Read tsotso LIVALITSWA 3 Bible Online

LIVALITSWA 3 - tsotso bible

LIVALITSWA 3

¹Yava navo vali vandu vi inzu ya Haruni nende Musa, mumatukhu ku Mwami Nyasaye yalomoloma khu Musa, nali khu Shikulu shia Sinai.

²Haruni yivula vaana vi shiyayi vane. Mwana mukhulundu yali Nadabu, wa khavili Abihu, wa khavaka Eliazari, khandi wa khane Itsamari.

³Yaka nako mira ka vaana va Haruni, vavekhwa makura khandi nivakholwa khuva vasalisi, khurumikha khuli vasalisi,

⁴navutswa Nadabu nende Abihu viirwa, lwa vakhola musango ku khusambwa nu mulilu, kuvula vutakatifu khu Mwami Nyasaye, nivali mu Shiangalangwi shia Sinai. Vali nivashili khwivulakhu mwana wosi. Eliazari nende Itsamari, varumikha khuli vasalisi khumatukhu koosi, ka tata wavo Haruni yali nashili mwoyo.

⁵Mwami Nyasaye yavoolela Musa,

⁶“Lera imbeli vandu vu lwivulu lwa Levi, khuvarovola khuva varumishi vu khukhonya musalisi Haruni.

⁷Valiitsa khukhola muhinzilu kutushili imbeli wi Liheemo Litakatifu, khali khukholela vasalisi nende Vaisraeli voosi muhinzilu.

⁸Valiitsa khusinjilila shia shindu shiosi, shili mu Liheemo Litakatifu nu khurumishila Vaisraeli voosi valiitsa khuva nivarikale.

⁹Vandu vuluhia lwa Levi valiitsa khurumishila Haruni nende vaana veve. Navo varovolwa khuvarumishila khurula mu Vaisraeli voosi.

¹⁰Uliitsa khurovola Haruni nende vaana veve, khukhola mihinzilu chiu vusalisi; navutswa niiva mundu aliitsa khuchelitsakhu khukhola muhinzilu kwenoko, mundu mwenoyo aliitsa khwiirwa.”

¹¹Mwami Nyasaye yavoolela Musa,

¹²“Mali khurovola vandu vu lwivulu lwa Levi mu vandu vi tsimbia tsia Israeli khuva vaanje mwene, vukhala vukhuvukula mwana wi shiyayi mukhulundu khwivulwa mu Vaisraeli. Vandu vuluhia lwa Levi valiitsa khuva vaanje,

¹³shichila vaana vi shiyayi vakhulundu khwivulwa ni vaanje. Khali miruku chiu khuraanga khwivulwa ni chianje inzi Mwami Nyasaye. Lwa nativitsa vaana vi shiyayi vakhulundu va Vamisri nende miruku chiavo chiu khuraanga khwivulwa, mwene nayivukulila vaana vi shiyayi vakhulundu khwivulwa va Vaisraeli. Khali miruku chiavo chiu khuraanga khwivulwa ni chianje. Ninzi Mwami Nyasaye.”

¹⁴Mwami Nyasaye yavoolela Musa, wali nali mu Shiangalangwi shia Sinai,

¹⁵“Muvalitse vandu vu lwivulu lwa Levi, khulondokhana khu lwivulu nende tsinzu tsiavo. Valitsa shia mwana wi shiyayi ushili mutoro uli nu mweli mulala nu khutsililila imbeli.”

¹⁶Nalwo lwa Musa yavavalitsa, khuli Mwami Nyasaye yali namuvoolele.

¹⁷Mira ka vaana vi shiyayi va Levi yivula khulondokhana khu tsinzu tsiavo, vali Gerishoni, Kohaatsi nende Merari.

¹⁸Mira ka vaana vi shiyayi va Gerishoni yivula khulondokhana khu tsinzu tsiavo vali Libuni nende Shimei.

¹⁹Mira ka vaana va Kohaatsi khulondokhana khu tsinzu tsiavo vali Amuramu, Izuhari, Heburoni, nende Uzieli.

²⁰Mira ka vaana va Merari khulondokhana khu tsinzu tsiavo vali Mahuli nende Mushi. Nako mira ka vandu vi tsinzu tsia vandu vu lwivulu lwa Levi khulondokhana khu lwivulu lwa vakuuka vavo.

²¹Vandu vu lwivulu lwa Gerishoni vali vi tsinzu tsia Libuni nende Shimei.

²²Vaana vi shiyayi vatititi vavalitswa, vali nu muhika mulala nu khutsililila imbeli vali tsiheelefu saba ni tsimia tsiranu.

²³Vandu vu lwivulu lwa Gerishoni venyekhanga vamenya khuluveka luli imbo inyuma wi Liheemo Litakatifu,

²⁴mwimilili wavo nali Eliasafu mwana wa Laheli.

²⁵Vali vaheelwa muhinzilu ku khusinjilila Liheemo Litakatifu, luvaala lwalio lu mukari, luvaala lwalio lwi ilwanyi, luvaala luli mu vwinjililu,

²⁶tsimbala tsi Liheemo Litakatifu tsili khu shia khundulu khwi Liheemo Litakatifu nende vwaali khandi luvaala lu mu vwinjililu vwi Liheemo Litakatifu. Vo vali vaheelwa vunyali vu khukhola muhinzilu kwosi nivarumishilanga vindu vienevo.

²⁷Vandu vi inzu ya Kohaatsi valimu na vandu vi tsinzu tsia Amuramu, Izuhari, Heburoni nende Uzieli.

