Read tsotso MATAYO 19 Bible Online

MATAYO 19 - tsotso bible

MATAYO 19

¹Lwa Yesu yali namali khuvoola makhuva kenako, yarula mu lusomo lwa Galilaya, natsia mu lusomo lwa Yudeya khuluveka lundi lu Muchela kwa Yorodani.

²Vituma vikali via vandu vamulonda, navahonyinyilayo.

³Valala khu Vafarisayo vatsia khu Yesu nivachelitsa khumureeka nivareeva, “Malako keru kahuchililanga mundu musatsa khulekhana nu mukhali wewe shichila khulondokhana khu shivune shiosi?”

⁴Yesu yachipa, “Mushili khusomakhu Mahandiko Matakatifu kavoolanga ndi khurula muliraanga Muloonji yalomba vandu, musatsa nu mukhali,

⁵navoola, ‘Khulondokhana khu shivune yishi, musatsa aliitsa khulekha tata wewe nende mama wewe ahambane nu mukhali wewe; navo vavili valiitsa khukwa mmbili mulala’?

⁶Khulwa yako, shivali ni vavili tawe, navutswa nu mmbili mulala. Khulwa yako, shia Nyasaye ahambanyinyi, mundu avuli khwavukhanyinyakhu.”

⁷Vafarisayo vamureeva, “Shichila shina Musa yahaana lilako musatsa ahe mukhali wewe ibarwa yu khulekhana, khandi amuleshe?”

⁸Yesu yavachipa, “Musa yamuhuchilila mulekhane na vakhali venyu shichila mwali ni mioyo militoho chiu khwambakhana khuhulila. Navutswa khurula shivala nishiloongwa shikavetsanga kario tawe.

⁹Muvoolelanga khandi ndi, musatsa wosi ulekhana nu mukhali wewe nikakhali nakholi vuheeyi, akholanga vuheeyi niiva aliitsa khuhila mukhali wundi.”

¹⁰Veechi veve vamuvoolela, “Niiva nindio kali khu musatsa nende mukhali, nu vulahi khuvula khuhila.”

¹¹Navutswa Yesu yavachipa, “Vandu voosi shivanyala khuhuchilila liechitso yili tawe; navutswa vandu vaheelwa na Nyasaye vonyene.

¹²Khuliho ni vivune vindi lukanu vichilanga vasatsa nivavula khuhila vakhali: vandu valala ni vitsili shichila vivulwa vario; vandi vakholwa na vandu khuva vario; vandi vali vario shichila Vwami vu mwikulu. Mundu unyala khuhuchilila mechitso yaka, khutukha akahuchilile.”

¹³Valala khu vandu venavo valera vaana vatititi khu Yesu avavishikhu makhono keke nu khuvasaalila; navutswa veechi veve vakondeshela vandu venavo.

¹⁴Yesu yavoola, “Leshi vaana vatititi vitsi khwinzi khandi muvuli khuvakaya, shichila Vwami vu mwikulu nu vwa vandu khuli yava.”

¹⁵Yesu yavikha khuvo makhono keke, narulaho.

¹⁶Litukhu lindi, mundu yitsa khu Yesu, nareeva, “Mwechitsi, nyala khukhola shindu shina shilahi khunyole vulamu vwi mihika ni mihika?”

¹⁷Yesu yamuchipa, “Shichila shina undevanga makhuva khulondokhana khu shindu shilahi? Khuliho nu mulala wonyene vutswa uli mulahi? Tsililila khukhola ka malako kavoolanga niiva wenyanga khwinjila mu vulamu.”

¹⁸Mundu mwenoyo yamureeva, “Ni Malako shina?” Yesu yamuchipa, “Uvuli khwiira; Uvuli khuheeya; Uvuli khwichishila wundi; Uvuli khuvehela wundi.

¹⁹Uhe tata wowo nende mama wowo luyali, khandi uyaanze mureende wowo khuli mwene wiyaanza.”

²⁰Muvukha mwenoyo yamuvoolela, “Namala khulonda malako yaka koosi. Ni shina shianjeheelwi?”

²¹Yesu yamuchipa, “Niiva wenyanga khuva museletse, simukha utsi khukuulitsa shia shindu shiuli nashio uhe vamanani tsisenti tsienetso; na uliitsa khuva nu vuhinda mwikulu. Numali khukhola ndio, unonde.”

²²Lwa mundu mwenoyo yahulila ndio, yarulaho navelele, shichila yali ni miandu minyishi.

²³Khulwa yako, Yesu yavoolela veechi veve, “Muvoolelanga kilikali ndi vuliitsa khuva vutiinyu muno khu mundu muhinda khwinjila mu Vwami vu mwikulu.

²⁴Muvoolelanga khandi ndi, nu vutoro muno khu ingamia khwinjila munduhu yisindani khuvira mundu muhinda khwinjila mu Vwami vwa Nyasaye.”

²⁵Lwa veechi vahulila ndio, vali nilichenya muno, nivareeva, “Ni viina unyala khuhonyinywa?”

²⁶Navutswa Yesu yavaheenza vulunji navavoolela, “Mundu avulakhuho unyala khukanyala, navutswa khu Nyasaye shia shindu shiosi shinyala khunyalikha.”

²⁷Petro yamuvoolela, “Lola, khwalekha shia shindu shiosi, khwakhulonda. Ni shina shia khuliitsa khunyola?”

²⁸Yesu yavachipa, “Muvoolelanga kilikali ndi lwa vindu viosi viliitsa khukholwa vuyia, Mwana wu Mundu aliitsa khwikhala khu shisoko shiu vwami shiu vukhumi vwevwe, munyi va mwanonda muliitsa khwikhala khandi khu visoko likhomi na vivili viu vwami, khukhalachila vandu vi tsimbia likhomi na tsivili tsia Israeli.

²⁹Shia mundu wosi walekha tsinzu inoho vamwavo inoho vambotso inoho tata inoho mama inoho vaana inoho milimi shichila lira lianje, aliitsa khunyola mu vunyishi mu tsimia, khandi aliitsa khunyola vulamu vwi mihika ni mihika.

³⁰Navutswa vandu vanyishi vali vu khuraanga valiitsa khuva vukhumalilikha; khandi vandu vanyishi vukhumalilikha nunundi valiitsa khuva vu khuraanga.