Read tsotso ZAKARIA 8 Bible Online

ZAKARIA 8 - tsotso bible

ZAKARIA 8

¹Mwami Nyasaye wi Mikaanda Chiliihe yambolela,

²“Nzikombanga nu mwoyo kwosi khukhonya litaala likali lia Sayoni, shichila nayaanza muno vandu vamenya mulio, vuyaanzi vuchilanga nimbukulila vurima vatsiku veve.

³Niitsa khukalukha Sayoni khandi menye mu Yerusalemi. Litaala likali lia Yerusalemi liliitsa khulaangwa Litaala likali liu Vusuuvilwa, khandi shikulu shiu Mwami Nyasaye wi Mikaanda Chiliihe shilitsa khulaangwa Shikulu Shitakatifu.

⁴Vandu vasakhula, vasatsa nende vashele valiitsa khwikhala khandi mu tsinjila tsi litaala likali lia Yerusalemi, shia mulala nachendelanga indovoshi shichila vusakhulu.

⁵Vaana vi shiyayi nende vi shikhana valiitsa khwitsula mu tsinjila tsi litaala likali, nivakholelamu mivaayo.

⁶“Khali niiva shikaliitsa khuva matoro khu vandu valiitsa khuva nivarikale mumatukhu kenako, kaliitsa khuvula khuva matoro khwinzi Mwami Nyasaye wi Mikaanda Chiliihe.

⁷Niitsa khuhonyinya vandu vaanje khurula mu vivala khuluveka luli ivukwi nende imbo,

⁸nu khuvakalushitsa khumenya mu Yerusalemi. Valiitsa khuva vandu vaanje, ninzi mbe Nyasaye wavo, khuvirila mu vusuuvilwa khandi mu likhola liu vulunji.”

⁹Mwami Nyasaye wi Mikaanda Chiliihe avoolanga, “Muve ni ikholo munyi voosi va mwahulilakhu vwangu yuvu makhuva ka vaprofeti valomoloma khulondokhana khuli musinji kwi Litempeli, nili inzu yu Mwami Nyasaye wi Mikaanda Chiliihe kwalwa.

¹⁰Matukhu kenako nikashili khutukha, vandu shivakholanga muhinzilu khulu khurungwa inoho mirungu shichialiho khu tsinyama tawe. Khali mundu avulakhuho wali wamenya mu milembe khurula khu mutsiku wewe.

¹¹Navutswa nunundi shinzitsanga khukhola vandu varikala mu vandu vaanje, ka navakholakhu muliraanga tawe.

¹²Valiitsa khuraaka viraakwa viavo mu milembe; musabibu kuliitsa khwama matunda kako, viraakwa viliitsa khumeela mu malova, khandi imbula ilikhuva khurula mwikulu; niitsa khukasitsa vandu vaanje varikala ni vindu yivi viosi.

¹³Munyi vandu va Yuda nende Israeli, lwa mwakwa khuli shimanyilu shi shilaamo khu vandu vi tsimbia tsindi, nzitsanga khumuhonyinya, khandi mulilerela vandi tsikhaavi. Muvuli khuria, navutswa mutinyi ikholo.”

¹⁴Mwami Nyasaye wi Mikaanda Chiliihe avoolanga, “Lwa nali ninaviritsa khumulerela matiinyu, lwa vakuuka venyu vachila nimbukula vurima, navutswa nimbula khumusemeha,

¹⁵mbiritsi nunundi khukhola malahi khu Yerusalemi khandi khu vandu vi inzu ya Yuda. Muvuli khuria.

¹⁶Yivi navio vindu via mwenyekhanga mukhole: Muvoolele veshie katoto, khuvula khwivihonela, lwa muvayaalanga mushiina, navutswa vamenye mu milembe.

¹⁷Muvuli khukanakanila veshie vutamanu inoho khwisuuha mu vuvehi; shichila nako ka nambakhana. Inzi Mwami Nyasaye mali khuvoola.”

¹⁸Mwami Nyasaye wi Mikaanda Chiliihe yambolela,

¹⁹“Matukhu ku khuhonga vuchila khulia khu mweli kwa khane, kwa kharanu, kwa saba, nende kwi likhomi. Nachio chitsitsanga khukwa tsinyinga tsi milukha chiu vuyaanzi nende lisangala khu vandu vi inzu ya Yuda. Khulwa yako, muyaanze katoto nende milembe.”

²⁰Mwami Nyasaye wi Mikaanda Chiliihe avoolanga, “Vandu vanyishi halala na yavo vamenyanga mu mataala manyishi valiitsa khandi khwitsa;

²¹khandi vandu vi litaala lilala valiitsa khuhamila mu litaala lindi, nivavoola, ‘Hambi khutsi khureeva inganakani khurula khu Mwami Nyasaye, khandi khukhava Mwami Nyasaye wi Mikaanda Chiliihe; khali inzi mwene nzitsayo.’

²²Vandu vanyishi nende tsimbia tsi tsingulu valiitsa khukhava Mwami Nyasaye wi Mikaanda Chiliihe mu Yerusalemi, nu khureeveshitsa tsikhaavi khurula khu Mwami Nyasaye wi Mikaanda Chiliihe.

²³Mumatukhu kenako, vandu likhomi khurula mu vandu vi tsimbia tsiosi tsilomolomanga tsinomonomo tsinyishi lukanu valiitsa khuvuuna ikaanzu indala yu Muyahudi mulala nivavoola, ‘Chendi khumuheeleshitsi, shichila khumali khuhulila ndi Nyasaye ali na munyi.’ ”