²⁸Vaana vi shiyayi vashili vatoro vavalitswa vali nu muhika mulala nu khutsililila imbeli vali tsiheelefu munane ni tsimia sita.

²⁹Vandu vu lwivulu yulu vamenyanga khuluveka luli ikuvanda wi Liheemo Litakatifu,

³⁰mwamihi wavo nali Elizafani mwana wa Uzieli.

³¹Vali vaheelwa muhinzilu ku khusinjilila Lisanduku li Lilakano, imesa, shikuru shi itaaha, vwaali, vindu via vasalisi varumishilanga Havundu Hatakatifu nende luvaala luli mu vwinjililu vwa Havundu Hatakatifu. Vo vali vaheelwa vunyali vu khukhola mihinzilu chiosi ni vindu vienevo.

³²Mwimilili wa vandu vu lwivulu lwa Levi, yali Eliazari mwana wu musalisi Haruni. Neye wasinjililanga yavo voosi vakholanga mihinzilu Havundu Hatakatifu.

³³Vandu vu lwivulu lwa Merari, valimu na vandu vi tsinzu tsia Mahuli nende Mushi.

³⁴Vaana vi shiyayi vashili vatoro vavalitswa, vali nu muhika mulala nu khutsililila imbeli, vali tsiheelefu sita ni tsimia tsivili.

³⁵Vandu vu lwivulu lwenolo, vamenya khuluveka luli ivuluka wi Liheemo Litakatifu. Zurieli mwana wa Abihaili, neye wali mwimilili wu lwivulu lwenolo.

³⁶Vo vali vaheelwa muhinzilu ku khusinjilila tsifulemu tsi Liheemo Litakatifu, milondi chitiilanga Liheemo Litakatifu, misala, vwalilu, nende tsisheti. Vo vali vaheelwa vunyali vu khukhola, shia muhinzilu kwosi ni vindu vienevo.

³⁷Vali vaheelwa vunyali vu khusinjilila khandi misala, vwalilu, vindu viu khukumilanyinya vindu nende mikoye ilwanyi wi Liheemo Litakatifu.

³⁸Musa, Haruni nende vaana veve, vali vavoolelwa vamenya mu maheemo, khuluveka luli ivukwi imbeli wi Liheemo Litakatifu. Vali vaheelwa vunyali vu khusinjilila mihinzilu chiosi, chia kholelwangwa Havundu Hatakatifu shichila Vaisraeli. Shia mundu wosi wachelitsakhu khukholakhu kenako, yenyekhanga khwiirwa.

³⁹Vaana vi shiyayi vashili vatoro va vandu vu lwivulu lwa Levi, vali nu mweli mulala inoho minyishi khuvira mweli kwenoko, va Musa yahandika, niyakhavalitsa vandu khulondokhana khu lilako liu Mwami Nyasaye, vali tsiheelefu makhomi kavili na vavili.

⁴⁰Mwami Nyasaye yavoolela Musa, “Muvalitse vaana vi shiyayi vakhulundu vashili vatoro voosi va Vaisraeli, vali nu mweli mulala inoho khutsililila imbeli, nuhandika mira kavo.

⁴¹Mbukulila vandu vu lwivulu lwa Levi, havukono ha vaana vi shiyayi vakhulundu khwivulwa va Vaisraeli, khandi miruku chia vandu vu lwivulu lwa Levi, havukono hi miruku chiu khuraanga khwivulwa chia Vaisraeli khuva vianje inzi Mwami Nyasaye.”

⁴²Nalwo lwa Musa yakhola ndio, navalitsa vaana vi shiyayi vakhulundu khwivulwa vashili vatoro halala ni miruku misatsa chiu khuraanga khwivulwa, khuli Mwami Nyasaye yali navooli,

⁴³khuraanjila khu mweli mulala nu khutsililila imbeli; vaana vi shiyayi vatoro vavalitswa, vali tsiheelefu makhomi kavili na vavili tsimia tsivili makhomi saba na vavaka.

⁴⁴Mwami Nyasaye yavoolela Musa,

⁴⁵“Utakase vandu vu lwivulu lwa Levi, havukono ha vaana voosi vi shiyayi vakhulundu khwivulwa mu Vaisraeli, khali miruku chia vandu vu lwivulu lwa Levi, havukono hi miruku chia Vaisraeli; vandu vu lwivulu lwa Levi valiitsa khuva vaanje. Ninzi Mwami Nyasaye.

⁴⁶Lwa vaana vi shiyayi vakhulundu khwivulwa va Vaisraeli vali vanyishi, khuvira vandu vu lwivulu lwa Levi na vaana vi shiyayi tsimia tsivili makhomi saba na vavaka, uliitsa khukuula khandi varikala.

⁴⁷Uliitsa khurunga, khu shia mulala ifetsa vitonye viranu, khulondokhana khu shipimu shitushili,

⁴⁸ma uhe Haruni nende vaana veve tsisenti tsienetso.”

⁴⁹Musa yalonda makhuva kenako, navukula tsisenti tsia vandu vu lwivulu lwa Levi, vali nivarunji.

⁵⁰Ifetsa vitonye iheelefu indala tsimia tsivaka makhomi sita na viranu khulondokhana ni shipimu shia Havundu Hatakatifu;

⁵¹naha Haruni nende vaana veve, khulondokhana khu likhuva liu Mwami Nyasaye, khuli lwa yali navooli.