Read tsotso LIVALITSWA 28 Bible Online

LIVALITSWA 28 - tsotso bible

LIVALITSWA 28

¹Mwami Nyasaye yavoolela Musa,

²“Uhe Vaisraeli lilako yili, uvavoolele, muchelitsi khulola ndi muhaananga vihanwa vi shiukhulia khwinzi mumatukhu katushili, vihanwa viu mwayu kuhuunyanga nu kunyanzitsa.

³“Yivi navio vihanwa vi viukhulia vitushili khuhaanwa khu Mwami Nyasaye: makondi masatsa kavili, vuchila imbala yosi nu muhika mulala, khuli vihanwa viu khusambwa shia litukhu.

⁴Muliitsa khuhaana likondi liu khuraanga mu mavwevwe, na likondi lia khavili lindi halukolovo,

⁵shia likondi ni shihanwa shi imu ikilo indala yu vusi, ya tsukanywamu ilita indala ya makura malahi ku musayituni.

⁶Yishi nashio shihanwa shia khase khosi shisambwangwa khukwa likooshe, shiraanjitswa khuhaanwa ha Shikulu shia Sinai khuli shihanwa shi shiukhulia, mwayu kuhuunyanga nu kuyaanzitsa Mwami Nyasaye.

⁷Muliitsa khusuundula ilita indala yi idivai khu vwaali, khuli shihanwa shi idivai khu likondi liu khuraanga.

⁸Muliitsa khuhaana shimeme shi likondi shia khavili halukolovo, khuli mukholi lwa muhaani shihanwa shiu mu mavwevwe, halala ni shihanwa shi idivai yashio. Ni shihanwa shi shiukhulia khandi, shihuunyanga mwayu ku khuyaanzitsa Mwami Nyasaye.

⁹“Khulitukhu li Lisabato, muliitsa khuhaana vimeme vi likondi vivili, vili nu muhika mulala vuchila imbala yosi; nende tsikilo tsiu vusi vwa tsukanywamu makura ku musayituni, khuli shihanwa shi imu, nende shihanwa shi idivai.

¹⁰Shihanwa shiu khusambwa shienesho, shilitsa khuhaanwa khu shia litukhu li Lisabato, khumeeta khu shihanwa shia khase khosi, halala ni shihanwa shi idivai yashio.

¹¹“Muliitsa khuhaana shihanwa shiu khusambwa khu Mwami Nyasaye, shia litukhu liu khuraanga khu shia mweli: Vimoli vivili vihuunwa, limiiko lilala, mamiiko saba, kali nu muhika mulala, koosi vuchila imbala yosi.

¹²Muliitsa khuhaana vusi vwa tsukanywamu makura ku musayituni, khuli shihanwa shi imu: halala ni tsikilo 3 tsiu vusi, khu shia shihunwa; tsikilo 2, khu shia limiiko;

¹³khandi ikilo indala khu shia likondi. Vihanwa viu khusambwa yivi, ni vihanwa vi viukhulia, vihuunyanga mwayu kuyaanzitsanga Mwami Nyasaye.

¹⁴Shihanwa shi idivai shitushili khuhaanwa, shiliitsa khuva tsilita 2 tsi idivai khu shia shihunwa, ilita indala ninusu khu shia limiiko, nende ilita indala khu shia likondi. Yili nalio lilako li shihanwa shiu khusambwa, khulitukhu liu khuraanga khu shia mweli khumuhika kwosi.

¹⁵Khumeeta khu shihanwa shiu khusambwa shia khase khosi nende shihanwa shi idivai yashio, muliitsa khuhaana imbuli ikhole indala, khuli shihanwa shiu khurulitsaho vwoni.

¹⁶“Mulukha kwa Pasaka ku khuha Mwami Nyasaye luyali, kuliitsa khwikholekha khulitukhu li likhomi na khane liu khuraanga khu mweli.

¹⁷Khulitukhu lia kharanu liu mweli kwenoko, khuliitsa khukhola mulukha. Muliitsa khulia khumatukhu saba mikati chialombwa vuchila mamela.

¹⁸Khulitukhu liu khuraanga liu mulukha kwenoko, muliitsa khwakanila halala khusaala. Muvuli khukholakhu muhinzilu kwosi.

¹⁹Muliitsa khuhaana shihanwa shiu khusambwa, khuli shihanwa shi shiukhulia khu Mwami Nyasaye: vihuunwa vivili, limiiko lilala, nende makondi mamiiko saba, kali nu muhika mulala, koosi vuchila imbala.

²⁰Muliitsa khuhaana shihanwa shi imu shitushili khuhaanwa shiu vusi nu vwa tsukanywamu makura ku musayituni: tsikilo 3 khu shia shihunwa, tsikilo 2 khu limiiko;

²¹khandi ikilo indala khu shia likondi.

²²Muliitsa khuhaana khandi imbuli ikhole, khuli shihanwa shiu khurulitsaho vwoni, ma mukhole mulukha ku khunihitsa vandu munjila yeneyo.

²³Muliitsa khuhaana vihanwa yivi, khumeeta khu vihanwa viu khusambwa, via muhaananga mu mavwevwe.

²⁴Muliitsa khuhaana khumatukhu saba khu Mwami Nyasaye, shihanwa shi shiukhulia; mwayu kuhuunyanga nu kumuyaanzitsa. Muliitsa khuhaana vihanwa yivi, khumeeta khu shihanwa shia khase khosi nende shihanwa shi idivai.

²⁵Muliitsa khwakanila halala khulitukhu lia saba khusaala. Muvuli khukholakhu muhinzilu kwosi.

²⁶“Khulitukhu liu khuraanga liu Mulukha kwi Lichesa, lwa muliitsa khuhaana shihanwa shi imu yu khuraanga khuchesa khu Mwami Nyasaye, muliitsa khwakanila halala khusaala. Muvuli khukholakhu muhinzilu kwosi.

²⁷Navutswa muliitsa khuhaana shihanwa shiu khusambwa, nu kuli mwayu kuhuunyanga nu kuyaanzitsa Mwami Nyasaye: vihuunwa vivili, limiiko lilala, nende tsikhole saba tsiu muhika mulala, koosi vuchila imbala.

²⁸Muliitsa khuhaana shihanwa shi imu, shiu vusi shitushili khuhaanwa shia tsukanywamu makura ku musayituni: tsikilo 3 khu shia shihunwa, tsikilo 2 khu shia limiiko,

²⁹nende ikilo indala khu shia likondi.

³⁰Muliitsa khuhaana khandi imbuli ikhole indala, khuli shihanwa shiu khurulitsaho vwoni, ma mukhole mulukha ku khunihitsa vandu munjila yeneyo.

³¹Muliitsa khuhaana vihanwa yivi nende shihanwa shi idivai, khumeeta khu shihanwa shiu khusambwa shia khase khosi nende shihanwa shi imu. Muheenzeshitsi mulole ndi muvula imbala yosi.”