Read tsotso MATAYO 9 Bible Online

MATAYO 9 - tsotso bible

MATAYO 9

¹Yesu yinjila mu liaro, niyambukha inyanza khukalukha mu litaala liavo.

²Vandu valala vamulerela mundu wafwokoya, nakoni khu shitali. Lwa Yesu yalola lisuuvila lia vali nalio, yavoolela mundu wafwokoya, “Mwana wanje, va ni ikholo! Vwoni vwovwo vumali khusemehwa.”

³Vechitsi valala va Malako vavoolelana vene khuvene, “Mundu uyu anyekanga Nyasaye!”

⁴Lwa Yesu yamanya ka vali ni vakanakananga yavareeva, “Shichila shina mukanakananga vindu vitamanu mu mioyo chienyu?

⁵Nu vutoro khuvoolela mundu wafwokoya uyu, ‘Vwoni vwovwo vumali khusemehwa,’ inoho khumuvoolela, ‘Sinjila uchende’?

⁶Namumanyinya ndi Mwana wu Mundu, ali nu vunyali khulilova khusemeha vandu vwoni.” Khulwa yako, Yesu yavoolela mundu wafwokoya mwenoyo, “Sinjila, vukula shitali shioshio, utsi ingo!”

⁷Yasinjila natsia ingo.

⁸Lwa vandu valola ndio, varia, nivitsominya Nyasaye shichila wamala khuha vandu vunyali khuli vwenovo.

⁹Yesu yarula havundu henaho; khandi lwa yali nachendanga, yalola musololi wu vushuru walaangwangwa Matayo, niyikhale mu inzu ya vasololelamu vushuru. Yesu yamuvoolela, “Nonda.” Matayo yasinjila namulonda.

¹⁰Lwa Yesu yali naliitsanga shiukhulia mu inzu ya Matayo, vasololi vu vushuru vanyishi nende vooni vandi valala, vatsia nivasanga khulia na Yesu nende veechi veve.

¹¹Lwa Vafarisayo valala valola ndio, vareeva veechi va Yesu, “Shichila shina mwechitsi wenyu aliitsanga shiukhulia na vasololi vu vushuru nende vooni?”

¹²Lwa Yesu yahulila ndio, yavoola, “Vandu valamu shivanyala khwenya mushilishi tawe, navutswa yavo valwalanga vonyene.

¹³Simushi mutsi murunishitsi vulahi vwene ka Mahandiko Matakatifu yaka kavoolanga, ‘Nyenyanga tsimbavasi, navutswa musango tawe.’ Shikali niitsa khulaanga vandu vi likhola liu vulunji tawe, navutswa vandu vooni.”

¹⁴Veechi va Yohana Mubatisi vatsia khu Yesu, nivareeva, “Shichila shina khutsi nende Vafarisayo khuhonganga vuchila khulia shia khase khosi, navutswa veechi vovo vambakhananga khuhonga vuchila khulia?”

¹⁵Yesu yavachipa, “Musuuvilanga vacheni vali mushiselelo vanyala khuvelela musatsa uselelanga mwiiha nali navo? Navutswa litukhu liliitsa khutukha lwa mundu uselelanga mwiiha aliitsa khurulitswa khuvo; mavalihonga vuchila khulia shiukhulia.

¹⁶“Mundu avulakhuho unyala khuvukula shilaka shiyia anavili khu inguvu ikhulu; shichila shilaka shiyia shililinga khandi shiranduli inguvu ikhulu, khandi shilalomba vuranduli vukali.

¹⁷Mundu avulakhuho utsukhanga idivai impia mu maseelo makhulu ki idivai, shichila maseelo kaliitsa khurulikha, idivai isuundushi, ma maseelo koneshe; nikhali, idivai impia itsukhwangwa mu maseelo ki idivai kashili mayia, khandi koosi katsilililanga khuva vulahi.”

