Read tsotso LIVALITSWA 22 Bible Online

LIVALITSWA 22 - tsotso bible

LIVALITSWA 22

¹Vaisraeli vatsililila nu luchendo lwavo, nivasimiikha maheemo ku khumenyamu mu lwomera lwa Moabu, khuluveka luli ivukwi wu Muchela kwa Yorodani, khandi injelekha wi litaala lia Yeriko.

²Lwa Mwami wa Moabu walaangwangwa Balaka, wali mwana wa Zipori, yahulila shia shindu shiosi, shia Vaisraeli vali nivakholi Vaamori, khandi vunyishi vwa Vaisraeli vali nivaliho,

³ye nende vandu veve voosi vatechela muno, shichila Vaisraeli vali vanyishi. Vamoabu varishitswa, shichila Vaisraeli.

⁴Vamoabu vavoolela vimilili va Vamidiani, “Shituma shia vandu yava, valiitsa khutivitsa shia shindu shiosi, shia khuli nashio himbi, khuli ihili yayanga vunyasi mushikuri.” Nalwo lu Mwami Balaka

⁵yaruma vandu khutsia khulaanga Balamu, mwana wa Behori, wali nali mu litaala lia Petsori, himbi khu Muchela kwa Efurate mu shivala shia Amawi. Vamuvoolela makhuva ka Balaka, yali navavoolele, “Nyenyanga umanye ndi khuliho nu luhia lwa vandu khurula mu shivala shia Misri. Vandu vuluhia lwenolo vamali khulanda shia havundu hosi khandi vasiomanga, khuli vavukula shivala shieru.

⁶Ni vandu vanyishi khukhuvira khutsi. Nuyaanza hamba, unaamile vandu venavo nunundi. Haundi, nyala khuvakuura nu khuvakhunga khurula mu shivala shieru; shichila manyi ndi mundu wa yivi ukasitsanga, neye ukasitswangwa, khandi woyo wa ulaamanga neye ulaamwangwa.”

⁷Vimilili va Vamoabu nende va Vamidiani, vasimukha nivatsia khu Balamu nu murungu kukhurunga, shichila shilaamo. Vamuvoolela makhuva ka Balaka, yavaruma vavoole.

⁸Balamu yavavoolela, “Mukone hanu vutukhu vwosi, muvoolele mukamba makhuva ku Mwami Nyasaye, ava nambolele muvoolele.” Vimilili va Vamoabu varikalaho na Balamu.

⁹Nyasaye yalolekha khu Balamu nareeva, “Ni vandu shina va uli navo yava?”

¹⁰Balamu yavoolela Nyasaye, “Mwami Balaka wa Moabu, mwana wa Zipori neye uvarumi khwinzi khumbolela

¹¹ndi vandu varula mu shivala shia Misri, valandi shia havundu hosi mu shivala. Yenyanga mulaamile vandu venavo, nikanyalikha avakwane, nu khuvakhunga khurula mu shivala shieshie.”

¹²Navutswa Nyasaye yavoolela Balamu, “Lekha khutsiakhu navo. Lekha khulaamakhu vandu venavo, shichila vakasitswa.”

¹³Litukhu lialondakhu mu mavwevwe, Balamu yasimukha natsia khulola vandu va Balaka yali narumi. Yavavoolela, “Kalushi ingo wenyu; Mwami Nyasaye ungayi mbuli khutsia na munyi.”

¹⁴Nalwo lwa vakalukha khu Balaka, nivamuvoolela ndi Balamu wambakhane khwitsa navo.

¹⁵Balaka yaruma vimilili vandi vanyishi, vandu vali nivaheelwa luyali lunyishi, khuvira vali vu khuraanga venavo.

¹⁶Vasimukha nivatsia khu Balamu, nivamuvoolela makhuva ka Balaka, yali navavoolele, “Shindu shivuli khukhwikalila khwitsa khwinzi!

¹⁷Ni kilikali, nzitsanga khukhuha vihanwa vinyishi, nu khukhola shia shindu shiosi shiuvoola. Nuyaanza hamba, unaamile vandu yava.”

¹⁸Navutswa Balamu yavavoolela, “Khali niiva Balaka alamba ifetsa nende itsahabu yosi, ili munzu yeye yu vwami, mbulakhu khuli nyala khwambakhana khulonda malako ku Mwami Nyasaye, uli Nyasaye wanje khali hatititi hene.

¹⁹Navutswa numuyaanza mukone hanu vutukhu yuvu, khuli vandi vakholi, nikanyalikha ndeveshitsi manye ni makhuva shina kandi, ku Mwami Nyasaye ambolela muvoolele.”

²⁰Muvutukhu vwenovo, Nyasaye yalolekha khu Balamu, navoola, “Niiva vandu yava vitsi khukhuvoolela utsi navo, simukha utsi navo; navutswa ulakhola vutswa kakhuvoolela ukhole.”

