Read tsotso LIVALITSWA 18 Bible Online

LIVALITSWA 18 - tsotso bible

LIVALITSWA 18

¹Mwami Nyasaye yavoolela Haruni, “Yivi, vaana vovo nende vandu vu lwivulu lwa Levi, muliitsa khunyakhana khurulana khu vutamanu vwosi, khulondokhana khu mihinzilu chia mukholanga mu Liheemo Litakatifu; navutswa yivi nende vaana vovo vonyene, muliitsa khunyakhana khurulana khu vutamanu vwosi, khulondokhana khu mihinzilu chia mukholanga chiu vusalisi.

²Yivi, viikho vovo nende vaana vovo voosi, nivali vandu vu lwivulu lwa Levi, muliitsa khukhola muhinzilu khuli vasalisi. Viikho vovo vandi vuluhia lwolwo, valiitsa khukhola muhinzilu nivi imbeli wi Liheemo Litakatifu.

³Valiitsa khurweshitsa muhinzilu kwa uliitsa khuvaha kwosi, khali mihinzilu chiavo chia vakholanga mu Liheemo Litakatifu; navutswa valiitsa khuvula khutiila khu shindu shiosi shitakatifu shili Havundu Hatakatifu inoho khu vwaali. Niiva valiitsa khukhola ndio, vo halala nivi muliitsa khwiirwa.

⁴Valiitsa khwiyunga nivi nu khurweshitsa shia muhinzilu kwosi, kwa mukholanga mu Liheemo Litakatifu; navutswa mundu avulakhuho, uliitsa khwisuunda khu munyi.

⁵Yivi nende vaana vovo vonyene, navo valiitsa khurweshitsa mihinzilu chia Havundu Hatakatifu khandi ha vwaali, khu mbuli khululila Vaisraeli.

⁶Ninzi warovola viikho vovo, nivali vuluhia lwa Levi, khurula mu vandu vi tsimbia tsia Israeli. Navo vali khuli shihanwa shioshio, vakholwa khuva vatakatifu khwinzi Mwami Nyasaye, khukhola mihinzilu chiavo mu Liheemo Litakatifu.

⁷Navutswa yivi nende vaana vovo vonyene, muliitsa khurweshitsa mihinzilu chienyu chiosi, chia mukholanga chiu vusalisi chilondokhananga nu vwaali nende shia shindu shiosi shili Havundu Hatakatifu. Nu munyi vambele muhinzilu kwenoko. Muheele shihanwa shiu khurumikha khuli vasalisi. Shia mundu wundi wosi, uliitsa khwisuundakhu himbi ha vindu vitakatifu viliitsa khuva nivili, aliitsa khwiirwa.”

⁸Mwami Nyasaye yavoolela Haruni, “Inzi mwene khurovole khusinjilila vihanwa vitakatifu viosi, via vahaananga khwinzi; vihanwa viosi via Vaisraeli vambele, mbetsanga yivi nende vaana vovo, khuli shitonye shienyu khandi shia muliitsa khunyola khumatukhu koosi.

⁹Yivi navio vihanwa via muliitsa khunyola, khurula khu vihanwa vitakatifu muno, via vavula khusamba khu vwaali: Vihanwa vi imu, vihanwa viu khurulitsaho vwoni, nende vihanwa viu khuvasa. Shia shindu shiosi, shia vambetsanga khuli shihanwa shitakatifu, shiliitsa khuva shitonye shioshio nende vaana vovo.

¹⁰Muliitsa khunyanyila vindu vienevo Havundu Hatakatifu Hene. Shia mundu musatsa wosi, aliitsa khuvilia. Viliitsa khuva vitakatifu khu munyi.

¹¹“Khumeeta khu kenako, vihanwa vindi vilahi muno, via Vaisraeli vambetsanga, viliitsa khuva vienyu. Mbetsanga yivi vindu vienevo, vaana vovo, nende vaana vi shikhana vovo khumatukhu koosi kaliitsa khuvaho. Shia mundu wosi mu vandu vi inzu yoyo, nali munihu khulondokhana khu mulukha, anyala khulia.

¹²“Khuheetsanga viraakwa vilahi viu khuraanga khucheswa, via Vaisraeli vambetsanga inzi Mwami Nyasaye, khu shia muhika: makura ku musayituni, idivai, nende imu.

¹³Viosi ni viovio. Shia mundu wosi, mu vandu vi inzu yoyo, nali munihu khulondokhana khu mulukha anyala khulia.

¹⁴“Shia shindu shiosi, mu shivala shia Vaisraeli shiakholwa khuva shitakatifu khwinzi shiliitsa khuva shioshio.

¹⁵“Shia mwana mukhulundu khwivulwa, inoho muruku ku khuraanga khwivulwa, kwa vahaananga khwinzi Nyasaye, nu kwokwo. Navutswa muliitsa khumbonyinyila shia mwana wi shiyayi mukhulundu khwivulwa, khandi shia muruku ku khuraanga khwivulwa mu miruku chienyu, chiliitsa khuva chioneshe.

