Read tsotso LIVALITSWA 34 Bible Online

LIVALITSWA 34 - tsotso bible

LIVALITSWA 34

¹Mwami Nyasaye yavoolela Musa

²mivaalo ku khuvoolela Vaisraeli, “Lwa muliitsa khwinjila mu shivala shia Kanaani, shivala shia muheetsanga khuva shienyu, yichi nachio mipaka chi shivala shienesho.

³Mupaka kuli khuluveka luli ikuvanda, kuliitsa khuraanjila Mwichendanyama mwa Sini khuvirila khu mupaka kwa Edomu. Kuliitsa khuraanjila khuluveka luli ivukwi, khundulu ikuvanda wi Inyanza yi Ichumbi.

⁴Kuliitsa khushiama khutsia khuluveka luli ikuvanda, khutsia khutukha khu Injila ya Akurabimu, makutsililile khutsia khuvirila mu Shiangalangwi shia Sini khali khutukha ikuvanda wi litaala lia Kadeshi-bareneha. Kuliitsa khushiamilaho khutsia khuluveka luli ivuluka wi imbo wi litaala lia Hazari Adari, khutukha havundu halaangwangwa Azimoni,

⁵ha kuliitsa khushiamila khutsia mu luhoongo luli khu mupaka kwi shivala shia Misri, nu kumalilishila khu Inyanza ya Meditarenia.

⁶“Mupaka kwi shivala shienesho, khuluveka luli imbo kuliitsa khuva Inyanza ya Meditarenia.

⁷“Mupaka kuli khuluveka luli ivuluka, kuliitsa khutsia vulunji khuraanjila khu Inyanza ya Meditarenia khutukha khu Shikulu shia Hori

⁸khandi khutsia khurulaho kutsi khutukha khu Injila ya Hamaatsi; khali kutsililile khutsia khutukha havundu halaangwangwa Zedadi;

⁹khandi mu litaala lia Zifuroni; kumalilishile havundu halaangwangwa Hazari-enani.

¹⁰“Mupaka kuli khuluveka luli ivukwi, kuliitsa khutsia vulunji khuraanjila Hazari-enani khutsia khutukha havundu halaangwangwa Shefamu.

¹¹Mupaka kwenoko kuliitsa khukholomokha, khuraanjila Shefamu khutukha mu litaala lia Ribula khuluveka luli ivukwi wi litaala lia Ahini, khandi kutsililile khutsia khutukha khu vikulu vili khuluveka luli ivukwi wi Inyanza ya Galilaya;

¹²mupaka kwenoko kuliitsa khukholomokha, khuvirila khundulu khu Muchela kwa Yorodani makumalilishile khu Inyanza yi Ichumbi. “Natsio tsiliitsa khuva tsimbeka tsine tsiu mupaka kwi shivala shienyu.”

¹³Nalwo lwa Musa yavoolela Vaisraeli, “Yishi nashio shivala shia mutsitsanga khunyola numumali khukhuva ikura, shivala shiu Mwami Nyasaye aheele vandu vi tsimbia tisa nende inusu ya vandu vuluhia lulala.

¹⁴Vandu vi tsimbia tsia Rubeni nende Gadi nende inusu ya vandu vuluhia lwa Manaase khuluveka luli ivukwi vanyola khale lusomo lwavo, lwa vali nivanyola khulondokhana khu tsinzu tsiavo,

¹⁵khuluveka luli ivukwi wu Muchela kwa Yorodani, injelekha wi litaala lia Yeriko.”

¹⁶Mwami Nyasaye yavoolela Musa,

¹⁷“Musalisi Eliazari nende Yoshwa mwana wa Nuni, valiitsa khukavulila vandu shivala.

¹⁸Muliitsa khurovola khandi shia mwimilili khurula mu shia luhia lwa vandu vi tsimbia tsia Israeli, amukhonye khukavula shivala.

¹⁹Yaka nako mira ka vandu varovolwa venavo, Varovola Kalebu mwana wa Yefune, khurula mu vandu vuluhia lwa Yuda;

²⁰Shemuheli mwana wa Amihudi, khurula mu vandu vuluhia lwa Simioni;

²¹Elidadi mwana wa Kisiloni, khurula mu vandu vuluhia lwa Benyamini;

²²Buki mwana wa Yoguli, khurula mu vandu vuluhia lwa Dani;

²³Haniheli mwana wa Efodi, khuva mwimilili khurula mu vandu vuluhia lwa Manaase, mwana wa Yosefu;

²⁴Kemuheli mwana wa Shifutani, khuva mwimilili khurula mu vandu vuluhia lwa Efurahimu mwana wa Yosefu.

²⁵Elizafani mwana wa Paranaka, khuva mwimilili khurula mu vandu vuluhia lwa Zabuloni;

²⁶Palitieli mwana wa Azani, khuva mwimilili khurula mu vandu vuluhia lwa Isakari;

²⁷Ahihudi mwana wa Shelomi, khuva mwimilili khurula mu vandu vuluhia lwa Asheri;

²⁸Pedaheli mwana wa Amihudi, khuva mwimilili khurula mu vandu vuluhia lwa Nafutali.”

²⁹Navo vandu vu Mwami Nyasaye yali niyaha vunyali vu khukavulila Vaisraeli miandu, lwa vali nivamenyanga mu shivala shia Kanaani.