruni, yasinjililanga vandu vu lwivulu lwa Levi, nimeeli tsisia. Yameela mawua, kakhomeela, khandi nimeela matunda meengu kalaangwangwa alimondi!

⁹Musa yavukula tsindovoshi tsienetso tsiosi, manamanyinya Vaisraeli. Valola kali nikakholeshe, ma shia mwimilili mwene navukula indovoshi yeye.

¹⁰Mwami Nyasaye yavoolela Musa, “Kalushitsa indovoshi ya Haruni imbeli wi Lisanduku li Lilakano. Iliitsa khuvikhwa, khuli lichelihitso khu Vaisraeli vambinganyinya ndi valiitsa khukhutsa, niiva valiitsa khulekha khwililila.”

¹¹Musa yakhola khuli Mwami Nyasaye yali namuvoolele akhole.

¹²Vaisraeli vavoolela Musa, “Khumali khukhutsa! Khumali khutivitswa! Khumali khutivitswa voosi!

¹³Mundu uliitsa khuchelitsa, khali khwisuundakhu himbi khu Liheemo Litakatifu liu Mwami Nyasaye, aliitsa khukhutsa. Khutsi voosi khunyala khutivitswa?”