Read tsotso MATAYO 15 Bible Online

MATAYO 15 - tsotso bible

MATAYO 15

¹Vandu valala khu Vafarisayo nende veechitsi va Malako, vali nivaruli Yerusalemi vatsia khu Yesu; nivareeva,

²“Shichila shina veechi vovo vambakhananga khulonda mechitso ka khwaheelwa na vakuuka? Valiitsanga shiukhulia na mamisu.”

³Yesu yavachipa, “Shichila shina mwambakhananga khulonda malako ka Nyasaye mamulonda mechitso kenyu vene?

⁴Nyasaye yavoola, ‘Uhe tata wowo nende mama wowo luyali,’ khandi ‘mundu unyekanga tata wewe inoho mama wewe aliitsa khwiirwa.’

⁵Navutswa muvoolanga ndi niiva mundu alavoolela tata wewe inoho mama wewe, ‘Shiambele khuhe mbani khu Nyasaye,’

⁶shiavetsanga naheele tata wewe luyali tawe. Mulekhanga khulonda malako ka Nyasaye mamulonda mechitso kenyu vene.

⁷Munyi vamwikhola kholanga khuva valunji! Muprofeti Isaya yavoola katoto, lwa yaprofeta khulondokhana khu munyi,

⁸‘Nyasaye avoolanga, vandu yava vambetsanga luyali khuvirila mulilomoloma liavo, navutswa mioyo chiavo chili ihale wene khurula khwinzi.

⁹Vasaalanga khwinzi mushikhaya; veechitsanga malako ka vandu valomba khuli ni malako kaanje!’ ”

¹⁰Yesu yalaanga halala shituma shia vandu khuye, navavoolela, “Hulishitsi mamumanye!

¹¹Shindu shivulakhuho shinjilanga mu mundu khurula ilwanyi shimulombanga avula khuva munihu, navutswa yeshio shirulanga mu mundu, nashio shimulombanga khwonekha.”

¹²Khu, veechi veve vatsia khuye, nivamuvoolela, “Ushili khumanyakhu ndi Vafarisayo vasalili mu mwoyo lwa vahulile makhuva ka uvooli?”

¹³Yesu yavachipa, “Shia shiraakwa shiosi shia Tata wanje uli mwikulu yakharaaka, shilitsa khurinyuulwa.

¹⁴Lekhani navo; ni vimilili vavekhu. Niiva mundu muvekhu aliitsa khwimilila muvekhu wundi, voosi vavili valiitsa khukwa mu vwina.”

¹⁵Navutswa Petro yamuvoolela, “Khuvoolelekhu shia lukanu yulu luvoolanga.”

¹⁶Yesu yavavoolela, “Khali munyi muvula limanya.

¹⁷Mushili khumanyakhu ndi shindu shinjilanga khuvirila mu munwa ku mundu shitsitsanga munda mwemwe, khandi shirula mu mmbili?

¹⁸Navutswa shindu shivirilanga mu munwa ku mundu shirulanga mu mwoyo; khandi nashio shilombanga mundu khwonekha.

¹⁹Mumwoyo ku mundu tsirulamu tsinganakani tsindamanu, vwiiri, vuheeyi, vakhana nende vayayi khukona nivashili khuhilana, vunuuli, vuvehi, nende khunyekanyinya vandi.

²⁰Yivi navio vindu vilombanga mundu khwonekha; navutswa khulia shiukhulia na makhono kali na mamisu shikalombanga mundu khwonekha tawe.”

²¹Yesu yarula havundu henaho natsia mu lusomo luli himbi khu mataala ka Tiro nende Sidoni.

²²Mukhali Mukanaani wamenyanga mu lusomo lwenolo yatsia khuye, nalaanjilila, “Mwami, mwana wa Daudi, mbela tsimbavasi, shichila litimoni lili mu mwana wanje wi shikhana, khandi limunyashitsanga vululu muno.”

²³Navutswa Yesu shiyamuvoolelakhu khali likhuva liosi tawe. Veechi veve vatsia khu Yesu, nivamusaya nuyaanza, “Muvoolele aruli hanu, shichila akhulerelanga liyooko lwa akhulondanga munyuma.”

²⁴Khulwa yako, Yesu yachipa, “Narumwa khu Vaisraeli vonyene, nivali khuli makondi kakora.”

²⁵Navutswa mukhali mwenoyo yatsia nasikama imbeli wa Yesu, navoola, “Mwami, khonya.”

²⁶Yesu yavoolela mukhali mwenoyo, “Nu vutamanu khuvukula shiukhulia shia vaana nu khusiuvila tsisiimbwa.”

²⁷Mukhali mwenoyo yachipa, “Mwami, nindio kali; navutswa khali ndio, tsisiimbwa tsinyanyanga matonye ki shiukhulia karikale khurula khu imesa yu muruchi watsio.”

²⁸Khulwa yako, Yesu yamuvoolela, “Uli mukhali wi lisuuvila linyishi! Shia shindu shiosi shia wenyanga khukholelwa, nashio shiukholelwa.” Mutsisaa tsienetso, mwana wewe wi shikhana yahona.

²⁹Yesu yarula havundu henaho, navirila khundulu khwi inyanza ya Galilaya. Yanina khu shikulu, niyikhala hasi.

³⁰Vituma vikali via vandu vatsia khuye. Vali nivamulerele vandu valema, vavekhu, vafwokoya, vasilu, nende vandi vanyishi vali nivalwala, va vavikha ha vilenje ha Yesu; navahonyinya.

³¹Vandu vali nilichenya, lwa valola vandu vasilu nivalomolomanga, vafwokoya nivahoni, valema nivachendanga, nende vavekhula nivalolanga; nivitsominya Nyasaye wa Israeli.

³²Yesu yalaanga veechi veve khwitsa khuye; navavoolela, “Mbelele tsimbavasi shituma shia vandu yava; shichila mbele navo khumatukhu kavaka, navo vavula shia valia; khandi shindi ni lienya liu khuvaseevula varuliho nivali ni inzala tawe, shichila nikhola ndio, valala khuvo vanyala khuhundushila khunjila nivatsitsanga.”

³³Veechi veve vamureeva, “Ni hena wa khunyala khunyola mu shiangalangwi yumu shiukhulia shitukha shituma shia vandu vanyishi yava?”

³⁴Yesu yavareeva, “Muli ni mikati chianga?” Vamuchipa, “Mikati saba, nende tsisutsi tsindititi tsionyene.”

³⁵Khulwa yako, Yesu yavoolela shituma shia vandu vikhale hasi.

³⁶Yavukula mikati saba nende tsisutsi, nasanditsa Nyasaye. Yatong'olanyinya naha veechi veve. Veechi veve nivakavulila vandu.

³⁷Vandu voosi valia nivikura. Veechi veve vavunjelitsa mihinda saba chia matonye ki shiukhulia kali nikarikale.

³⁸Vandu voosi valia vali vandu vasatsa tsiheelefu tsine, vuchila khuvalitsa vakhali nende vaana.

³⁹Lwa Yesu yali namali khuseevula shituma shia vandu, yinjila mu liaro, natsia mu lusomo lwa Magadani.