Read tsotso MIKA 6 Bible Online

MIKA 6 - tsotso bible

MIKA 6

¹Hulishitsi makhuva ku Mwami Nyasaye avoolanga, “Yivi muprofeti, sinjila utsi khunzala imbeli wi vikulu, khu vikulu vihulile mwoyo kwokwo.”

²Munyi vikulu, muhulishitsi nunundi khuli Mwami Nyasaye ayaalanga; munyi misinji chi mihika ni mihika chi lilova, muhulishitsi; shichila Mwami Nyasaye ali ni shindu shichilanga nayaala vandu veve, ali ni vivune vichilanga nayaalana na Israeli.

³Mwami Nyasaye avoolanga, “Munyi vandu vaanje, ni shina shia namukhola? Nyala khuva namuteteshitsa munjila shina? Njipi!

⁴Ninzi wamurulitsa mu shivala shia Misri, nimuhonyinya khurula mu vurukwa; ninzi waruma Musa, Haruni, nende Miriamu khumwimilila.

⁵Munyi vandu vaanje, yitsushitsikhu nunundi ku Mwami Balaka wa Moabu yaloshitsa akhole, khuli Balamu mwana wa Behori yamuchipa, khandi kikholekha khuraanjila mu Liheemo liu Munyenye khutukha Gilugali, khu mumanye vikholwa vianje viu khuhonyinya.”

⁶Ni shina shianzia nashio imbeli wu Mwami Nyasaye, saale khu Nyasaye wu mwikulu? Toto, nzi khuye ni vihanwa viu khusambwa, ni vihuunwa viu muhika mulala?

⁷Mwami Nyasaye anyala khuyaanzitswa nimuha mamiiko mu tsiheelefu, inoho michela minyishi chia makura ku musayituni vuchila khuvwa?

⁸Yivi mundu, Nyasaye umali khukhuvoolela malahi; khandi ni shina shiu Mwami Nyasaye yenyanga alole nukholanga, navutswa yenyanga alole nukholanga katoto, khulolela vandu tsimbavasi, nu khumenya mu vwichehitsi na Nyasaye wowo.

⁹Mwami Nyasaye alaanganga vandu vi litaala likali, khandi khumuha luyali nakhwo khuva nu vusitsa vwatoto, “Munyi vandu va Yuda, muhulishitsi; munyi vamwivunjelitsa mu litaala likali, muhulishitsi.

¹⁰“Toto, nyala khwikhutsila vutamanu vwitsula mu tsinzu tsia vandu vatamanu, miandu chia vanyola khuvirila mu vuvehi, nu khurumishila tsilaatili tsiu vuvehi, shikholwa shia naleka?

¹¹Toto, nyala khuvoola vavula vutamanu vwosi, vandu varumishilanga tsilaatili tsiu vuvehi nende machina ku khupimila kakhali katoto tawe?

¹²Vahinda venyu vanyashitsanga vandi, vandu vamenyanga muko valomolomanga vuvehi, vakaatanga vandu mulilomoloma liavo.

¹³Khulwa yako, mali khuraanga khumusalilitsa, khumutivitsa shichila vwoni vwenyu.

¹⁴Muliitsa khulia, navutswa muliitsa khuvula khwikuura; inzala iliitsa khutsililila khumunyashitsa munda; muliitsa khuvikha livishilu, navutswa muliitsa khuvula khuva nalio. Shia muliitsa khuva nu mwavikha mu livishilu, nashio shia niitsa khutivitsa muliihe.

¹⁵Muliitsa khuraaka, navutswa muliitsa khuvula khuchesa; muliitsa khukhamulula misayituni, navutswa muliitsa khuvula khwivekha makura kene; muliitsa khukhamulula matunda ki misabibu, navutswa muliitsa khuvula khung'wa idivai yene;

¹⁶shichila mulondanga mwiima mutamanu kurika Mwami Omuri, mwiima kwa vandu vi inzu ya Ahabu vakholanga; khandi mulondanga mivaalo kavo koosi. Niitsa khumulerela matiinyu makali muno; shia mundu aliitsa khumuchaya. Vandu valiitsa khumukholela shihenye henye shia havundu hosi.”