¹⁸Lwa Yesu yali nashivoolanga ndio, mulala khu vamihi va Vayahudi yitsa khuye, nasikama imbeli wewe; navoola, “Mwana wanje mwana wi shikhana wakhakhutsa; navutswa hamba utiili mukhono kwokwo khuye, mave mwoyo.”

¹⁹Yesu yasinjila, manamulonda, halala na veechi veve.

²⁰Mukhali wali niyanyakhana khumihika likhomi na chivili, shichila khuraatsa masahi yitsa khu Yesu khurulila inyuma; natiila khu lupindo lwi inguvu ya Yesu.

²¹Yakanakana, “Niiva natiila khu inguvu yeye vutswa, nahona.”

²²Yesu yishevukha; khandi lwa yamulola yamuvoolela, “Mwana wi shikhana wanje, va ni ikholo! Lisuuvila liolio limali khukhuhonyinya.” Mukhali mwenoyo yahona isaa yeneyo.

²³Lwa Yesu yinjila mu inzu yu mwamihi mwenoyo, yalola vandu nivimbanga tsinyimbo tsiu khwikhula, khandi shituma shia vandu nivakhuvanga liyooko;

²⁴yavoola, “Ruli munu; mwana wi shikhana uyu ashili khukhutsa, navutswa ukoni tsindolo.” Navo nivamusekha.

²⁵Lwa shituma shia vandu vali nivakhakhungwa khutsia ilwanyi, Yesu yinjila havundu wu mwana wi shikhana mwenoyo yali nali, namukumila mukhono, ma mwana wi shikhana mwenoyo navukha.

²⁶Makhuva kali nikakholeshe kalanda shia havundu hosi mu lusomo lwenolo.

²⁷Lwa Yesu yasimukha narulayo, vavekhu vavili vamulonda, nivalaanjililanga nivavoola, “Mwana wa Daudi, khuvele tsimbavasi.”

²⁸Lwa Yesu yinjila munzu, vavekhu venavo vatsia khuye. Yesu yavareeva, “Muli ni lisuuvila nyala khumuhonyinya?” Vamuvoolela, “Mwami, unyala.”

²⁹Yesu yatiila khu tsimoni tsiavo, navoola, “Kakholeshe kario khu munyi shichila lisuuvila lienyu.”

³⁰Tsimoni tsiavo tsikukha. Ma Yesu navakaya, “Muvuli khuvoolelakhu mundu wosi.”

³¹Navutswa vasimukha nivatsia khulanditsa makhuva khulondokhana khu Yesu shia havundu hosi mu lusomo lwenolo.

³²Lwa vandu vavekhu vavili venavo vali nivarulaho, vandu vandi valerela Yesu mundu wali niyakhaywa khulomoloma, shichila yali ni litimoni muye.

³³Lwa litimoni lienelo liali niliakhakhungwa, mundu mwenoyo yaraanga khulomoloma. Shituma shia vandu vali nilichenya, nivavoola, “Khushili khulolakhu shindu shiosi khuli yishi mu shivala shia Israeli.”

³⁴Navutswa Vafarisayo vavoola, “Mwimilili wa matimoni neye umuheetsanga tsingulu tsiu khukhunga matimoni.”

³⁵Yesu yasimukha navirila shia havundu hosi mu mataala makali koosi nende mu michitsi chiosi, ni yilwatsanga Ivanjeli khulondokhana khu Vwami mu masinagogi; khandi nahonyinya vandu vali nivawala vulwale vunyishi lukanu.

³⁶Lwa Yesu yalola vituma via vandu, yavalolela tsimbavasi, shichila vaheendanga mwoyo nivavula mukhonyani, khuli makondi kavula mwayi.

³⁷Yesu yavoolela veechi veve, “Lichesa ni linyishi; navutswa isavu ya vachesi nindititi;

³⁸musaale ndi mwene lichesa arumi vachesi mu lichesa lielie.”