²¹Balamu yavukha mu mavwevwe, nanina khu ipunda yeye, nasimukha natsia na vimilili va Vamoabu.

²²Navutswa Nyasaye yalolela vurima Balamu lwa yali natsitsanga. Lwa Balamu yali nahilanga ipunda yeye, halala na varumishi veve vavili, injelosi yu Mwami Nyasaye, yasinjila mu muhaanda khumwikalila injila.

²³Lwi ipunda yalola injelosi yu Mwami Nyasaye, nisinjile mu muhaanda nikumile shivavi, yalekha muhaanda, nitsia mu milimi. Balamu yashuta ipunda yeneyo, khuchikalushitsa khu muhaanda.

²⁴Nalwo lwi injelosi yu Mwami Nyasaye, yasinjila havundu ha muhaanda kwali nu kwanyeleha hakari hi milimi chi misabibu chivili, chili ni lisisi liumbakhwa na machina shia mumbeka.

²⁵Lwi ipunda yalola injelosi yu Mwami Nyasaye, yiminila khu lisisi khandi niyituuya shilenje shia Balamu khulio. Balamu yarumula khandi ipunda yeneyo.

²⁶Injelosi yu Mwami Nyasaye yisuunda khandi hambeli. Yasinjila havundu hanyeleha vuchila khuva nu vwiyangu vwosi mu tsimbeka tsiosi.

²⁷Lwi ipunda yeneyo, yalola injelosi yu Mwami Nyasaye, yakona hasi ha Balamu. Balamu yachilolela vurima, khandi nachishuta ni indovoshi yeye.

²⁸Mwami Nyasaye yaha ipunda, vunyali vu khulomoloma, nivoolela Balamu, “Ni shindu shina shia khukholele? Shichila shina nushuta hali khavaka yakha?”

²⁹Balamu yachipa, “Ukholi khuva mundu muyiingwa! Mbele nakhusinza, mba ni shivavi.”

³⁰Ipunda yeneyo, yamuvoolela, “Shindi ipunda yoyo mwene, ya wamenya nuhilanga khumatukhu koosi, khali nunundi? Nyala khuva nakhukholelakhu makhuva khuli kenako?” Balamu yachipa, “Ushili khukholelakhu.”

³¹Nalwo lwa Mwami Nyasaye, yikula tsimoni tsia Balamu, khali nalola injelosi yu Mwami Nyasaye, nisinjile mu muhaanda nikumile shivavi shieshie. Balamu yakona hasi mahunama.

³²Injelosi yu Mwami Nyasaye yamureeva, “Shichila shina nushuta ipunda yoyo hali khavaka khenakho? Nitsi khukhwikalila, shichila luchendo lwolwo nu lutamanu.

³³Navutswa ipunda yoyo yandola, nikomokha hali khavaka. Niiva yakhavuli khukomokha, khani mali khukhwiira yivi, navutswa ipunda tawe.”

³⁴Balamu yavoolela injelosi yu Mwami Nyasaye, “Mali khukhola vwoni. Shinali nimanyikhu wasinjila mu muhaanda, khunzikalila injila tawe; navutswa nunundi niiva uloli nu vutamanu khutsililila nu luchendo lwanje, lekha ngalushi ingo.”

³⁵Navutswa injelosi yu Mwami Nyasaye, yavoolela Balamu, “Tsia na vandu yava; navutswa ulavoola vutswa makhuva, ka khuvoolela konyene.” Balamu yasimukha natsia navo.

³⁶Lwa Balaka yahulila ndi Balamu yali nali khu luchendo niyitsanga, yasimukha natsia khumwakanila mu litaala lia Ari, lili khu Muchela kwa Arunoni khu mupaka kwa Moabu.

³⁷Balaka yamureeva, “Shichila shina nuvula khwitsa, lwa narumana vakhulaanje lukhuraanga? Wakanakana mbula vunyali vu khukhurunga vihanwa mu vunyishi?”

³⁸Balamu yamuvoolela, “Nu vulahi, nakhitsa nunundi khukhulola. Navutswa nyala khuvoolakhu shindu? Nzitsanga khuvoola vutswa makhuva, ka Nyasaye ambolela mbole.”

³⁹Balamu yasimukha na Balaka, natsia mu litaala lia Kiriatsi-huzotsi;

⁴⁰wa Balaka yasinza tsing'ombe nende makondi, nahaakhu Balamu nende vimilili vali nivaliho inyama yeneyo.

⁴¹Litukhu lialondakhu mu mavwevwe, Balaka yavukula Balamu, nivatikulukha khutsia mu litaala lia Bamotsi-bali. Balamu yalolelayo valala khu Vaisraeli.