Read tsotso LIVALITSWA 23 Bible Online

LIVALITSWA 23 - tsotso bible

LIVALITSWA 23

¹Balamu yavoolela Balaka, “Nzumbashila vwaali saba hanu, underele vihuunwa saba nende mamiiko saba.”

²Balaka yakhola khuli yali navoolelwi, ma ye nende Balamu nivahaana shihunwa nende limiiko khu shia vwaali.

³Balamu yavoolela Balaka, “Sinjila hanu, himbi khu shihanwa shioshio shiu khusambwa, nishitsia khulola, niiva Mwami Nyasaye aliitsa khumbukanila inoho alavula khumbukanila. Niitsa khukhuvoolela shia shindu shiosi, shialiitsa khuva nambolele.” Nalwo lwa Balamu yasimukha wonyene, natsia khunina khu shikulu,

⁴ma Nyasaye namwakanila. Balamu yavoolela Nyasaye, “Mali khumbakha vwaali saba nu khuhaana shihanwa shi shihunwa nende shi likondi limiiko, khu shia vwaali vwosi.”

⁵Mwami Nyasaye yavoolela Balamu makhuva kamuvoolela, namuruma khutsia khuvoolela Balaka makhuva kenako.

⁶Balamu yakalukhaho, nanyola Balaka nashisinjile ha shihanwa shieshie shiu khusambwa, halala na vimilili voosi va Vamoabu.

⁷Balamu yalomoloma vuprofeti vwevwe, navoola, “Mwami Balaka wa Moabu neye underi, khurula mu shivala shia Siria, khurula mu vikulu khuluveka luli ivukwi. Yavoola, ‘Hamba unomolomele havukono hanje. Laama Vaisraeli.’

⁸Nyala khulaama munjila shina, shia Nyasaye yavula khulaama? Nyala khutivitsa ndina vandu vu Mwami Nyasaye yavula khukhalachila khutiva?

⁹Valolelanga mu vikulu viaraambiha; nyala khuvaheenzela mu vikulu, nu luhia lumenyanga lwonyene; vamanyi ndi vakasitswa khuvira vandu vi tsimbia tsindi tsiosi.

¹⁰Vitsukhulu va Vaisraeli vali khuli lukuushi -- Ni vanyishi khali vakhanyala khuvalitswa tawe. Leshi mbe nikhutsanga khuli mulala khu vandu va Nyasaye; leshi mbe nikhutsilanga mu milembe khuli mundu wi likhola liu vulunji.”

¹¹Balaka yavoolela Balamu, “Ni shina shiukholele? Khulaanji hanu khulaama vatsiku vaanje, navutswa shindu shivulakhuho shiukholi; navutswa umali khuvakasitsa!”

¹²Balamu yamuvoolela, “Mbolanga vutswa ku Mwami Nyasaye avetsanga nambolele mbole.”

¹³Balaka yavoolela Balamu, “Hamba khutsi nivi havundu handi, unyala khulolela vutswa valala khu Vaisraeli. Uliitsa khunaamila vandu venavo, nuli havundu henaho.”

¹⁴Balaka yamuvukula, namuhila mu mulimi kuli havundu halaangwangwa Zofimu, ikulu wi Shikulu shia Pisiga. Yumbakhaho vwaali saba, khali nasinzila khu shia vwaali vwenovo, shihunwa nende likondi limiiko.

¹⁵Balamu yavoolela Balaka, “Sinjila hanu, himbi khu shihanwa shioshio shiu khusambwa, nishitsia khwakana nu Mwami Nyasaye yeyo.”

¹⁶Mwami Nyasaye yakana na Balamu, namuvoolela makhuva ku khuvoola, namuvoolela akalushi khu Balaka khumuvoolela makhuva keke.

¹⁷Balamu yakalukhaho nanyola Balaka nashisinjile himbi khu shihanwa shieshie shiu khusambwa, halala na vimilili va Vamoabu. Balaka yareeva amanye, ku Mwami Nyasaye yali navooli,

¹⁸ma Balamu nalomoloma vuprofeti vwevwe, “Balaka mwana wa Zipori, sinjila uhulishitsi; umbulishitsi ka nyenyanga khuvoola.

¹⁹Nyasaye shiali khuli mundu, witsula vuvehi; Inoho khuli mwana wu mundu, unyala khukalukhanyinya ka yenyanga khukhola tawe. Namali khulaaka khukhola, akholanga; namali khulomoloma, kikholekhanga.

²⁰Nyoli lilako liu khukasitsa; ukasitsi, mbulakhu lianyala khukalukhanyinya.

²¹Mwami Nyasaye ashili khulola vutamanu vwosi mu vandu va Yakobo; ashili khulola vutiinyu mu Israeli. Mwami Nyasaye, uli Nyasaye wavo ali navo, neye mwami wa vitsominyanga nivalaanjilila.

²²Nyasaye neye wa varulitsa mu shivala shia Misri; avakwanilanga khuli ihili indulu.

²³Makhumu kavulakhuho kanyala khwikalila vandu va Yakobo, inoho vuloochi khwikalila Vaisraeli. Vandu valiitsa khuvoola shichila Israeli, ‘Lolikhu ka Nyasaye yakhola.’

²⁴Lolikhu! Vaisraeli vichinguli khuli isimba ikhali, vasinjile khuli isimba; ivulakhu khuli inyala khuhulukha nishili khwiira inyama yayenyi, nu khung'wa masahi kayo.”

²⁵Nalwo lwa Balaka yavoolela Balamu, “Lekha khuvalaama inoho khuvakasitsa, khali hatititi hene.”

²⁶Navutswa Balamu yavoolela Balaka, “Shimbele nikhuvoolele khale ndi nakhola shia shindu shiosi, shiu Mwami Nyasaye aliitsa khumbolela khole?”

²⁷Balaka yavoolela Balamu, “Hamba, nyenyanga khukhuhila havundu handi. Haundi, kalayaanzitsa Nyasaye, ahuchilile unaamile vandu venavo, nuli havundu henaho.”

²⁸Balaka yahila Balamu ikulu khu Shikulu shia Pehori, shili khuluveka lundi lu mu shiangalangwi.

²⁹Balamu yamuvoolela, “Nzumbashila vwaali saba hanu, khandi underele vihuunwa saba nende mamiiko saba.”

³⁰Balaka yakhola khuli Balamu, yali namuvoolele akhole, nasinzila khu shia vwaali shihunwa nende likondi limiiko.