Read tsotso LIVALITSWA 26 Bible Online

LIVALITSWA 26 - tsotso bible

LIVALITSWA 26

¹Lwa vulwale vwali nu vumali khuvwa, Mwami Nyasaye yavoolela Musa nende Eliazari, mwana wa Haruni,

²“Muvalitse Vaisraeli voosi khulondokhana khu vandu vi tsinzu tsiavo tsiosi, vali ni mihika makhomi kavili inoho minyishi, vali ni tsingulu tsiu khurumikha muliihe.”

³Lwa vali nivakanile halala, mu lwomera lwa Moabu injelekha wundi wu Muchela kwa Yorodani, nuli mu litaala lia Yeriko, Musa nende Eliazari valomoloma khuvo, nivavoola,

⁴“Muvalitse vandu vasatsa, vali ni mihika makhomi kavili inoho mihika minyishi, khuli Nyasaye yali niyavoolela Musa.” Yava navo Vaisraeli varula mu shivala shia Misri:

⁵Vitsukhulu va Rubeni (Rubeni mwana mukhulundu wa Yakobo): tsinzu tsia Hanoku, Palu,

⁶Hezironi, nende Karumi.

⁷Tsinzu yitsi tsiali na vandu tsiheelefu makhomi kane na tsivaka tsimia saba na makhomi kavaka.

⁸Vitsukhulu va Palu vali Eliabu

⁹nende vaana vi shiyayi veve nivali Nemweli, Datsani, nende Abiramu. (Datsani nende Abiramu, navo va Vaisraeli varovola khale. Vahinjitsa Musa nende Haruni maniviyunga na valondi va Kora, lwa vahinganyinya Mwami Nyasaye.

¹⁰Lilova likukha nilivamiila, nivakhutsa halala na Kora nende valondi veve, lwa mulilu kwamala vandu tsimia tsivili na makhomi karanu; vamanya nivakwa khuli shimanyilu shiu khuchelihitsa vandu.

¹¹Navutswa khali ndio, vaana va Kora vavula khwiirwa.)

¹²Vandu vuluhia lwa Simioni: tsinzu tsia Nemweli, Yamini, Yakini,

¹³Zera, nende Shahuli.

¹⁴Vandu vi tsinzu yitsi, vali tsiheelefu makhomi kavili ni tsimia tsivili.

¹⁵Vandu vuluhia lwa Gadi: tsinzu tsia Zefoni, Hagi, Shuni,

¹⁶Ozuni, Eri,

¹⁷Arodi, nende Areli.

¹⁸Vandu vi tsinzu tsienetso, vali tsiheelefu makhomi kane ni tsimia tsiranu.

¹⁹Eri nende Onani vali vaana va Yuda; navutswa vakhutsila mu shivala shia Kanaani.

²⁰Vitsukhulu va Yuda, khulondokhana khu tsinzu tsiavo vali: Shelani, Perezi, Zera;

²¹vitsukhulu va Perezi, khulondokhana khu tsinzu tsiavo vali: Hezironi nende Hamuli.

²²Yitsi natsio tsiali tsinzu tsia vandu vuluhia lwa Yuda; vandu voosi vavalitswa vali tsiheelefu makhomi saba na sita ni tsimia tsiranu.

²³Vandu vuluhia lwa Isakari: tsinzu tsia Tola, Puha,

²⁴Yashubu nende Shimuroni.

²⁵Vandu vavalitswa vi tsinzu tsienetso, vali tsiheelefu makhomi sita na vane ni tsimia tsivaka.

²⁶Vandu vuluhia lwa Zabuloni: tsinzu tsia Seredi, Eloni, nende Yahuleli.

²⁷Vandu vavalitswa vi tsinzu tsienetso, vali tsiheelefu makhomi sita ni tsimia tsiranu.

²⁸Vandu vu lwivulu lwa Yosefu, wali niyivula vaana vi shiyayi vavili nivali Manaase nende Efurahimu.

²⁹Vandu vuluhia lwa Manaase: Makiri mwana wa Manaase, neye wivula Gileadi, khandi vandu vi tsinzu tsienetso, navo vali vitsukhulu va Gileadi:

³⁰tsinzu tsia Ihezeri, Heleki,

³¹Asiriheli, Shekemu,

³²Shemida, nende Heferi.

³³Zelofehadi mwana wa Heferi, yali nashili khwivulakhu mwana wi shiyayi wosi. Navutswa yali wayivula vaana vi shikhana vonyene; mira kavo kali Mahula, Nuhu, Hogula, Milika, nende Tiriza.

³⁴Vandu vi tsinzu tsienetso, vali tsiheelefu makhomi karanu na vavili ni tsimia saba.

