Read tsotso ZEFANIA 1 Bible Online

ZEFANIA 1 - tsotso bible

ZEFANIA 1

¹Yili nalio likhuva liu Mwami Nyasaye yavoolela Zefania mwana wa Etsopia mwana wa Amaria, wali mukuuka wa Hezekia. Yaka kikholekha mumatukhu ka Yosia mwana wa Amoni, yali nali Mwami wa Yuda.

²Mwami Nyasaye avoolanga, “Niitsa khumulula shia shindu shiosi khurula khulilova.

³Niitsa khutivitsa shia mundu wosi nende tsinyama tsiumbulimu; niitsa khutivitsa manyonyi nende tsisutsi mu inyanza. Niitsa khwisikaritsa vandu vatamanu; niitsa khumulula shia mundu wosi khulilova. Inzi Mwami Nyasaye mali khuvoola.

⁴Niitsa khusalilitsa shivala shia Yuda, khali vandu voosi mu litaala likali lia Yerusalemi; niitsa khutivitsa misambwa chiarikala chiosi chia Baali havundu hanu, khali vasalisi voosi varumishilanga musambwa kwenoko.

⁵Niitsa khutivitsa vandu voosi vinamanga nivali khu shisechese shi inzu, nivasaala khu liuva, mweli, nende tsinyining'ini. Niitsa khutivitsa vandu vasaalanga khwinzi nu khwisuuha khuvirila mu lira lianje, navutswa visuuhanga khandi khuvirila mu lira lia Moleki.

⁶Niitsa khutivitsa vandu valekhana ninzi Mwami Nyasaye, voosi vambakhana khukhava inzi Mwami Nyasaye inoho khureeva inganakani yu khukhonywa.”

⁷Muhonjele vutswa imbeli wu Mwami Nyasaye, shichila litukhu lielie liu khukhalachila vandu lili himbi khutukha. Mwami Nyasaye umali khwirecheshitsa musango, khali utakasi vacheni veve va yalaanga.

⁸Mwami Nyasaye avoolanga, “Khulitukhu liu musango kwanje, niitsa khusalilitsa vimilili va vandu vaanje, nende vaana va vami, khali vandu voosi valondanga miima chia vandu vi tsimbia tsindi.

⁹Khulitukhu lienelo, niitsa khusalilitsa shia mundu wosi usaalanga khu vanyasaye vandi, vitsulitsanga mu inzu yu muruchi wavo vindu via vanyola khurulana khu lisalilitsa vandi nu vuhuuvi.

¹⁰“Khulitukhu lienelo, muliitsa khuhulila lukhwili ha Shilivwa shi Isutsi mu Yerusalemi, vandu nivalilanga havundu hayia mu litaala likali, khandi lihulilikhana li vindu virulikhanga mu vikulu.

¹¹Munyi vandu vi ikuvanda wi litaala likali, hooli numulila tsikhwili! Vandu voosi vakholanga vukhala vamululwa; voosi vapimanga ifetsa khu ilaatili vamali khutivitswa.

¹²“Mumatukhu kenako, niitsa khurumishila tsitaaha khukhava shia havundu hosi mu Yerusalemi; niitsa khusalilitsa vandu valolanga navo vasatsa vakhumbala, yavo vakanakananga mu mioyo chiavo, nivavoola, ‘Mwami Nyasaye avulakhu shindu shilahi inoho shitamanu shianyala khukhukhola.’

¹³Miandu chiavo chiliitsa khuyaaywa, khali tsinzu tsiavo tsirikale tsinzele. Khali niiva vumbakhanga tsinzu, valiitsa khuvula khumenya mutsio; khali niiva varaakanga misabibu mu milimi chiavo, valiitsa khuvula khung'wa idivai khurula khuchio.”

¹⁴Litukhu likali liu Mwami Nyasaye lili himbi khutukha, lili himbi khutukha, nalio lichendanga vwangu. Litukhu lienelo liliitsa khuva liu khuvelelitsa, khali musikali wi tingulu aliitsa khulila tsikhwili.

¹⁵Liliitsa khuva litukhu liu vurima vululu, litukhu liu khunyakhana nu khuminikha mu mwoyo, litukhu liu khwononyinywa nende khutivitswa, litukhu li shisuundi nende khutuunya, litukhu lia malesi khulolekha khandi shivala khumwama;

¹⁶litukhu liu khukhuva shisiliva shiu khuraanjitsa liihe, khukwana mataala ki tsimbinga nende masisi maraambi.

¹⁷Mwami Nyasaye avoolanga, “Niitsa khulerela vandu matiinyu khuli kenako, navo valiitsa khuchenda khuli vavekhu; shichila vakhola vwoni imbeli wanje inzi Mwami Nyasaye; Masahi kavo kaliitsa khusuundulwa khuli lukuushi, mivili chia vandu vakhutsa vavo chiliitsa khuva khuli masiingo.

¹⁸Khali ifetsa nende itsahabu yavo iliitsa khuvula khuvahonyinya khulitukhu lia inzi Mwami Nyasaye vavukulila vurima. Lilova liosi liliitsa khulaalitswa mu mulilu kwi lishiendekha liu vurima vwevwe; shichila aliitsa khumulula shia mundu wosi khulilova.”