¹⁶Muliitsa khumbonyinyila vaana vali nu mweli mulala vutswa, lwa muliitsa khurunga ifetsa vitonye viranu, khulondokhana khu shipimu shia matukhu kenako.

¹⁷Navutswa muliitsa khuvula khumbonyinyila shimoli shi ing'ombe, shimeme shi likondi nende imbuli; ni vitakatifu. Muliitsa khumitsa masahi kavio khu vwaali; ma musambe vivana viavio, khuli shihanwa shi shiukhulia, mwayu kuhuunyanga nu kunyanzitsa inzi Mwami Nyasaye.

¹⁸Inyama irulanga khu vihanwa yivi, iliitsa khuva yenyu, khuli tsimbele nende shilenje shisatsa shinyuma shi shihanwa shilahi muno.

¹⁹“Shia shindu shiosi, shia Vaisraeli vahaanaanga khwinzi, shiavikhwa haluveka khurula khu vihanwa vitakatifu, niitsa khukhuha yivi, vaana vovo vayayi, nende vakhana, khuli shihanwa shienyu, shia muliitsa khunyola khumatukhu koosi. Yili nalio lilakano li mihika ni mihika, liliitsa khurweshitswa lia nakhola nivi nende vitsukhulu vovo.”

²⁰Mwami Nyasaye yavavoolela Haruni, “Miandu chivulakhuho, chiuliitsa khunyola mu shivala shienyu shia Israeli. Khali shitonye shiu mulimi shivulakhuho, shiuliitsa khunyola mu vandu vovo; shichila ninzi miandu chiochio mu Vaisraeli.”

²¹Mwami Nyasaye yavoola, “Mali khuha vandu vu lwivulu lwa Levi, shia shitonye shi injeso shia Vaisraeli vambetsanga. Yuku nakwo murungu kwa varunganga, shichila muhinzilu kwavo kwa vakholanga mu Liheemo Litakatifu.

²²Vaisraeli vandi yavo vavuli khwisuundakhu ha Liheemo Litakatifu, khuvula khukhola vwoni nu khukwa mu likhutsa.

²³Khuraanjila nunundi vandu vu lwivulu lwa Levi, vonyene, navo valiitsa khukhola muhinzilu mu Liheemo Litakatifu, khandi valiitsa khusalilitswa shichila vutamanu vwavo. Yili nalio lilako khumatukhu koosi kaliitsa khuvaho, lienyu nende vitsukhulu venyu. Vandu vuluhia lwa Levi valiitsa khuvula khuva ni miandu chiavo vene mu Vaisraeli,

²⁴shichila mali khuvaha injeso ya Vaisraeli vanderelanga, khuli shihanwa shilahi shiavo, shia vanyolanga. Nashio shivune shichilanga, nivavoolela ndi vavula miandu, chia valiitsa khunyolakhu mu Vaisraeli.”

²⁵Mwami Nyasaye yavoolela Musa,

²⁶“Lomoloma khu vandu vu lwivulu lwa Levi, uvavoolele, ‘Lwa muliitsa khunyola khurula khu Vaisraeli, injeso yu Mwami Nyasaye amuheetsanga khuli yenyu vene, muliitsa khuhaana shitonye shilala khu likhomi shi injeso yeneyo, khuli shihanwa khu Mwami Nyasaye.

²⁷Shihanwa shia muhaananga, shilitsa khuvukulwa shilala ni shihanwa shiu mundu mulimi ahaananga shi imu ya yachesa impia nende idivai impia.

²⁸Munjila yeneyo, khali munyi khandi muliitsa khuhaana shihanwa khu Mwami Nyasaye, khurula khu injeso yosi ya munyolanga khu Vaisraeli. Muliitsa khuha musalisi Haruni, shihanwa shiu Mwami Nyasaye.

²⁹Muliitsa khuhaana khu Mwami Nyasaye, shia shihanwa khurula khu vihanwa vilahi via munyolanga.

³⁰Lwa muliitsa khuva numwakhahaana shitonye shilahi muno, muliitsa khuvikha virikale, khuli mundu mulimi avikhanga virikale, namali khuhaana shihanwa shieshie.

³¹Yivi nende vandu vi inzu yoyo, muliitsa khulia virikale shia havundu hosi ha mwenyanga, shichila nu murungu kwenyu, shichila muhinzilu kwa mukholanga mu Liheemo Litakatifu.

³²Shiumuliitsa khuva numukholi shindu shitamanu numulia tawe, shichila muliitsa khuva numuhaani shitonye shilahi khu Mwami Nyasaye. Navutswa mumanye ndi nu vutamanu khwononyinya vihanwa vitakatifu via Vaisraeli. Niiva muliitsa khukhola ndio, muliitsa khwiirwa.’ ”