³⁵Vandu vuluhia lwa Efurahimu: tsinzu tsia Shutsela, Bekeri, nende Tahani.

³⁶Vitsukhulu vu mu inzu ya Erani varula khu Shutsela.

³⁷Vandu vi tsinzu tsienetso, vali tsiheelefu makhomi kavaka na vavili ni tsimia tsiranu. Natsio tsinzu tsiarula khu Yosefu.

³⁸Vandu vuluhia lwa Benyamini: tsinzu tsia Bela, Ashibeli, Ahiramu,

³⁹Shefufamu, nende Hufamu.

⁴⁰Vandu vi tsinzu tsia Arudi nende Nahamani, navo vitsukhulu va Bela.

⁴¹Vandu vi tsinzu tsienetso, vali tsiheelefu makhomi kane na varanu ni tsimia sita.

⁴²Vandu vuluhia lwa Dani: Inzu ya Shuhamu;

⁴³inzu yeneyo yali na vandu tsiheelefu makhomi sita na vane ni tsimia tsine.

⁴⁴Vandu vuluhia lwa Asheri: vali tsinzu tsia Imuna, Ishuvi, nende Beria.

⁴⁵Vandu vi tsinzu tsia Heberi nende Malukieli, navo vitsukhulu va Beria.

⁴⁶Asheri yivula mwana wi shikhana walaangwangwa Sera.

⁴⁷Vandu vi tsinzu tsienetso, vali tsiheelefu makhomi karanu na vavaka ni tsimia tsine.

⁴⁸Vandu vuluhia lwa Nafutali: tsinzu tsia Yahuzeli, Guni,

⁴⁹Yezeri, nende Shilemi.

⁵⁰Vandu vi tsinzu tsienetso, vali tsiheelefu makhomi kane na varanu ni tsimia tsine.

⁵¹Vandu vasatsa Vaisraeli vali tsiheelefu tsimia sita nu mulala ni tsimia saba na makhomi kavaka.

⁵²Mwami Nyasaye yavoolela Musa,

⁵³“Ukavule shivala khu vandu vi tsimbia, khulondokhana khu vunyishi vwa vandu.

⁵⁴Haana lusomo lukali khu vandu vali vanyishi; khandi lutititi khu vandu vali nisavu indititi; shia luhia lulanyola khulondokhana khu vunyishi vwa vandu vali nivavalitswa.

⁵⁵Navutswa shivala shiliitsa khukavulwa khuvirila khu ikura. Shia luhia luliitsa khunyola shitonye shiavo, khulondokhana khu vunyishi vwa vandu vali nivavalitswa.

⁵⁶Lusomo lwavo lwa valiitsa khunyola, luliitsa khukavulwa khuvirila khu ikura, hakari ha vandu vuluhia lukali nende vandu vuluhia lutititi.”

⁵⁷Vandu vuluhia lwa Levi, nivali yavo varulanga mu tsinzu tsia Gerishoni, Kohaatsi, nende Merari.

⁵⁸Vitsukhulu vavo navo vandu vi tsinzu tsia Libuni, Heburoni, Mahuli, Mushi, nende Kora. Kohaatsi neye wivula Amuramu,

⁵⁹mundu wali niyahila, mwana wi shikhana wa Levi; Yokebedi, yivulwa mu shivala shia Misri. Yivula khu Amuramu vaana vi shiyayi vavili, valaangwangwa Haruni nende Musa, nu mwana wi shikhana walaangwangwa Miriamu.

⁶⁰Haruni yivula vaana vi shiyayi vane, nivali Nadabu, Abihu, Eliazari, nende Itsamari.

⁶¹Navutswa Nadabu nende Abihu vakhutsa, lwa vahaana shihanwa shiu khusambwa shitamanu khu Mwami Nyasaye.

⁶²Vaana vi shiyayi voosi vali nivali nu mweli mulala inoho muhika, vali tsiheelefu makhomi kavili na vavaka. Lwa vali nivavula miandu, chia vali nivaheelwa mu Vaisraeli valekhwa khuvalitswa.

⁶³Yitsi natsio tsinzu tsia Musa nende Eliazari vahandika, lwa vavalitsa Vaisraeli mu lwomera lwa Moabu, khuluveka lundi lu Muchela kwa Yorodani nivali mu litaala lia Yeriko.

⁶⁴Khali mundu avulakhuho warikala mu yavo voosi, va Musa nende Haruni vavalitsa, lwa vavalitsa Vaisraeli mwichendamana mwa Sinai.

⁶⁵Mwami Nyasaye yali wavoola ndi voosi valiitsa khukhutsila mwichendanyama, nikakhali Kalebu mwana wa Yefuna nende Yoshwa mwana wa Nuni.